Почта хезмәткәрләренең хезмәт хаклары артты

Почта хезмәткәрләренең хезмәт хаклары артты
Почта хезмәткәрләренең хезмәт хакы 2014 елның беренче гыйнварыннан 18 процентка артты, дип белдерде Татарстан почтасы җитәкчесе урынбасары Резеда Сабирова 4 февральдә Казан арты тарих–этнография музеенда үткән Арча районара почта хезмәткәрләре хисап җыелышында.
Бүгенге көндә оешма Арча һәм Әтнә районнарындагы 36 почта бүлекчәсен берләштерә һәм анда барлыгы 271 хезмәткәр эшли.
Хисап җыелышында ясаган чыгышларында оешманың икътисадчысы, баш хисапчысы, җитәкче урынбасары узган елгы эшчәнлеккә тирән анализ ясады, уңышлары белән беррәттән, җитешсезлекләргә дә зур игътибар бирелде. Аеруча планны үти алмаган поч-та бүлекчәләренә тәнкыйть сүзләре күп яңгырады. Тикшерү барышында ачыкланган кимчелекләр турында да ачыктан–ачык сөйләшенде. Җи-тәкче Ирек Фәйзрахманов билгеләп үткәнчә, оешманың киләчәге бары тик халыкка сыйфатлы хезмәт күрсәтү белән бәйле.
Шулай ук биредә профсоюз комитеты һәм җитәкчелек арасында төзелгән коллектив килешүнең, хезмәтне саклау таләпләренең үтәлеше дә каралды. Соңыннан планны арттырып үтәгән бүлекчәләр җитәкчеләренә бүләкләр тапшырылды. Планны 114 процентка үтәгән Күлле–Киме почта бүлекчәсе беренче урынга һәм күчмә кубокка лаек булды.
“Арча хәбәрләре” газетасы баш мөхәррире Исрафил Насыйбуллин 2014 елның беренче яртыеллыгына район газетасына яздыру буенча алдынгы урыннарны яулаган почта бүлекчәләренә бүләкләр тапшырды, киләчәктә дә уңышлы хезмәттәшлеккә ышаныч белдерде.
Бу юлы район газетасына яздыру буенча беренче урынны 2нче номерлы почта бүлекчәсе (җитәкчесе Лилия Фассалова), икенче урынны Өчиле (Фирадия Вилданова), өченче — Сеҗе (Зөлхия Харисова) почта бүлекчәләре алды. Иске Ашыт (Гөлсинә Халикова), Мөндеш (Миләүшә Хөсәенова) почта бүлекчәләренә кызыксындыру бүләге тапшырылды.
Хисап җыелышында муниципаль район башлыгы урынбасары Любовь Осина катнашты, коллективның районның социаль–икътисадый тормышында тоткан ролен югары бәяләп, халык белән һәрвакыт даими элемтәдә торган почта хезмәт-кәрләренә авыр һәм катлаулы хезмәтләрендә уңышлар теләде, 2013 елдагы башкарган эшләренә яхшы бәя бирде.
Гөлсинә ЗӘКИЕВА