Авылны ташламагыз, ди өлкәннәр

Авылны ташламагыз, ди өлкәннәр
Курса–Почмак урта мәктәбендә “Хезмәт сөйгән халык — дан–хөрмәткә лаек” дигән бик матур кичә үткәрделәр.
Гомерләре буе туган җиргә тугрылыклы булып яшәгән, намуслы хезмәтләре өчен күп бүләкләргә лаек булган ветераннар белән Сеҗе, Сикертән, Курса–Почмак мәктәпләре югары сыйныф укучыларының чәй өстәле артында очрашуы иде бу.
— Бүген бездә үзенчәлекле бәйрәм, — диде үзенең чыгышында Шәйдулла Сәлахов. — Әлеге очрашуда хезмәт батырлары, нинди авыр елларда да авылларыбызны саклап калган хөрмәтле абый–апаларыбыз, бүгенге көндә ширкәтнең тоткасы булган хезмәт алдынгылары, белгечләр катнаша. Менә Рәис Гарипов, ул гомере буе агроном булып эшләгән кеше. Татарстан Республикасының атказанган механизаторы Зәкәрия Динмөхәммәтов — легендар шәхес, лаеклы ялда булса да, тракторда эшләвен дәвам итә.
Җитәкче үзен борчыган мәсьәләгә дә тукталды.
— Бу очрашуның сәбәбе бар, — диде ул. — Карап–карап йөрим дә, эшли торган кешеләребез ялга китеп бара. Ә аларга алмаш кирәк. Элек бер кешегә дә өй дә төземәделәр, фатир ачкычлары да бирмәделәр. Һәр йортта 6–7 бала иде. Хәзер хөкүмәт булышырга тора. Әлеге очрашу алдыннан холдинг җитәкчесе Иван Егоров белән сөйләштем. Ул да бик хуплады. Авылда калучы яшьләргә холдинг йорт салу өчен 9 процентлы кредит бирәчәк, ә ул процентларны холдинг түләячәк. Холдинг ярдәме белән күпме техника алынды, төзелешләр алып барылды.
Сеҗе авыл җирлеге башлыгы Гөлфия Гыйбадуллина ширкәт эшләп килгән ун ел эчендә 20ләп объект төзелүен билгеләп үтте. Алар арасында мәктәпләр, мәчетләр, һәйкәлләр, терлекчелек фермалары һ.б. бар. Яшь гаиләләр өчен 15 йорт төзелде. Авылларның киләчәге, чыннан да, борчылырлык. Сеҗе авылында 85 йортның яртысында әби–бабайлар гына яши. Бүген дүрт мәдәният хез-мәткәре генә кирәк.
— Мин үзебезнең балачакны еш күз алдына китерәм, — диде тугызынчы дистәне ваклаучы, 38 ел агроном булып эшләгән Рәис Гарипов. — Авылның бөтен яме күңелгә кереп калган. Сугыш башланганда миңа ун–унбер яшь иде. Ул вакытта безнең колхоз “Мәгариф” исемле. Атларны сугышка алып бетерделәр. Сыер, үгез җигеп җир эшкәрттек, йөк ташыдык. Икмәк илткәндә үгез киреләнеп Корайван тегермәне биясенә алып төшеп китте, капчыкларны көч–хәл белән чыгардык. Сугыш беткән елны колхоз рәисе: “Агрономлыкка укы, үзең дә тук булырсың, халыкны да тук итәрсең”, — диде. Ул елларда авылда бик авыр иде. Казанга эшкә дә урнашып кайткан идем инде. Туган авыл барыбер үзенә тартты. Хәзерге техника басуларны сәгатьләр эчендә эшкәртеп бетерә. Тормыш та әйбәт, бәхетле булыгыз, берүк авылны ташлап китә күрмәгез!
— Хезмәтебезне күрә белделәр, — ди 49 ел тракторда эшләгән Габделкави Кәримов. — Тырышып укыгыз, безгә андый мөмкинлекләр булмады. Авылда яшәдек, беркемнән дә ким түгел. Тырышкан кеше беркайда да югалмый.
— Әткәй–әнкәйләргә рәхмәт, балаларны алар үстереште, өйдәге эшләрне алар башкарды, — диде озак еллар терлекчелектә эшләгән Тәскирә Зыятдинова. — Без фермадан кайтып керә алмадык, чиләк–көянтә белән су ташыдык.
Бик күп фидакарьләрнең исемнәре телгә алынды бу кичәдә. 30 ел сыер сауган, 10 ел бозау караган Диләрә Әхмәдуллина Мәскәүдә съездда катнашкан, Татарстан Республикасының атказанган терлекчесе исеменә лаек булган.
Бүген дә хезмәт кешесенә хөрмәт зур. Раил Фәйзрахманов яшь комбайнчылар арасында республикада өченче урынны алды. Узган ел комбайнчы ярдәмчесе Фәнзил Минсафин (әле ул мәктәптә укый) республикада җиңүче булып, югары уку йортына керү мөмкинлеге бирә торган сертификатка ия булды. Шушы җирлектә туып–үскән баш агроном Рөстәм Мөхәммәдиев кандидатлык диссертациясе якларга әзерләнә.
Күңелләрне кузгаткан, тирән мәгънәгә ия очрашу булды бу. Тәэсирле чыгышлар “Бәхетемне мин читтә түгел, синдә таптым”, “Әти кайтып килә басудан” дигән җырлар белән чиратлашты.
Кичәне матур итеп үткәрүдә Курса–Почмак мәктәбе коллективының өлеше зур булды.
Ильяс ФӘТТАХОВ