Тимерне кызуында суксаң яхшы

Тимерне кызуында суксаң яхшы
Әле күптән түгел генә булган Арча үзәк мәчете мөхтәсибәтенең чираттагы җыелышында имамнар арасында бәйгеләр оештыру турында сүз барган иде. 20 февральдә шәһәр һәм авыл мәчетләреннән 20 имам осталыкларын сынап карарга җыелды.
—Төп максатыбыз—приз алу түгел, ә бер–беребезнең белемен белү, тәҗрибә уртаклашу. Без бүген мәчетләрнең ничек эш алып баруы белән дә таныштык. Кайберләрегез хәтта альбомнар, плакатлар ясап алып килгән, бу да яхшы күренеш һәм үзегезгә киләчәктә кирәк булачак,—диде бәйгедә катнашучыларга мөрәҗәгать итеп Раил хәзрәт Гыйлаҗев.
Беренче булып имамнар мәчет тормышы, башкарган эшләре турында сөйләде, киләчәккә планнары белән таныштырды.
—Ике мәчеткә 11 мөгаллим һәм мөгаллимәләребез бар. 200дән артык шәкерт йөри. Республика бәйгеләрендә катнашып, җиңүләр яуладык,—диде станция мәчете имамы Хәлим хәзрәт Кәримов.
Яңа Кырлай мәчетендә 3 төркем укый: икесе балалар, берсе олылар . Вазыйх хәзрәт Гарипов 2002 елдан бирле бу вазыйфаны башкара, бик белемле һәм үз эшенең остасы.
—Имам халыкка сүзе белән генә түгел, эше, га-мәле белән үрнәк булырга тиеш,—диде Утар Аты мәчете имамы Фәнис хәзрәт Мостафин.
Кыскасы, бәйгедә катнашкан имамнарның һәрберсе турында күп итеп сөйләргә була. Алар бар да халыкны мәчеткә тартуга, балаларга дини белем бирүгә зур хезмәт куя.
Бәйге тәртибе буенча имамнар сорауларга җа-ваплар бирде, электрон Коръәннән тыңлап, сүрә-ләрнең исемен әйтте, вакытка Аллаһы Тәгаләнең исем сыйфатларын язды. Җанатарлар да тик утыр-мады. Гөлшат абыстай Гыйниятуллина алар арасында да сорау–җавап бәйгесе үткәрде.
Бәйгедә беренче урынга Яңа Кенәр мәчете имамы Ирек хәзрәт Галиев белән Яңа Кырлай мәчетеннән Вазыйх хәзрәт Гарипов чыккан иде. Абсолют беренче урынны билгеләү өчен аларга сораулар бирелде һәм Ирек хәзрәт өстенлек алды. Җиңүчегә вымпел, Коръән һәм кыйммәтле бүләк тапшырылды.
—Абыстайлар бәйгесендә дә вымпел Яңа Кенәр мәчетенә киткән иде. Икеләтә җиңү аларның хезмәтләренә бәя дә,—диде Раил хәзрәт.
Хәзер Ирек хәзрәт Галиевка имамнарның республика бәйгесендә район данын якларга туры киләчәк.
Баллар буенча аннан аз гына калышкан Вазыйх хәзрәткә дә Коръән һәм бүләк тапшырылды.
Икенче урынны Шушмабаштан Рөстәм хәзрәт Йосыпов, Хәсәншәехтан Шамил хәзрәт Әхмәтгалиев, өченче урынны Арча станциясеннән Хәлим хәзрәт Кәримов, Ташкичүдән Рәдис хәзрәт Галәветдинов, дүртенче урынны Утар Атыдан Фәнис хәзрәт Мостафин, Урта Курсадан Ислам хәзрәт Абдуллин, Сеҗедән Илдар хәзрәт Заһидуллин яулады. Җиңүчеләргә бүләкләр тапшырылды.
Бәйгедә Диния Нәзарәтеннән Нияз хәзрәт Сабиров та бар иде. Ул бәйгедә катнашкан һәр имамга бүләкләр алып килгән.
Гөлсинә ЗӘКИЕВА