Картайма әле, авыл

Картайма әле, авыл
Хөкүмәт тарафыннан инвалидларның яшәү шартын җайга салу өчен яңа программалар эшләве куанычлы күренеш.
Яңа Чүриле психоневрологик интернатында да “Уңайлы мохит” программасы нигезендә шактый эшләр башкарылган. Һәр бүлмәдәге бәдрәфкә махсус тотыну җайланмалары куелу гына да ни тора! Инвалид арбасы өчен дә керү–чыгу юллары җайлаштырылган. Арбалылар беренче катта яши. Шунлыктан, үзләре чыгып, җәйләрен авыл урамнарында да рәхәтләнеп йөри. Бүлмәләрдә ортопедик урын–җирдә йоклыйлар, җәйге челләдә салкынча һава өрдерергә җилләткечләр куелган, физик күнегүләр белән шөгыльләнү өчен җиһазлар бар, һәр бүлмәдә заманча зур телевизор эшләп тора. Кирәк чакта табиб–психиатр, үзе үк директор да, Рамил Гарипов Аллаһы Тәгалә бәндәләренә игътибарлы булып, саваплы гамәл кылып яши. Ул гына түгел, биредә хезмәт куючы һәркем шундый. Директор үзе дә бу турыда: “Монда эшләүче һәркемгә рәхмәтле мин”, — ди. Әлеге интернат республикада тирә–юне койма белән әйләндереп алынмаган, авыруларга ирек рөхсәт ителгән бердәнбер йорт. Алай гына да түгел, йөри алган инвалидлар биредә актив тормыш алып бара: кышларын чаңгыга баса, җәен велосипедта җилдерә, еш кына Казанга циркка, Свияжск шәһәренә, Г.Тукай музеена һ.б. сәяхәт кыла, үзешчән сәнгать өлкәсенә килгәндә, үзләренең кунаклар алдында чыгыш ясарлык концерт номерлары бар. Уңышлары да сөендерерлек: бильярд буенча республикада икенче урын алганнар. Шулай ук профессиональ артистлар да еш кунак биредә. Җитәкчелек интернатта яшәүчеләрне җәен хезмәт тәрбиясенә җәлеп итеп тә вакытларын файдалы үткәртергә тырыша. Мондый уңай күренешләрне без Иҗтимагый совет әгъзалары белән Сеҗе авыл җирлегенә баргач күрдек.
Әлеге җирлектә Иҗтимагый советның чираттагы утырышы узды. Дистәдән артык авылны берләштергән җирлек соңгы елларда яңарыш кичерә: яңа төзелешләр сафка баса, элеккеләренә төзекләндерү уздырыла. Әкренләп юлсызлык проблемасы да хәл ителә, 6 авылга асфальтта гына җилдереп барырга мөмкин. Бу яклардагы халык тормышның уңай якка үзгәрүен “Ак барс” агрокомплексы” ширкәте директоры белән авыл җирлеге башлыгының килешеп эшләвендә күрә. “Авыл җире өчен яңа программа гамәлгә керсә, алар шундук аны тормышка ашыру чарасына керешә. Халык мәнфәгатьләрен кайгыртып яшиләр”, — ди ветераннар советының башлангыч оешма җитәкчесе Наилә Динмөхәммәтова.
Җирлектәге зур авылларда социаль биналарның (ФАП, авыл җирлеге идарәсе, элемтә бүлеге, китапханә, мәктәп яки клуб) бер түбә астына берләшүе бигрәк тә өлкәннәр өчен уңай: бер йомышыңны үтәргә килгәндә, калганнарын да хәл итәргә мөмкин. Узган ел республика программасы буенча Курса–Почмак, Яңа Чүриле ФАПлары төзекләндерелгән, ә быел Сеҗе фельдшер–акушерлык пунктының яңарыш кичерүе көтелә. Эчке ягы матурлангач, Курса–Почмаклар ФАПның тышкы ягын да яңартуга өметләнә. Сүз уңаеннан, Яңа Чүриледән Ленар Әхмәтҗанов районда бердәнбер ир–ат фельдшер. Шәфкать иясе авылдашлары белән дә, Чөмә–Елга халкы белән дә уртак тел таба.
Сәнгать өлкәсендә дә актив бу яклар, һәр авылның мәдәният учагында күпсанлы сәнгать түгәрәкләре эшли. “Балалар гына түгел, өлкәннәр дә яратып йөри”, — ди җитәкчелек. Ләкин Курса–Почмакта хәлләр үзгәрәк. Очрашу вакытында халык авыл уртасында кулланылмыйча торган бинаны яңартып, клубка яраклаштыру мәсьәләсен күтәрде.
Сеҗе мәктәбендә 4 авылдан 102 бала укый. Ләкин алдагы елларга укырга керәсе балаларның саны кимүе күзәтелә икән. “Бүгенге көндә күпләрне бер мәсьәлә борчый: авыллар картая. Яшьләр читкә киткәч, авылның нигезен өлкәннәр тәшкил итә. Бу бик аяныч”, — ди Сеҗе авыл җирлеге башлыгы Гөлфия Гыйбадуллина. Шөкер, өлкәннәр мәктәп коллективы, җитәкчелек тарафыннан игътибарсыз калмый. Бөек Җиңүнең 70 еллыгына җирлектәге авылларда яшәүче сугыш һәм тыл ветераннарын, сугыш чоры балаларын барлау мәктәп коллективларына йөкләнгән. Балалар каһарман авылдашлары белән әңгәмә корып, истәлекләрен язып калырга ашыга. Утырышта ветеран Илдус Сәгъдиев: “Сугышта хәбәрсез югалганнарның исемнәрен ачыклап бетерү максатыннан эзләнү эшләре дәвам итәргә тиеш”, — дигән тәкъдим белән чыкты.
Йомгаклау өлешендә социаль өлкә буенча җаваплы хезмәткәрләрнең, совет әгъзаларының чыгышлары тыңланды һәм күргәннәрдән чыгып, Иҗтимагый совет киләчәктә район хакимияте белән бергәләп эшләү, килеп туган мәсьәләне бергәләп хәл итү турында карар кабул итте.
Розалия ЗИННӘТОВА