Яңа йолдыз калыкты

Яңа йолдыз калыкты
Арча станциясендәге күп функцияле мәдәни–спорт үзәге турында соңгы вакытта күп языла. Кайбер районкүләм чаралар да биредә үткәрелә. Шунысы да игътибарга лаек, һәрберсенә халык яратып йөри, тамашачыларның җылы карашы, көчле кул чабуы үзешчәннәрне дә үсендереп җибәрә.
Акрынлап үзәкнең үз йолдызлары да калка башлады. “Арча таңнары” ансамбле—шуларның берсе. Исеменнән танырга тырышмагыз да, әле ул яңа гына шытып килә. Ә менә җитәкчесе “Яшь йөрәкләр” ансамбле аша таныш. Арча педагогика көллиятенең музыка укытучысы Флера Шакирова җырга, моңга гашыйк төрле һөнәр ияләре, лаеклы ялдагы апа–абыйлар белән ансамбль оештырган.
—Бүген аның беренче концерты, беренче чыгышы. Репертуарында әлегә ике генә җыр. Бу концертта ансамбль башкаруында шул ике җыр гына яңгырады. Әмма аның киләчәге алда. Мондый ялкынлы, дәртле, янып торган апа–абыйлар белән таулар да күчерергә була,—ди Флера Шакирова.
Концертта ансамбльгә йөрүчеләр аерым–аерым чыгышлар ясап та үз осталыкларын исбатлады. Гөлназ Җәләлетдинова, Вәлиулла Гатауллин, Гәүһәрия Галиуллина, Марат Котдусов, Нурфия Шәй-хиева, Лена һәм Нурания Галиевалар, Фирдәвес Гәрәева, Сәлимә Мөхетдинова, Диләрә Минзиева, Гүзәл Мозаффарова, Нурия Һадиева, Нәзир Фәхретдиновның җырлауларын тамашачы бик ошатты. Хәсибә Гатауллинаның шигырь сөйләве, Галиулла Гатауллинның гармунда уйнавы, биюләр, инструменталь ансамбль чыгышы концертны җанландырып җибәрде, Флера Шакирова үзе бик матур итеп алып барды.
—Бүген мәдәни–спорт үзәген яңа йолдыз яктыртты. Концерт ике сәгать дәвамында барса да, вакытның үткәне сизелми дә калды. Кыска гына арада шундый чыгыш әзерли алуы мактауга лаек. Ансамбльнең гомере дәвамлы булсын,—диде соңыннан Арча мәдәният идарәсе җитәкчесе Илнур Котдусов.
Дөрес, мәдәни–спорт үзәгенең бер уңайсызрак ягы бар—сәхнә кечкенә, тавыш яңгырый.
—Бу мәсьәләне дә хәл итәчәкбез,—диде Илнур Котдусов.—Сәхнәне зурайтып, пәрдә куюны планлаштырабыз.
Киләчәктә мәдәни–спорт үзәге күгендә тагын да яктырак йолдызлар януын телибез.
Гөлсинә ЗИННӘТОВА