Спортны юлдаш итсәң, югалмассың

Спортны юлдаш итсәң, югалмассың
Район башкарма комитеты җитәкчесе урынбасары Надия Мифтахетдинова катнашында узган район яшьләр эшләре, спорт һәм туризм бүлегенең еллык хисап җыелышында сыйфатлы медицина ярдәме һәм төпле белем белән бергә әхлакый һәм физик тәрбия бирүдә бары тик бердәм һәм максатчан эш иткәндә генә уңай нәтиҗәләргә ирешеп булачагы турында сүз алып барылды.
Районда спортка караш ничек һәм нинди нәтиҗәләргә ирешелә, дигән сорауга җавап уңай булды. Нинди төрдәге һәм масштабтагы ярышларга бармасыннар, безнекеләр һәрчак уңышларга ирешеп кайта. Кул көрәше, бокс буенча Россия чемпионнарыбыз, күпләгән спорт осталарыбыз бар. Исемнәре республика күләмендә танылган спорт осталары янәшәсендә яшь шәкертләр булуы аеруча горурлык. Узган ел Арча халкы Универсиада утын каршылаганда спорт өлкәсендә дәрәҗәләргә ирешкән якташларыбыз өчен чын күңелдән горурлык хисләре кичерде.
Районда яше–карты спортның барлык төрен дә үз итеп шөгыльләнсен өчен җирлек булдырылды: зур залы, бассейны булган спорт комплексы инде берничә ел гөрләп эшли. Ләкин җитәкчелекне балаларның бик аз йөрүе борчый. “Барысына компьютер гаепле бугай”, — ди алар. Соңгы елларда мондый сүзләрне күп кенә әти–әниләрдән дә, укытучылардан да еш ишетергә туры килә. Ә укучыларга спортны якын итү өчен уңай шартлар тудыру гел арта бара: әйтик, мәктәпләрнең спорт заллары кичкә кадәр ачык, кил дә шөгыльлән, кышын хоккей тартмалары куелган авылларның саны да гел артуда. “Районның 17 меңгә якын халкы спорт белән шөгыльләнә. Ел дәвамында 150дән артык чара үткәрелде һәм 208 спортчы әзерләнде (179 — массакүләм разрядлы, 26 —беренче разрядлы, 1 — спорт остасына кандидат, 2 — спорт остасы). Район мәгариф учакларында 87 физкультура укытучысы эшли, 10сы —хатын–кыз. Укытучыларның 78 проценты махсус югары белемле”, — ди район яшьләр эшләре, спорт һәм туризм бүлеге җитәкчесе Зиннур Сәгыйтов. Спорт фанатларны ярата, мәҗбүри рәвештә балаларга белем биреп тә, аларда кызыксыну уятып та булмый. Әнә шул фанат укытучыларның шактые өлкән яшьтә. Мәктәпләргә, сирәк булса да, яшь белгечләр кайта. “Монда педагогика көллиятенең роле зур”, — ди җитәкче. Районда яшьләр иҗтимагый оешмалары да (“Форпост” җәмгыяте, Укучылар сараендагы “21 гасыр яшьләре”, педагогика көллиятендәге “Патриот”, “Бердәм Россия” җирле бүлекчәсенең “Яшь гвардия” клублары, волонтерлар) яшьләрне спортка тартуда ярдәм итә. Ә спортны юлдаш иткән яшьләрнең социаль һәм икьтисадый активлыгын күтәрү максатыннан 2011–2015 елларга “Авыл яшьләре” программасы тормышка ашырыла, шуның нәтиҗәсендә 50дән артык яшь белгеч торак шартын яхшырткан.
Арчада эшләп килүче спорт мәктәбе күп кенә балага башлангыч спорт белеме биреп, мәхәббәт тәрбияләргә дә өлгерде. Укучыларының уңышына киләчәктә дә сөенергә язсын.
Хисап җыелышында халыкның сәламәтлеген спорт ярдәмендә ныгыту буенча 2014 елга бурычлар куелды, “Туризм өлкәсен үстерү” район программасы расланды. Ә быел арчалыларны күңелле яңалык көтә — көзгә Боз сарае файдалануга тапшырылачак.
Розалия ЗИННӘТОВА