Кешене рухландырып яши

Кешене рухландырып яши
Ерыклы авылында инде биш–алты ел сабый бала тавышы ишетелгәне юк. Балалар булмаганлыктан, мәктәпне ябып куйганнар. Авылны коткарып калу өчен егетләргә кызлар табып, туйлар үткәрергә кирәк. Мәстүрә апа шул ниятен тормышка ашыру өчен Казанга барып 4 матур кызны сайлап, Ерыклыга концерт куярга чакыра. “Коткарыгыз егетләрне!”— дип бар борчуларын кушып сөрән сала.
Бу Раушания Фәйзуллина бит! Якташыбыз, Симетбаш авылының хәтфә үләннәре өстендә тәгәрәп үскән хыялый кызчык бүген Әлмәт театрының иң якты йолдызы. Наил Гаетбаевның “Кызлар килде авылга” спектаклендәге әнә шул роле белән тамашачыны сөендерә, көендерә дә, күңеленә рәхәт мизгелләр дә бүләк итә. Раушания Фәүзия апа белән Самат абыйның дүртенче балалары булып дөньяга килде. Сәхнәдән төшмәгән әтиләренә бәлә-кәйдән ияреп йөрүче дә шул Раушания булды. “Кечкенәдән үҗәт булды апа, үзе теләгәнен эшләми калмый, җырлап я биеп күрсәткән өчен әтинең куен кесәсенә яшеренгән кәнфитне алмыйча алдыннан төшми торган иде”, — дип сагынып искә ала сеңлесе Илһамия балачак елларын. Мәктәптә укыганда кыз бию белән яши башлый. Үзлегеннән һинд, чегән биюләрен өйрәнә, хәтта костюмнарын тегә. Концертларда авылдашлары чыгышын кат–кат сорап чакырганда кызның күңел дәрьясы ярларыннан ташып, хыял канатларына утырып йөзә. Ә офык артында ул хыялның иң ымсындыргычы ялтырый: театр. Чоры өчен авыл җиренә ятрак һөнәр сайларга теләсә дә, ата–ана кызның хыялына киртә куймый. Һәм менә Раушания Казан театр училищесы студенткасы. Санаулы вакыт бигрәк тиз узучан була, өч ел сизелмичә дә узып киткән, инде ул дипломлы белгеч. Башкаланың Г.Камал театрында калырга кыстасалар да, хыял канатлары аны Әлмәткә алып китә. Хәзерге көндә Әлмәт театрын бу якты, талантлы актрисадан башка күз алдына да китереп булмас кебек. Чөнки ул театрның төп репертуарын “тотып тора”. Аның образларына гадилек, табигыйлек хас. 30 елга якын иҗат тормышында якташыбыз илледән артык образ иҗат иткән. Әлбәттә, бу уңышлар талант белән генә чикләнми, Һәрбер уңышы артында аның нык тырышлыгы һәм театрга булган мәхәббәте, тугрылыгы тора.
Гаилә бәхете дә Әлмәт театрында көтеп тора кызны. Ире Хөрмәт Фәйзуллин белән алар сәхнәдә дә озак еллар мәхәббәт аңлашып яши. Уртак сөенечләре — кызлары Ләйсән Фәйзуллина бүген Г.Камал театры актрисасы.
Күптән түгел Татарстанның халык артисткасы Раушания Фәйзуллина 50 яшьлек юбилеен билгеләп үтте. Аның өчен иң зур шатлык — үзе уйнаган театр сәхнәсендә туганнары белән бергә иҗатын хөрмәт иткән якташларын да күрү булды. Горурланып яши Раушания ханым, иҗатына көч биреп торучы әнисенең, олы җанлы туганнарының туган җирендә яшәве, Арча якларының яулаган уңышларын еш ишетеп, күреп торудан тәм табып горурланып яши.
Менә бүген тагын әнисенең телефон номерын җыйды: “Әни, нихәл? Март башында Арчага гастрольгә кайтабыз...”
Розалия ЗИННӘТОВА