Мәчетләргә яшьләр килә

Мәчетләргә яшьләр килә
Арча үзәк мәчетендә мөхтәсибәтнең чираттагы җыены булды.
—Гыйнварда үткәрелгән бәйгеләр бик уңышлы узды. Киләчәктә балалар, укытучылар, имамнар арасында бәйгеләр оештыруны да планлаштырабыз,—диде үзенең чыгышында район мөхтәсибе Раил хәзрәт Гыйлаҗев, елның беренче аенда башкарылган эш-ләргә анализ ясап.—“Иң яхшы мөгаллимә” билгеләнеп, җиңүчегә вымпел бирелгән кебек, имамнар арасыннан да иң яхшыларын сайлап алачакбыз. Бәйгенең беренче этабы 20 февральдә районда үтә, аннан иң яхшылары “Ел имамы—2014” республика бәйгесендә көчен сынаячак. Иң зур бүләк—хаҗга юллама.
—Арча—иң зур тарихлы, иң күп мәчетле, данлыклы як. Бәйгедә катнашып, аның данын яклаучы табылыр, дип уйлыйм,—дигән ышаныч белдерде җыенга килгән Татарстан Республикасы Президенты аппараты вәкиле Ләззәт Хәйдәров.
Җыенда шулай ук Россия Ислам университетының тәрбия эшләре буенча проректоры Ибраһим Шәйхабзалов, аның урынбасары Ринат Мозаффаров та катнашты.
—2000 еллар башында яшьләр чит илләргә чыгып дини белем ала иде. Тик алардагы уку системасы безнеке белән тәңгәл килми. Киләчәктә дин юлын сайларга теләүчеләргә үзебездә белем алу дөрес була. Юк, без чит илдә укуга каршы түгел. Әмма чит җирләрдә безнең тарихны, гореф–гадәтләрне белмиләр. Башта үзебезнең илдә белемнең нигезен үзләштерергә, аннан чит илдә аны күтәрергә кирәк,—диде алар.
Дини җыен Апаз һәм Урта Курса авылларында дәвам итте. Дин әһелләре бирегә авыл халкы белән очрашуга килде. Татарстан Республикасы Диния нәзарәтенең “Зәкәт” хәйрия фонды дәгъвәт бүлеге белән берлектә яшь муллаларның эшләрен күрсәтү максатыннан шундый чаралар оештырган. Анда алда телгә алынган дин әһелләреннән тыш, Диния нәзарәтенең дәгъвәт эшләре бүлегеннән Нияз Сабиров, Тимергали Юлдашев, мөнәҗәтләр укучы Ильяс Халиков, шулай ук “Зәкәт” хәйрия фонды вәкилләре Ләйсән Дәүләтшина һәм Илнур Вәлиев катнашты.
“Казанның 1000 еллыгы” исемендәге мәдрәсәне тәмамлаганнан соң Башкортстан егете Гайсә Го-бәйдуллинны юллама белән Апаз мәчетенә җибәрәләр. “Ватан” хуҗалыгы җитәкчеләре яшь мулланы хуплап каршы ала, 10 мең сум хезмәт хакы билгели, фатирга урнаштыра, фатир өчен исәп–хисапны да ясап бара. Гайсә хәзрәт тә җиң сызганып эшкә керешә. Казаннан кайткан кунаклар тарафыннан дини темага үткәрелгән викторинада балаларның актив катнашуы, төгәл җаваплары моның ачык мисалы.
Урта Курсада да шушы мәдрәсәдә белем алган яшь мулла, Балтач районы егете Ислам Абдуллин эшли башлаган. “Миңа 10 мең сум күләмендә хезмәт хакын авыл мәчетен төзетүче Вәдүт ага Вафин түләп бара. Әлегә яшәвем дә аның авылдагы йортында”,—ди Ислам.
Урта Курсада искиткеч матур мәчет төзелеп килә. Рәсми ачу тантанасы җәйге якка билгеләнсә дә, Яңа ел алдыннан мәчет эшли башлаган. Гөлчирә Зарипова белән Ислам Абдуллин дин дәресләре бирәләр. Әлегә мәчеткә 10–12 бала, 15ләп олы кеше йөри икән.
—Горурланырлык мәчетегез бар. Ул буш тормасын, йөрегез, догалар кылыгыз, дини белем алыгыз,—диде авыл халкына мөрәҗәгать итеп Тимергали хәзрәт.
Ә мәчет, чыннан да, искиткеч булачак. Шәхси эшмәкәр Вәдүт Вафин аңа тырышлыгын гына түгел, йөрәк җылысын да биргән.
—Мин гади авыл малае. Казанга китеп эшкә урнаштым. Башта 22нче заводта эшләдем, ул таркалгач, үз бизнесымны булдырдым. Тормышым алга китте. Әнинең вафатыннан соң, 6 бала арасыннан беренче булып, намазга бастым. Мин әти–әниемә, әби–бабама, бөтен мөселман туганнарыма дога кылырга тиешлегемне аңладым. Шул чакта авылда мәчет салдыру нияте дә туды. Юлаучыларга да уңай булсын дип, аны олы юл буена төзергә булдык. Башта кечерәк кенә мәчет булыр, дигән идем. Әмма мин һәр эшне җиренә җиткереп башкарырга гадәтләнгән. Хәләл акчам бар, үзем эшләргә вәгъдә бирдем. Зур хезмәт булса да, Аллаһы Тәгалә рәхмәте белән бу изге эш җиңел барды. Миңа ышаныч белдергән-нәре өчен авылдашларыма рәхмәтем зур,—диде соңыннан Вәдүт Вафин.—Тик авыллар арасында юл булмавы гына борчыды. Халык мәчеткә йөри алырмы? Аллаһы Тәгалә монда да рәхмәтен салды. Узган җәй район хакимияте тырышлыгы белән өч Курсаны да асфальт юл тоташтырды. Намазга йөрүчеләр, мәдрәсәдә укучылар саны арта. Хәзер бер генә теләгем бар: халык мәчеткә йөрсен иде.
Тимергали Юлдашев Урта Курсада да дини сораулар буенча викторина үткәрде, җиңүчеләргә бүләкләр тапшырды.
Гөлсинә ЗИННӘТОВА