Бердәмлектә көч

Бердәмлектә көч
Соңгы елларда “Северный” хуҗалыгына зур сынаулар үтәргә туры килде. Әмма гади халык үз эшен эшли инде ул. Аңа хезмәтенә күрә тиешлесен түлә генә. Хуҗалык җитәкчесе Рөстәм Хәйруллин хисап җыелышында узган ел хезмәт хакының 84 проценты акчалата түләнүен билгеләп үтте.
Шушмабашта мондый җыелышлар бик матур, эшлекле уза.
— Ветераннар, яшьләр, дин әһелләренең монда булуы әйбәт, — диде муниципаль район башлыгы Алмас Назиров. — Биредә тырыш, булган халык яши. Җитәкчегез сезнең бәхет инде ул. Бер–берегезне аңлап, бердәм эшлисез. Бүгенге кыенлыкларны да тырыш хезмәт куеп, бергәләп җиңәрсез дип ышанам.
Район башлыгы яңа технологияләрнең беренче булып шушы хуҗалыкта кулланыла башлавын да искә төшерде. Заманында бәрәңге игү буенча да иң алдынгылар рәтендә иделәр. Хуҗалык җитәкчесе дә хәлнең авырлыгын бөтен тулылыгы белән тасвирлап бирде.
Әмма тормыш дәвам итә. Шушмабаш авыл җирлеге башлыгы Фуат Сәмигуллин куанычлы яклар турында да сөйләде. Яшь гаиләләрне һәм белгечләрне торак белән тәэмин итү программасы нигезендә 11 яңа йорт төзелгән. Носы авылында Фәзит Рәхмәтуллин, Шекә авылында Рифат Ризванов такта яру цехлары ачканнар. Рамазан Вәлиев гаиләсе мини–пекарня ачып, Шушмабаш авыл җирлеген генә түгел, Балтач, Әтнә якларын, Арча шәһәрен дә камыр ризыклары белән тәэмин итә. Ишнараттан Фәрит Әсәтов, кондитер цехы булдырып, 4 кешене эшле иткән. 14 хуҗалык терлек, техника алу, терлек абзарларын яңарту өчен кредитлар алган.
Җирлеккә кергән авылларда 463 сыер, 1087 баш мөгезле эре терлек бар. Узган ел 1308 тонна сөт сатылган. Былтыр 3 һәм аннан күбрәк сыер асраучы 15 хуҗалык ташламалы бәяләрдә саву аппаратлары алган.
Шушмабаш урта мәктәбен ныклап төзекләндерүне авыл җирлеге башлыгы 2013 елның иң куанычлы вакыйгасы булды, диде. Быелгы көчле салкыннарда да мәктәпнең җылы булуына шатланып сөйләделәр.
Җай белән генә юллар да яхшырып килә. Сәрдәбашка быел асфальт юл килеп җитәр дип өметләнәләр. Хуҗалыкның иң тырыш кешеләре яши торган авыл бу, терлекчеләре, механизаторлары мактаулылар исемлегендә.
Шушмабаш авыл җирлегенә кергән авылларда мәдәни чаралар, спорт ярышлары үткәрелә. Хоккей, футбол, шахмат, шашканы бик яраталар. Монда “Северный” хуҗалыгы төп терәк булып тора. Спорт белән шөгыльләнеп үскән егетләр ил алдындагы изге бурычларын намус белән үти. Хоккей буенча район данын яклаган Айрат Абдуллин бүгенге көндә армия сафларында. Узган ел 5 егет, исән–имин хезмәт итеп кайтып, тормышта үз урыннарын тапкан, 7 егет хезмәт итәргә киткән.
Былтыр җирлектә 27 бала туган, 32 кеше үлгән. Җиде яңа гаилә төзелеп, 6 гаилә таркалган. Монысы аеруча уйландыра торган хәл.
Участок инспекторы Ленар Хисамиев район, җирлек буенча хокук тәртибен бозу очраклары турында сөйләде, аларны булдырмау юлларын күрсәтте.
Ильяс ФӘТТАХОВ