Ярдәмгә мохтаҗлар читтә калмасын

Ярдәмгә мохтаҗлар читтә калмасын
Халыкны социаль яклау бүлеге 24 мең 840 кешегә хезмәт күрсәтә. 2012 ел белән чагыштырганда бу 2053 кешегә артыграк. Районда яшәгән 51 меңнән артык халыкның яртысына якыны әлеге оешмага караучы категориягә керә дигән сүз.
Бүлекнең “Мәрхәмәтлек үзәге” ярдәмгә мохтаҗ бер генә кешене дә читтә калдырмаска тырыша. Аларның хезмәтләре турында ишетеп, күреп, белеп торабыз. Тормышта авыр хәлдә калган өлкәннәр, инвалид балалар, авыр хәлдәге, күп балалы гаиләләрдә яшәүче балалар һәм башкалар ярдәменә мохтаҗлар белән социаль хезмәткәрләр өзлексез элемтәдә тора, төрле чаралар, экскурсияләр оештыра, яннарына бара, психологик ярдәм тәкъдим итә. Мобиль бригада урыннарга чыгып мохтаҗларны барлый, кирәк булса, психолог ярдәме күрсәтә, консультация үткәрә.
Аз керемле, тормышта авыр хәлдә калган гаиләләргә дәүләт ярдәме күрсәтү, ятим балаларга, әти–әни тәрбиясеннән калучыларга, башлангыч, урта һәм югары һөнәри белем бирүче учреждениеләрдә укучы инвалидларга елга бер тапкыр бирелә торган, еллык, айлык социаль түләүләр, торак һәм коммуналь хезмәтләр өчен түләүләргә субсидияләр, мохтаҗларны торак белән тәэмин итү буенча дәүләт программасын тормышка ашыру кысаларында Бөек Ватан сугышы, сугышчан хәрәкәтләр ветераннарына, аларның гаилә әгъзалары, инвалидлар, инвалид балалары булган гаиләләргә торак шартларын яхшырту өчен субсидияләр, төрле пособиеләр—барысы да халыкны социаль яклау бүлеге аша үтә.
Хисап җыелышында халыкны социаль яклау бүлеге җитәкчесе Илдус Әһлиев, халыкка социаль хезмәт күрсәтү “Мәрхәмәтлек үзәге” җитәкчесе Руфия Баһаветдинова, “Өмет чаткысы” балаларны тернәкләндерү үзәге җитәкчесе Наилә Сәмиева, Яңа Кенәрдәге “Өмет” өлкәннәрне тернәкләндерү үзәге җитәкчесе Ирек Исмәгыйлев, Арча өлкәннәр һәм инвалидлар йорты җитәкчесе Мулланур Гыйлаҗиев, Яңа Чүриле психоневрологик интернат директоры Рамил Гарипов башкарган эшләре, уңышлары, планнары белән таныштырдылар. Хисап җыелышында район башкарма комитеты җитәкчесе урынбасары Надия Мифтахетдинова катнашты.
—Сезнең бурыч—ярдәмгә мохтаҗ һәр кешене үз канатыгыз астына алу,—диде ул.—Яшәү минимумыннан да азрак пенсия алган гражданнар бар. Алар белән дә эшләү сорала. Сезгә даими рәвештә урыннарга чыгып, һәр авылга барып җитәргә, мохтаҗ һәр гаиләдә булырга кирәк.
Гөлсинә ЗӘКИЕВА