Сәхнәдә-укытучылар

Сәхнәдә—укытучылар
Узган атнада район Мәдәният йорты сәхнәсендә “Газиз Арчам! Даның зурдыр, юлың туры, сиңа багышлана ул–кызларың җыры!” дигән исем астында Арчаның беренче һәм икенче мәктәпләре коллективлары чыгыш ясады.
Концертлар бер сулышта барды, вакыт узганы сизелми дә калды. Никадәр хезмәт, көндәлек мәшәкатьләр, ял һәм хәтта гаилә турында да онытып репетицияләргә йөрүләр, йокысыз төннәр, борчылулар—бар да күз алдыннан үткән кебек булды. Шулай булуына ышанып әйтә алам, чөнки укытучы халкы башкача булдыра да алмый. Бөтен нечкәлекләренә кадәр уйланылган номерлар, затлы костюмнар, сәхнә культурасы, яхшы чыгышлар тамашачы күңелен шунда ук биләп алды.
Беренче булып сәхнәгә Арчаның беренче мәктәбе укытучылары чыкты. Алып баручылар Айрат Шәңгәрәев, Дженет Степановага ярдәмгә балалар да чыкты. Вокаль, халык музыка уен кораллары ансамбльләре, Айрат Шәңгәрәев, Римма Сафиуллина чыгышлары алкышларга лаек булды. Гүзәл Ахунова җырлавын тамашачы тын калып тыңлады. “Умырзая” биюе матурлыгы, нәфислеге белән таң калдырды. Буыннар алмашуын тасвирлап ветеран укытучылар һәм аларның укучыларының сәхнәгә чыгуы дулкынландырды. Фольклор күренешкә алар кодалар чакыруны алган. Туйдан соң якыннанрак танышу, туганлык җепләрен ныгыту максатыннан кодаларны чакыру гадәте әле дә сакланып килә. Тик элек ул үзенчәлеклерәк тә, күңеллерәк тә булган. Атлар җигеп урам буйлап шау итеп килүләр, зурлап күчтәнәчләр тапшырулар, җыр–бию, күңел ачу—барын да шундый оста итеп бирде укытучылар, тамашачы үзен дә шул кунакта утырган кебек хис итте. Укытучылар тормышыннан юмористик сәхнә дә бик кызыклы чыкты. Электрон журналларны тутыру, билгеләр кую, дәресләр үткәрү, чиреккә нәтиҗә ясау, бала тәрбияләү белән беррәттән, концерт оештыру мәшәкатьләре белән дә янып йөргән укытучыларның, чыннан да, күңелсезләнергә вакытлары юк.
Укытучыларның өйгә кайткач та телдә һаман шул мәктәп, мәктәп, мәктәп... Арчаның икенче мәктәбе укытучы–артистлары тәкъдим иткән күңелле күренештә нәкъ менә шул күрсәтелә дә. Сингапур системасына нигезләнеп белем бирү белән тәмам башлары буталган укытучылар өйдә дә бу хакта онытмый. Фольклор күренеш итеп икенче мәктәп коллективы мулла чакыртып балага исем кушуны алган. Бу да халык арасында сакланып калган һәм яшь гаиләләр тарафыннан да кабул ителгән матур гадәтләрнең берсе. Шулай ук әлеге коллективның вокаль, халык музыка уен кораллары ансамбльләре, җырчылар Айгөл Ахунова, Гөлия Гафурова чыгышлары, мәктәп директоры Рамил Мөхәммәдьяров катнашындагы театральләштерелгән күренеш, молдован халыклары биюе күңелле дә, матур да булды. Хезмәт ветераны Вилорик Зыятдиновның концерт гармуннарында уйнавын тамашачы аеруча ошатты. Тагын шунысы игътибарга лаек, концерт кызыл җеп кебек бер сюжетка корылган иде.
Гөлсинә ЗӘКИЕВА