Телекүпер тагын якыннарны күрештерде

Телекүпер тагын якыннарны күрештерде
12 февральдә Арча хәрби комиссариатында телекүпер аша 2013 елның ноябрендә хәрби хезмәткә алынган Каратай авылыннан Руслан Вәлиуллин әнисе Римма һәм энесе Рүзәл белән аралашты.
Руслан Тула өлкәсендә Гадәттән тыш хәлләр министрлыгы гаскәрләрендә хезмәт итә. Телекүпер аша аралашуда егетнең дуслары, армиягә чакырылыш составы рәисе Надия Мифтахетдинова һәм район хакимияте вәкилләре дә бар иде. Хәрби комиссариат җитәкчесе Алмаз Борһанов Руслан хезмәт иткән хәрби частьнең командиры белән аралашып, телекүпер оештырганнары өчен рәхмәт әйтте, якташыбызның ничек хезмәт итүе белән кызыксынды. Аның сүзләренчә, әлеге аралашуның максаты — солдатның сау–сәламәт, хезмәтеннән канәгать булуын үз күзләребез белән күрү.
Хәрби комиссариат тарафыннан һәр елны егетләр хезмәт иткән частьларга телекүпер аша аралашу оештыруны сорап хатлар юллана. Мөмкинлеге булганнары ризалык белдереп җавап юллый, аннан көнен билгелиләр. Мондый үрнәк республикада әле безнең җирлектә генә булганлыктан, республика хәрби комиссариаты һәр районга бу тәҗрибәне кулланырга чакыра. Безнең хәрби комиссариатка хезмәт итүчеләр турында бары уңай якларына гына басым ясалган, шундый егетләр тәрбияләп җибәргән өчен рәхмәт хатлары гел килеп тора. Күптән түгел шундый хатларны Удмуртиянең Кизнер шәһәреннән Рамил Зыятдинов (Яңа Кенәрдән), Рузил Сафин (Яңасаладан), Динар Таһиров (Иске Чүриледән), Казаннан Рузил Каюмов (Пөшәңгәрдән) хезмәт иткән частьлардан алганнар. Бүгенге көндә егетләребез 47 частьта хәрби бурычын үти. Быел хәрби комиссариат тарафыннан һәр частька Ватанны саклаучылар көне белән һәм хезмәт итүче егетләребезнең туган көннәренә котлау хатлары җибәрә башлаганнар.
Улы белән кара–каршы сөйләшү әни кеше өчен әйтеп бетергесез шатлык бирә. Аның сау–сәламәт булуын күрү җанга да тынычлык өсти.
Телекүпердән аралашу тәмамлангач, Римма ханым белән сөйләштем. Улыгыз үзгәргәнме, дип сорыйм.
—Үзгәргән, бераз тазарып, матурланып киткән, — ди ана, шатлык яшьләрен сөртеп. — Көн саен телефоннан сөйләшеп торабыз. Көнгә икешәр шалтырата, сагынам, ди. Солдат әнисе булу зур горурлык икән, авылдашлар, таныш–белеш гел хәлебезне белешеп тора. Солдат әти–әниләренә сабырлык, сәламәтлек телим, һәммәбезгә улларыбыз белән исән–сау күрешергә язсын. Улының хезмәтеннән канәгать булуына да сөенә ана. “Өч егет бергә торабыз, өчебезгә аерым душ, ванна, суыткыч, телевизор, бүлмә саен видеокамера тора. Кич йокларга яткач, табиб бүлмә саен егетләрне тикшереп йөри, дип сөйли улым”, — ди.
Тик бүгенге бәхетле мизгелләрне Русланның әтисе генә кичерә алмый. Дүрт ел элек, Радик абый якыннарын ятим калдырып, дөньядан китеп бара. Әфганстанда хезмәт итә ул, шуннан алып кайткан “бүләкләре” озын гомер кичерергә ирек бирми...
Телекүпергә очрашуга килгән Рәмис хәзрәт Гарифуллин солдаттагы егет-ләрнең исән–сау әйләнеп кайтуын сорап дога укыганнан соң, Радик Хәмит улының рухына да дога ирештерде. “Кайнар нокта” Радик Вәлиуллинның гына түгел, райондагы 31 яшь гомерне вакытсыз гүргә кертүгә сәбәпче булды. Аларның өчесе — Марат Лотфуллин, Фәнис Бикбаев һәм Вагыйз Әһлуллин яу кырында башларын салды, ә башкаларга туган якка әйләнеп кайту насыйп булса да, яраларының яңаруы арабыздан мәңгегә алып китте.
15 февраль көнне Әфганстаннан совет гаскәрләре чыгарылганга 25 ел тула. Тик үзәкләргә үткән сугыш яралары бүгенгедәй җанны әрнетә. Ярый әле, әфган сугышында башын салганнарның да, исән–сау әйләнеп кайтучыларның да хәлен белеп, ярдәм кулы сузарга әзер торучы хәрби комиссариат, “Сугышчан туганлык” оешмасы, район социаль яклау бүлеге бар. Ел да алар, бүген инде якты дөньяда булмаучы һәрбер әфганчының өендә булып, якыннарының хәлен белә. Шулай ук, ел әйләнәсе телефон аша аралашып, проблемаларын хәл итәргә тырышалар. 12 февральдә ул оешмаларның җитәкчеләре Алмаз Борһанов, Сергей Баһаветдинов, Илдус Әһлиев, әфган сугышында катнашкан Ренат Зарипов белән Илшат Миндубаев Марат Лотфуллинның әнисе Илсөя апа йортында һәм Арчадагы 8 гаиләдә булып, аларның якыннарын искә алды. Соңрак Арча станциясе зиратында һәлак булуыннан соң Кызыл Йолдыз ордены белән бүләкләнгән Марат Лотфуллинның һәм тыныч тормышта вафат булган әфганчыларның каберләрен зиярәт кылдылар.
Үзебезгә дә, килер буыннарга да сугыш афәтләрен күрергә язмасын иде. Ә шул афәт аркасында якыннарын югалтучыларга бары сабырлык, сәламәтлек кенә теләргә кала...
Розалия ЗИННӘТОВА