Яңалыклар

10 МАРТТА Арча район башлыгы А.Ә.Назиров алып барган иртәнге киңәшмәдә авыл хуҗалыгында сөрү җирләрен рәсмиләштереп бетерү, ашламалар ташу, ягулык-майлау материаллары туплау бурыч итеп куелды. Терлекчелектә югары сыйфатлы продукция алу, аны отышлы сату мөһим.
“Арча якташлыгы” җәмгыятенең эшен камилләштерү, аның сайтын булдыру кирәклеге әйтелде. Төзелеш, төзекләндерү мәсьәләләре күтәрелде. Объектларны язгы чорда саклау мәсьәләләре сөйләшенде. Күпкатлы йортлар тирәсендәге би-ләмәләрне тәртипкә кертүне дәвам итү буенча планлы эш алып барырга кирәк.

11 МАРТТА муниципаль район башлыгы Алмас Назиров гражданнарны кабул итте. Мөрәҗәгать итүчеләр торак төзелеше, кибет ачу, гаилә фермасы оештыру мәсьәләләрен күтәрде. Район башлыгы һәрберсенең гозерен игътибар белән тыңлап, аларны республикада гамәлдә булган программалар кысаларында үтәү мөмкинлекләрен җентекләп аңлатты, төпле киңәшләрен бирде.
Газета укучыларыбызга бу уңайдан шуны искәртәбез: районда тормышка ашырылучы дәүләт программалары турында сез Арча муниципаль районының рәсми сайтында (arsk.tatar.ru) тулы мәгълүмат ала аласыз.

15 МАРТТА Арча шәһәре стадионында Советлар Союзы Герое Гани Сафиуллин истәлегенә багышланган чаңгы марафоны буенча шәхси беренчелек була. Сәгать 10да башлана.

Ярминкә булды
7 мартта Арчада Халыкара хатын–кызлар көненә багышланган ярминкә булды. Аны “Курса МТСы” ширкәте бик матур итеп үткәрде. Ярминкәгә муниципаль район башлыгы Алмас Назиров әйбәт бәя бирде.

Китап укучылар арткан
Китапханә хезмәтеннән 2013 елда 38 меңнән артык укучы файдаланган. Китапханәләрдә барлыгы 1219 массакүләм чара (уртача бер китапханә тарафыннан 21) оештырылган, аларда 67775 кеше катнашкан.

Сикертән театр коллективы “Халык театры” исемен алуга тәкъдим ителде
Сикертән авыл мәдәният йорты каршындагы театр коллективы, Туфан Миңнуллинның “Гөргөри кияүләре” комедиясен Арча Мәдәният йорты сәхнәсендә куеп, районда театр коллективлары арасында барган бәйгедә призлы урын яулаган иде. Тамашачы үзешчәннәр уенын бик яратты. Сикертәнлеләр, ”Халык театры” дигән исем алуга тәкъдим ителде.

Музей фондлары тулыланган
Райондагы музейларның матди–техник базасы даи-ми тулыланып тора. “Казан арты” тарих–этнография музее һәм “Заказанье” берләшмәсе фондлары 121 данәгә тулыланган. Аларда барлыгы 15 мең данә экспонат саклана. Мәдәният министрлыгы аша техник чаралар һәм башка кирәк–яраклар алынган. Узган ел музейлар тарафыннан 637 экскурсия үткәрелгән, 34 меңнән артык кешегә хезмәт күрсәтелгән. Шекә, Сәрдәбаш авылларында тарихи–этнографик экскурсияләр оештыру да музей фондын тулыландырырга ярдәм иткән.

Мәктәп шоферлар һәм тракторчылар да әзерли
Районның барлык урта мәктәпләрендә “В” һәм “С” категорияле “Автомобиль йөртүче”, “Тракторчы– машинист” һөнәрләре үзләштерелә. Узган уку елында РОСТО (ДОСААФ)ның автосыйныфлары “В” категорияле — 143, “С” категорияле 130 машина йөртүче һәм 42 тракторчы әзерләп чыгарган. Бу һөнәрләрдән тыш, 5 мәктәп укучыларга тегүче, ЭВМ операторы, кондитер, автослесарь һәм башка белгечлекләр буенча да белем бирә.

9 март көнне “Арча” спорткомплексында волейбол буенча районара ярышлар узды. Анда 8 район волейболчылары көч сынашты. Чараны Арча районы мәгариф идарәсе җитәкчесе урынбасары Зөлфия Кәлимуллина ачып җибәрде.
Киеренке һәм мавыктыргыч уеннарда җиңүчеләр ачыкланды. Алар түбәндәгечә: беренче урын Балтач, икенче — Арча, өченче урын Теләче командасында.
Беренче, икенче урынны яулаган командалар гомумреспублика ярышында катнашачак. Ярышларны карарга район башлыгы Алмас Назиров та килде. Җанатарлар күп булса, спортчыларның көч–куәте тагын да артыр иде.

“Ак барс” агрокомплексы” ширкәте беренчелегенә хоккей ярышлары узды
Язның беренче бәйрәме 8 Мартны Мөрәле халкы күрше авыллар белән бергәләп истә калырлык итеп билгеләп үтте. Бу көнне “Ак барс” агрокомплексы” ширкәте беренчелегенә хоккей ярышлары узды. Ярышларда Ташкич, Сеҗе яшьләре, “Ак барс” агрокомплексы” ширкәте белгечләреннән торган командалар да катнашып, көчләрен сынады.

Яр Чаллы шәһәрендә Татарстан беренчелегенә 1994–1996 елларда туган егетләр арасында тхэквондо буенча ярышлар булды. “Арча” спорт мәктәбендә тренер Газинур Борһановта шөгыльләнүче Камил Махиянов һәм Руслан Борһанов үз авырлык үлчәүләрендә өченче урынны алды. Алар Идел буе Федераль округы беренчелегендә үткәреләсе ярышларда катнашачак.
Казанда 2000–2002 елларда туган егетләр һәм кызлар арасында үткән бәйгедә шул ук остаз әзерләгән Надежда Савельева — икенче, ә Алмаз Закиров өченче урынны яулады. Алар да Идел буе Федераль округы беренчелегендә катнашырга әзерләнә.