Язны каршы алды халык

Нәүрүз бәйрәме төрки һәм мөселман халыклары арасында таралган милли бәйрәм. Җир шарында Нәүрүзнең 1500–1700 еллык тарихы бар. Безнең борынгы әби–бабаларыбыз да көн белән төн тигезләшкәндә була торган бу бәйрәмне Яңа ел буларак зурлап билгеләп үткән. Әзәрбайҗан, Казахстан, Кыргызстан кебек төрки илләрдә ул әле дә шул олы мәгънәсен югалтмый.
—Мин Таҗикстанның Дүшәмбе шәһәреннән, — ди 7нче мәктәпнең 6 сыйныф укучысы Мөхәммәт Сабуров. — Бездә Нәүрүз зур бәйрәм. Ул көнне бар кеше шәһәрнең билгеле бер урынына җыела. Артистлар чыгыш ясый, уеннар, җырлар, биюләр, күңел ачулар көне буена бара.
Соңгы вакытта бездә дә ул кышны озату, язны каршы алу буларак билгеләп үтелә башлады. Узган шимбәдә Арча станциясендәге мәдәни–спорт үзәгендә Нәүрүз бәйрәме оештырылды. Анда Арчаның икенче, дүртенче, җиденче мәктәп укучылары башлап йөрде. Өлкән буын традициясен яшьләр күтәреп алу бу гореф–гадәт-нең үткәне булган кебек, киләчәге дә барлыгын күрсәтә.
Бәйрәмне кырык тартмачылар ачып җибәрде, халыкны күңел ачарга чакырды. Аннан уеннар башланды. Балалар рәхәтләнде. Әтәч булып та “сугыштылар”, бау да тартыштылар, гер дә күтәрергә тырыштылар, чүлмәк тә ваттылар, озынлыкка себеркеләр дә ыргыттылар. Кечерәкләр әле эреп бетәргә өлгермәгән кар тавы тирәсендә мәш килде. Аннан барысы бергә җыелып биеделәр. 4нче мәктәп укучылары кул эшләре күргәзмәсе дә оештырган иде.
—Технология укытучылары Әминә Нәбиуллина яр-дәмендә алар чигәргә, тегәргә, бәйләргә өйрәнә. Укучылар сараеннан килеп тә төрле кул эшләренә өйрәтәләр,—диде татар теле һәм әдәбияты укытучысы Гөлчәчәк Мифтахова, Фәндүс Исмәгыйлев, Зилә Гарипова, Диана Гайфуллина, Дилә Хәйретдинова, Азалия Габделхакова, Ралина Хәкимова иҗатларына күрсәтеп.
7нче мәктәп укучылары бик матур концерт әзерләгән. Гадел Гильдеев, Лаура Саркисян, Эльза Минашаева, Илүзә Баһаветдинова һәм башкаларның чыгышларын бәйрәмгә килгән өлкәннәр дә ошатты. Нәкъ сәгать 12дә Нәүрүз бәйрәме гармунчылар Илфат Әскәров, Фирдүс Ганиев, Әнәс Ганиев чыгышы белән башланды. Аннан Дамир хәзрәт чыгыш ясап, хәер–фатыйхасын бирде.
—Нәүрүз яңа ел килүен, яз башлануын белдерә. Бер казаннан ботка ашап, көннәребезгә иминлек, җирләребезгә уңдырышлылык, тәннәребезгә сихәтлек, балаларыбызга тәүфыйклылык телик,—диде ул, изге теләкләрен җиткереп.
Бәйрәмгә килгән яз гүзәле Нәүрүзбикә искиткеч чибәр иде. Дилбегәсен кулыннан ычкындырырга теләмәгән Кыш бабай да аның җылы, ягымлы карашына түзмәде. Дөрес, ярышка чакырып, “бил алышырга” тырышып карады, тик кая ул яшьлек дәрте, яз яме балкып торган гүзәлгә каршы тора алсын.
Ул көнне яз бәйрәме озак барды. Барлык гореф–гадәтләргә туры китереп ботка да ашадылар, коймак белән чәй дә эчтеләр. Азалия Гыйниятова, балалар вокаль ансамбле (Алина Шиһабиева), Фирдүс Ганиев, Лилия Шакирҗанова, Илфат Әскәров, Фазилә Мөхәммәтшина, Дамир Вәлиев башкаруында җырлар, күңелле, дәртле биюләр (Альбина Гомәрова җитәкләгән бию төркеме) тирә–юньне яңгыратты. Мәдәни–спорт үзәгенең сәнгать җитәкчесе Илмира Фазылҗанова оештырган Нәүрүз бәйрәмен үзәк җитәкчесе Марат Котдусов изге теләкләре белән тәмамлады. Нәүрүз мөбарәк булсын!
Гөлсинә ЗӘКИЕВА