Кичәге студент – бүген белгеч

Кичәге студент – бүген белгеч
Кеше гомерендә күңелгә уелып кала торган мизгелләр шактый була. Балигъ яшенә җитеп, мөстәкыйль тормышка аяк басканчы булганнары мәктәп — белем йорты белән бәйле. Әйтик, тәүге тапкыр мәктәп бусагасын атлап кергән, аннан аттестат алган көн, әгәр укуыңны дәвам иттерсәң — һөнәрле булуыңны раслап, кулга диплом алу. Менә шул соңгысы иң истә калганы буладыр, мөгаен. Чөнки син хәзер студент статусыннан еракта, мөстәкыйль, тиздән үзең акча эшли башлаячаксың.
18 февральдә без әнә шундый дулкынландыргыч кичәнең шаһитлары булып, Арча агросәнәгать көллиятен тәмамлаучы егет–кызларның диплом алу вакыйгасында катнаштык. Уку йортларын тәмамлаучылар, гадәттә, дипломны җәй айларында алуга күнеккәнгә, кыш уртасында көллиятне тәмамлап чыгу гадәттән тыш вакыйга кебек кабул ителде. Ә бүген диплом алучылар кыскартылган программа буенча (теориясенең сәгате элеккечә, практика сәгатьләре азрак) укыган.
Чулпан Зиннәтуллина пешекче–кондитер бүлеген тәмамлый. “Көллияттән без тәмле итеп ризык пешерергә өйрәнү белән беррәттән, өстәл бизәү серләренә дә өйрәнеп чыгабыз. Киләчәктә Казанга “Бәхетле”гә урнашырга җыенам”, — ди ул. Чулпанның төркемдәше Рамил Габдрахмановның да исәбе шунда китү. Гомумән, бу төркемдә белем алганнарның һәммәсе эш белән тәэмин ителәчәк. Кайберләре практика үткән чакта ук эшли башлаган. Бүген диплом алырга да күбесе эшеннән сорап кына килгән. Рамил дигәннән, пешекче булу серләрен төркемдә аннан кала тагын өч егет үзләштергән. Егетләрнең пешекче булырга теләве ел саен арта, ди укытучылар. Бүгенге көн куанычлы да, моңсу да. Хезмәткә өйрәтү остасы Альбина Нуриева да ямансу. “Ничә чыгарылышны озатсам да, бу төркем белән аерылышу бик кыен. Алар аеруча якын”, — ди. 22 елга якын биредә директор урынбасары булып эшләүче Эльмира Гаянова да шундый фикердә. “Хәзерге балалар замана белән бергә атлый. 20 ел элек укыганнар белән хәзерге студентлар арасында аерма зур, — ди ул. — Замана балалары белән эшләү кызыграк, әлбәттә, чөнки алар бик иҗади, актив, укытучылардан һәрвакыт яңалык көтә, өйрәнергә, укырга мәҗбүр итә”.
Диплом алучылар арасында дини кануннар кушканча киенгән кызларга игътибар итеп, берсенә сүз катам. Ландыш Гарифуллина инде ресторанда эшли башлаган. “Хәләл булмаса да, хезмәтемнән зарланмыйм. Җитәкчелеккә урнашканда ук хәрәм ризыклар әзерләргә кушмауларын үтендем”, — ди кыз.
Балаларның шатлыклы минутларын бергә уртаклашыр өчен кырык эшен кырык якка ташлап әти–әниләре дә килгән. Укырга кергән елларында сагынуга түзә алмый, бер атна гына укып карыйм да, китәм, дип, укытучының аз гына әрләвеннән дә еларга торган ул–кызларының бүген һөнәрле булуын, мөстәкыйль тормыш юлына аяк басуларын күрү нинди бәхет! Ә көллият җитәкчелеге тарафыннан балалары турында мактау сүзләре ишетү ничек күңелле икән!
Көллиятне быел 94 студент тәмамлый (68е биредә, калганы филиалда). Иртәгә инде һәрберсе үз юлы белән китсә дә, күңелләрендәге иң якты хатирәләр шушы һөнәр йорты белән бәйле булыр. Ә бүген “Саубуллашу” вальсы яңгырый. Моңсу да, киләчәккә өмет тә бирүче көй...
Бүген укуын тәмамлаучылар эш белән тәэмин ителәчәк, дип ышандыралар көллияттә. Хәзерге заманда иң кирәге шул. Егетләрнең шактые хәрби бурычларын үтәргә армия сафларына алыначак.
Кичәге студентларына һәр укытучы изге теләктә: тормышта үз урыннарын табып, биредә алган белемнәрен файдалы эшләрдә кулланып яшәргә язсын.
Розалия ЗИННӘТОВА