“Алтын шайба” чемпионнары!

“Алтын шайба” чемпионнары!
Безнең яшүсмерләр хоккей командасы район тарихында беренче тапкыр “Алтын шайба” призына үткәрелгән республика ярышларында чемпион булды. Моңарчы да арчалылар әлеге дәрәҗәле ярышта уңышларга ирешкән, 1984 елда бронза, 2002 елда көмеш медаль алган булган. Шунысы кызык, 30 ел элек Субаш Атыдан Илһам Шакиров өченче урынны алса, бу юлы аның улы Илфат алтын медаль иясе! Һәм бүген бездә кунакта җыелма команданың баш тренеры Булат Гыйззәтуллин белән Утар Аты командасы тренеры Илнур Абдрахманов.
Илнур: Безнең максат—“Ак Барс”ка (икенче командасына булса да ярый) бер уенчы әзерләп бирү. Тренер өчен бу бик зур эш.
Булат: Район тарихында беренче тапкыр булган бүгенге уңышыбыз моңа бер адым.
Илнур: Хезмәтебез дә зур булды. Тырышсаң, теләгеңә ирешергә була икән.
Булат: Безгә тимераякка да баса алмаган балалар килә. Шуарга өйрәтергә генә кимендә 4 ел вакыт китә. Тактик уеннарга өйрәтү өчен күпме кирәк? Бу җыелма команда составына 7–8 яшьтән килгәннәр керде.
Илнур: Илфат Шакиров 6–7 яшендә бозга басса, улым Зөлфәткә 4 яшь ярым гына иде.
—Ә сез үзегез нәкъ менә хоккейга игътибарыгызны ничек һәм кайчан юнәтергә булдыгыз?
Булат: Мин үзем Арчадан, югары белемле физкультура укытучысы. Юллама буенча Утар Аты мәктәбенә эшкә килгәч, хоккей белән кызыксына башладым. Аннан тренер итеп Арча спорт мәктәбенә алдылар. Республикада районнар хоккей командаларына игътибар зур. Федерация даими рәвештә укулар үткәрә. Әле яңа гына Универсиада шәһәрчегендә укып кайттык. Практик дәресләрне “Татнефть–Арена”да “Ак Барс” клубы тренерлары үткәрде.
Илнур: Мин 7 яшьтән тимераякта. Хоккейны бик яратам. Әле дә районның ветераннар командасы составында уйныйм. Без дә Кукмарада үткән республика ярышында җиңеп кайттык. Фанат буларак башта бик күп еллар бушка эшләп йөрдем. 4 ел гына рәсми рәвештә тренер. Район яшьләр эшләре, спорт һәм туризм бүлеге җитәкчесе Зиннур Сәгыйтов ярдәме белән Чаллыга укырга кердем. Безнең төбәктә спортның бу төрен олысы да, кечесе дә ярата. Утар Аты, Югары Аты, Субаш Аты авылларында хоккей мәйданчыклары булдырылды. Инвестор Габделхәй Кәримов зур ярдәм күрсәтте. Әти–әниләр дә күтәреп алды.
Булат: Соңгы елларда район җитәкчеләре тарафыннан да хоккейга игътибар артты. Хәзер бездә барлыгы 9 команда (5 ел элек 4–5 кенә иде) бар. Һәрберсендә яхшы хоккей мәйданчыклары. Арчада Боз сарае эшләнеп килүе дә моның ачык мисалы. Аннан инвентарьлар өстәлеп тора, матди–техник база байый. Киемнәр дә җитәрлек.
Илнур: Урамда боз 3–4 айга гына. Яз, көз атнага бер тапкыр автобус белән балаларны Кукмара, Сабага Боз сараена күнегүләргә йөрттек. Хәзер менә үзебездә булачак.
— “Алтын шайба” республика ярышларына хоккейчыларны ничек сайлап алдыгыз?
Булат: Райондагы 9 команда арасында сайлап алу турниры үткәрелде. Җыелма командага 5нче гимназиядән 5 укучыны (Солтан Хәйруллин. Илъяр Бәдриев, Рәнис Гарипов, Илфат Гаптрахманов, Нияз Нәҗипов), Утар Аты мәктәбеннән 3 (Илфат Шакиров, Зөлфәт Абдрахманов, Нияз Исмәгыйлев), Шушмабаштан 2 кешене (Алимас Кәримов, Илгиз Һадиев), 7 нче мәктәптән Илнар Мусинны алдык. Аның тренеры —Айваннан Ирек Шакиров —минем ярдәмчем. Ике бишлек һәм капкачы Рәнис Гарипов. Алар белән гимназия базасында аерым җыелып, тренировкалар үткәрдек.
Илнур: Зур җиңүгә илтүче юл җиңелләрдән булмады. Башта зона ярышларында катнаштык. Балтач белән Теләче командаларын оттык. Икенче төркемгә кергән командалар белән очрашу да безнең файдага тәмамланды. Финал ярышларында да хоккейчыларыбыз көндәшләрендә җиңүгә өмет калдырмады. Хәтта узган ел җиңү яулаган аксубайлыларга да. Рәнис Гарипов “Иң яхшы капкачы” дип танылды, сакчы Илфат Шакиров, һөҗүмчеләр Солтан Хәйруллин, Илъяр Бәдриев, Зөлфәт Абдрахманов бик яхшы уен күрсәттеләр.
Яшь хоккейчыларыбызны зур җиңүләре белән котлыйбыз, киләчәктә тагын да югарырак үрләр яулауларын телибез.
Гөлсинә ЗӘКИЕВА