Сочида Олимпиада, бездә—чаңгы ярышы

Сочида Олимпиада, бездә—чаңгы ярышы
“Россия чаңгы юлы—2014” Бөтенроссия массакүләм чаңгы ярышларыннан, елдагыча, арчалылар да читтә калмады. Быел ул аеруча үзенчәлекле—Сочида Олимпия уеннары барган көннәргә туры килде. Чаңгы спорты белән дус булган һәркем Арча стадионына ярышка төште.
Стадион капкасыннан керүгә Алия Диярова белән очраштык. Арчаның икенче мәктәбендә 2Б сыйныфында укый икән.
—Мин чаңгы шуарга бик яратам. Ярышларда да катнашам. Бүген дә көчемне сынап карарга булдым,—ди, Алия елмаеп.
Ул үзе генә килмәгән. Шул арада янына 4Б сыйныфында белем алучы абыйсы Илназ һәм газ куллану хезмәтендә эшләүче әтисе Илнур килеп җитте.
—Мин педагогия көллиятендә укыган һәм физкультура укыткан вакыттан ук чаңгы шудым. Беренче урыннарны бирмәдем. Хәзер яшьләр җитезрәк,—ди Илнур.—Бу шөгыльгә балаларны да өйрәттем. Әниләре Гөлназ да бездән калышмый иде. Бу юлы өйдә бер яшьлек улыбыз Альмир белән калды.
Чаңгы спортын сөючеләр бәйрәмен район башкарма комитеты аппараты эш-ләре идарәчесе Рамил Гарифҗанов ачты, ярышка баручыларга уңышлар теләде.
Узышка китүче беренче төркем чаңгычылар арасында нәни генә кызчыкны күреп, елмаешып куйдык. Ул кузгалып китүгә егылып та алды, әмма куркып калмады, алга баруын дәвам итте. Нишләр икән? Килеп җитә алырмы? Түземсезлек белән шул кызчыкның финишка якынлашуын көттек. Килде бит. Янында әтисе, Сикертән мәктәбенең физкультура укытучысы Разил Нәбиуллин да бар. Абыйсы Рәмис узып киткән үзләрен, өченче урынны алган. Шул арада яннарына әниләре дә килеп җитте.
—Ардыңмы соң?—дип сорыйбыз 6 яшьлек Гөлназдан.
—Ардым,—ди ул, кул арты белән маңгаен сыпырып.
—Кечкенәдән өйрәнә торсын, үзе өчен, сәламәтлеге өчен кирәк,—ди Разил.
Беренче төркемдәгеләр арасында финишка беренче булып, башкаларны күпкә артта калдырып, Кыснадан 5 сыйныф укучысы Илназ Сафин килде.
—Ярышка беренче генә баруым түгел инде. Моңарчы беренче унлыкка керә идем. Бүген, ниһаять, җиңдем,—ди Илназ, шатлыклы елмаеп.
Яшьләр эшләре, спорт һәм туризм бүлеге җитәкчесе Зиннур Сәгыйтов, баш белгече Рөстәм Зарипов, “Арча” балалар–яшүсмерләр спорт мәктәбенең укыту эшләре буенча җитәкче урынбасары Лилия Хисмәтова, инструктор–методист Фагыйлә Борһанова да башкаларга үрнәк күрсәтеп, чаңгы юлына басты. Мәңге картаймас өлкәннәр дә Россия күләмендә үткәрелә торган спорт бәйрәменнән читтә калмаган иде. Яңа Кенәрдән Гыйниятулла Гатауллин, Арчадан Нияз Әхмәдуллин, Ягъфәр Шәмиевның ничек йөрәге түзсен?
—Мин үземне белә башлаганнан бирле чаңгыда,—ди Ягъфәр Шәмиев.— 6нчы сыйныфта укыганда җыелма командага кердем. 50 елга якын педагогия көллиятендә физкультура укыттым. Татарстан, Россиякүләм ярышларда җиңүләр яуладым. 76 яшемдә булсам да, бер генә ярышны да калдырмаска тырышам.
Ярышта барлыгы 100 кеше катнашты. Иске Кырлайдан Динә Сафиуллина, Илназ Шәрәфиев, Айрат Ситдыйков, Ашытбаштан Илназ Сафин, Курса– Почмактан Таңсылу Шиһапова, Түбән Мәтәскәдән Лилия Рәхмәтуллина, Яңа Кенәрдән Рәмис Хәйруллин, икенче мәктәптән Андрей Блохин, балаларны тернәкләндерү үзәгеннән Гүзәлия Вәлиева, район электр чел-тәреннән Фәрит Габдрахманов, Арча үзәк хастаханәсеннән Лилия Вагыйзова, Арчадан Ягъфәр Шәмиев, Лилия Хисмәтова, Зиннур Сәгыйтов беренче урыннарны алдылар.
Гөлсинә ЗӘКИЕВА