Коррупциягә каршы семинар–уку

20 мартта Питрәчтә “Власть органнары, массакүләм мәгълүмат чаралары һәм гражданлык җәмәгатьчелеге институтларының коррупциягә каршы торуда үзара хезмәттәш-леге” дигән темага семинар–уку үткәрелде. Анда Татарстан Республикасы Президентының коррупциягә каршы сәясәт Идарәсе вәкилләре, Арча, Әтнә, Балтач, Кукмара, Саба, Теләче, Питрәч, Биектау, Яшел Үзән районнары массакүләм мәгълүмат чаралары, әлеге районнарның коррупциягә каршы комиссияләре җитәкчеләре катнашты.
Әлеге чараны Матбугат һәм массакүләм коммуникацияләр буенча республика агентлыгының массакүләм мәгълүмат чаралары белән эшләү буенча Идарә җи-тәкчесе Марсель Гыйльмиев алып барды.

V кышкы спорт уеннары узды
22 мартта районның предприятие, оешма һәм учреждениеләре җаваплы хезмәткәрләре арасында V кышкы спорт уеннары узды. 8 төр буенча көч сынашкан 10 команда арасында беренче урынны район мәгариф идарәсе яулады. Икенче — район яшьләр эшләре, спорт һәм туризм бүлеге, өченче урында районның төзелеш оешмалары.
Ярышларда “Арча хәбәрләре” газетасы редакциясе, “Арча” телерадиокомпаниясе, ТР Дәүләт алкоголь инспекциясенең Арча территориаль органы “Бердәм Россия” партиясенең җирле бүлекчәсе берләштерелгән командасы да катнашты.

Бокс буенча ярышлар Арчада узачак
25 марттан 29ына кадәр “Арча” спорт комплексында бокс буенча 2000–2001 елгы яшүсмерләр һәм кызлар арасында ”Динамо” Балалар фонды призына ТР “Динамо” физкультура–спорт иҗтимагый–дәүләт оешмасы беренчелегенә ярышлар булачак. Ярышларда Татарстаннан гына түгел, Россиянең 10 төбәгеннән спортчылар катнашуы көтелә. Ачылу тантанасы 26 мартта 14 сәгатьтә була.

Хәбәр ит, үлемне кайда саталар!
17 мартта Татарстанда “Хәбәр ит, үлемне кайда саталар!” дигән Бөтенроссия наркотикларга каршы акция башланды. Ул 2007 елдан Наркотикларга контроль идарәсе тарафыннан язын һәм көзен үткәрелә. Акциянең максаты — халыкның игътибарын наркомания һәм наркотикларны законсыз рәвештә тарату проблемасына җәлеп итү, җәмәгатьчелек һәм наркотикларга контроль органнары көчен берләштерү, катлаулы хәлдә калган кешеләргә бушлай киңәшләр бирү. Һәркем (8 843) 273–43–45 ышаныч телефонына шалтырата ала. Мәгълүматларны яки кызыксындырган сорауларны идарәнең сайтына да (http://ufskn.tatar.ru) урнаштырырга мөмкин.