Тәрбияне көчәйтергә

Тәрбияне көчәйтергә
Арчаның 1нче мәктәбе һәм Лесхоз мәктәбендә балалар хәрәкәте үсеше мәсьәләләре буенча ТР Мәгариф һәм фән министрлыгы оештырган республика күләмендәге семинар–киңәшмә булды. Анда министрлыкның балаларга тәрбия һәм өстәмә белем бирү бүлеге җитәкчесе Эльвира Сафина катнашты.
Баланың, үз эченә бикләнеп, компьютер белән икәүдән–икәү генә яшәве бер дә хупланмый. Дәрестән тыш иҗади оешмаларда бала ачыла, мөстәкыйльлеккә өйрәнә, начар гадәтләргә бирешми, тормышта үз кыйбласын таба. Шуларны күздә тотып, бүген мәгариф системасында октябрят, пионер, комсомолны алмаштырган карлыгачлар, варислар һәм өлкән сыйныф укучылары берлеге хәрәкәтләрендә балалар белән эшләүне, тәрбияне көчәйтү максат итеп куелды.
Иң башта Арчаның 1нче мәктәбенә җыелдылар. Икенче каттагы фойеда Арча Укучылар сарае оештырган балаларның иҗтимагый берләшмәләре күргәзмәсе тәкъдим ителде. Яңа Кенәр лицееның “Җиһангирлар иле”, Арча Укучылар сарае техник иҗат үзәге, “Нур” телестудиясе, Лесхоз мәктәбенең “Мәк-тәп урманчылыгы” һәм башка берләшмәләрнең эшен карап, чыннан да, уңай тәҗрибә алырга була.
Хәлил Гайнетдинов җитәкчелегендәге “Җиһангирлар иле” балалар иҗтимагый хәрәкәте күргәзмәсе аерата кызыклы иде. Кунаклар Татарстан Республикасының Россия Федерациясендә вәкаләтле вәкиле Равил Әхмәтшин бүләк иткән космонавтлар сәгатен, хатын–кызлардан беренче космонавт Валентина Терешкова белән төшкән фоторәсемнәрне зур кызыксыну белән карады.
— Узган елның июлендә Мәскәүгә Дәүләт Думасына бардык, — дип сөйли Яңа Кенәр мәктәбенең 11 сыйныф укучысы Энҗе Хәбибуллина. —Җитәк-чебез бу сәяхәтне хатын–кыз очучының галәмгә беренче тапкыр күтәрелүенә 50 ел тулу уңаеннан оештырды. Дәүләт Думасында Валентина Терешкова янында 1 сәгать булдык. Ничек укуыбыз, яшәвебез турында сорашты, “Җиһангирлар” берләшмәсе белән кызыксынды, киңәш-ләрен бирде һәм безгә кунакка кайтырга теләвен әйтте.
Лесхоз мәктәбеннән узган ел Россия күләмендә мәктәп урманчылыгы программасы буенча беренче урынны алган 11 сыйныф укучысы Дамир Шиһабиев:
— Кечкенәдән табигатьне яраттым, — дип сөйли. — Мәктәптә урман хуҗалыгын сакларга, аның байлыгыннан файдалана белергә өйрәнәбез. Урманны чистартабыз, агачлар утыртабыз, җиләк, каен, нарат бөреләре җыябыз һ.б. Төрле бәйгеләрдә катнашабыз һәм район, республика, Россия күләмендә җиңүләр яулыйбыз. Шушы юнәлештә һөнәр дә сайлыйбыз. Быел мәктәпне тәмамлагач, Казан дәүләт аграр университетының урманчылык факультетына укырга керергә уйлыйм. Экология, туфрак, биология, урманчылык буенча безнең мәктәптән дүрт студент югары уку йортында укый.
Семинарда катнашучылар 1нче мәктәптә осталык дәресләрендә булды, Лесхозда мәктәп урманчылыгы программасының ничек тормышка ашырылуы белән танышты.
— Балалар хәрәкәте буенча Арчада беренче тапкыр, — дип сөйли Азнакай мәгариф идарәсе җитәкчесенең тәрбия эшләре буенча урынбасары Нәфисә Шәфыйкова. — Бик ошады. Балалар кыю. Кызыклы оешмалар күп. Лесхоздагы мәктәп урманчылыгы программасын безгә дә кулланырга кирәк икән, дигән фикергә килдем. Ә бездә картинг-лар техник иҗаты шактый алга киткән. Район башлыгы кубогына кышкы узышлар да үткәрелә. Техник иҗатны үстерү буенча мәктәпләр нефть тармагы һ.б. предприятиеләр белән хезмәттәшлек итә.
— Безне бигрәк тә Укучылар сараендагы техник иҗат үзәге кызыксындырды, — ди Әгерҗе мәгариф идарәсе җитәкчесенең тәрбия эшләре буенча урынбасары Рәнизә Шакирова.
...Сәхнәдә кызыл галстуктан 77 яшьлек пионервожатый Луиза Садыйкова.
— Татарстан дружинасы, басарга!
Көчле тавыштан тәннәр чемердәп китте. Бөтен зал торып басты. Менә кайда ул бердәмлек, көч һәм тәрбия!
Румия НАДРШИНА