Күңел җылысын биреп

Күңел җылысын биреп
Иске Чүриле фермасы мөдире Фоат Хөснетдинов кайчан килсәң дә эш урынында булыр. Армиядән кайтканнан бирле шушы хезмәттә инде ул. Быел 25 ел тула икән.
— Әлеге ферма узган ел нәтиҗәләре буенча иң алда, — ди хуҗалык җитәкчесе Рүзәл Мәрдәнов. —Гомумән, хуҗалык буенча үсеш бар.
Маллар март кояшы астында рәхәтләнеп утарда йөри. Алларында кукуруз силосы, утар уртасында салам өемнәре. Фураж белән кыенгарак туры килсә дә, башка төр азыкларга муллык.
— Иртәнге бишенче яртыда миңа иң беренче булып Альбина шалтырата, — ди ферма мөдире. Альбина Галәвиева бозаулату бүлегендә эшли.
— Мин фермага сәгать дүрттә киләм, — дип сүзгә кушыла ул. — Шулай итмәгәндә өлгереп булмый.
Бозаулату бүлегенә керүгә иң башта чисталыкка игътибар итәсең. Илледән артык сыер — бар да ялт иткән!
— Бирегә керткәндә төрлесе була, — ди мөдир. — Альбина сыер савучыларның кайберләрен тәнкыйтьләп тә ала. Һәр сыерны әйбәтләп юа, тәртип ярата ул.
Әлеге бүлектә үзенә күрә бер рәхәтлек хөкем сөрә. Сыерлар алдында сыйфатлы болын печәне, бозаулар туганнан соң атна буе угыз имә, кадер–хөрмәттә яши.
Альбинаның ышанычлы ярдәмчесе бар. Ире Фидаилнең өлгерлегенә искитәрлек, үзе дә таналар карый, Альбинага да булыша, Коркачыкка барып сменалы эштә эшләп кайта.
Хуҗалык буенча узган ел 1213 бозау алынган, 2012 елдагыга караганда йөзгә артык. Иске Чүриле фермасында озак еллар ясалма орлыкландыру технигы булып эшләүче Гайсә Исмәгыйлев, хуҗалыкның ветеринария табибы Бәхтияр Мадиримов, алыштыргысыз зоотехник Илдус Сабиров, бозау караучы Резеда Исмәгыйлева, сыер савучы Евгения Романова һәм башка бик күпләрнең хезмәте мактаулы.
2014 елның ике айлык нәтиҗәләренә күз салсак, “Игенче”, “Аю”, “Татарстан”, “АгроМолПлюс”, “Северный” хуҗалыклары мөгезле эре терлекләрнең баш санын арттыруга иреште. “Игенче”, “Ак барс” агрокомплексы”, “АгроМолПлюс”, “Ватан”, “Курса МТСы”, “Татарстан” ширкәтләрендә сөт җитештерү артты.
12 мартта Кукмарада терлекчелек буенча нәсел хуҗалыклары булып саналган хуҗалыклар җитәкчеләре, белгечләре белән үткәрелгән киңәшмәдә әйтелгәнчә, тиешле таләпләргә җавап бирмәгәндә бу исемлектән төшереп калдырачаклар. Безнең районнан бу исемлектә йөрүчеләр — “Игенче”, “Кырлай”, “Ак барс” агрокомплексы”, “Северный”, “Ватан”, “Арча”, “Акчишмә” ширкәтләре. Ә таләпләр гади — продукция җитештерү, бозау алу үсештә булырга, токым сакланырга тиеш.
Ильяс ФӘТТАХОВ