Улым мине дә уздырды

Улым мине дә уздырды
Гражданнарны хәрби–патриотик рухта тәрбияләүдә актив катнашкан өчен районның Кораллы Көчләр ветераннары советы әгъзасы Ринат Галеев Татарстан Республикасы сугыш һәм хәрби хезмәт ветераннары комитетының “Бөек Ватан сугышында Җиңүгә 65 ел” медале белән бүләкләнде.
Арчаның беренче мәктәбендә 10 сыйныфта укыганда Ринат Галеев партадашы Валентин Храмов (мәрхүм инде) белән хәрби булырга дигән кыю карарга киләләр.
Ни генә булмасын, әйткән сүз — аткан ук. Егет кеше ике тапкыр уйламый. Кулына аттестат алган яшь, гәүдәле, физик яктан нык, көчле егет 1966 елда Казандагы югары хәрби танк училищесына укырга керә. Шунда дүрт ел укып, югары хәрби белем ала. 28 ел гомерен хәрби хезмәткә багышлый.
—Хәзер үткәнемә кире кайтып, һөнәр сайлау алдында торсам, бер дә икеләнмичә хәрби булам, дияр идем. Хезмәтемне бик яраттым һәм ул һөнәрне сайлавыма һич тә үкенмим,—ди отставкадагы подполковник.
Училищедан соң югары белемле лейтенантны Германиягә җибәрәләр. Өйләнгән булу сәбәпле, ул 5 елга эләгә (ялгызлар 3 ел хезмәт итә икән).
—Дрезден шәһәрендә хезмәт иттем. Биредә яхшы коралландырылган, өйрәтелгән, тәүлекнең һәр минутында сугышка керергә әзер булган көчле хәрби частьлар иде. Илдә совет солдатларына карата мөнәсәбәт яхшы, дедовщина юк. Мин хәрби әзерлек (тактик ату, техниканы өйрәнү) буенча занятиеләр алып бардым. Хезмәт срогым үтеп, Ленинград округындагы Выборг шәһәренә кайтканнан соң да шушы эшемне дәвам иттем. Целинада да булдым. Майор дәрәҗәсенә күтәрелдем,—ди ул.
Шулай 5 ел яңадан үтеп китә. Ринат Галеевны сайлау алдына куялар: я академиягә керә, я яңадан Германиягә китә. Майор икенчесен сайлый. Ленинградтагы Киров исемендәге заводта эшләнгән, хәзер танылган, ул вакытта яшерен “Т–80” танкларын Германиягә җибәргән вакытка туры килә ул.
—Шул чорда оештырылган коры җир гаскәрләре буенча социалистик ярыш инициаторы да, беренче җиңүчесе дә без булдык,—ди Ринат Галеев.— Хәтерлим әле, “Красная звезда” газетасында безнең турында яздылар, хәтта каленьдарда да безнең фотосурәтләрне бирделәр.
Германиядән соң подполковник Самара өлкәсендәге укыту дивизия-сендә, Монголиядә хезмәт итә, Ульяновск өлкәсендә хәрби комиссариат системасында район хәрби комиссары вазыйфасын башкара. 1994 елны отставкага чыга, тагын 5 елдан Арчага әнисе янына күчеп кайта. Әмма хәрби династия дәвам итә. Улы Марат академияне тәмамлап, хәзерге вакытта Ставропольдә хезмәт итә, бер ай элек, 37 яшендә, полковник дәрәҗәсен ала. “Улым мине дә уздырды”,—ди Ринат Галиев горурланып.
Хәзер ул Кораллы Көчләр ветераннарының район советында. Яшь буынга хәрби–патриотик тәрбия бирү буенча җаваплы.
—Бүген яшьләр һәрьяктан белемле, ә элек тазарак һәм нык иде. Әмма патриотизм рухы элек тә, хәзер дә көчле,—ди Кораллы Көчләр ветераны.—Безнең районнан киткән егетләр хәрби хезмәттә дә туган төбәкләре данын саклый.
Гөлсинә ЗИННӘТОВА