34 ел “стажлы” йорт үзгәреш кичерә

34 ел “стажлы” йорт үзгәреш кичерә
Ныклап төзекләндерелгән йортлар матурлыгы, чисталыгы белән әллә каян күзгә ташланып тора. Искегә тимә, исең китәр, ди халык мәкале. Моны да ике мәгънәдә аңларга була икән. Чыннан да, исең китәрлек үзгәреш кичерә бу биналар.
Узган ел районда 8 йортны матурлап куйсалар, быел 6 йорт ныклап төзекләндереләчәк.
Южная урамы, 24а, Борһанов урамы, 12нче йортларда “Водоканал–Сервис”, Маршал Жуков урамы, 3, 7а, Күпер урамы, 19, Тимер юл урамы, 36нчы йортларда “Энергосервис” ширкәтләре төзекләндерү эшләре алып барачак.
Беркөн редакциягә лаеклы ялдагы хезмәттәшебез Римма Надершина шалтыратты.
—Безнең йортта ныклап төзек-ләндерү бара. Нинди салкыннар, бураннар, җилле көннәрдә дә туктап тормады егетләр, безнең теләк-ләрне дә искә алдылар, киңәшләргә дә колак салдылар. Араларында яшьләре дә, өлкәннәре дә бар. Бер–берсе белән аралашып, аңлашып, киңәшләшеп тыныч кына эшләделәр. Аларга рәхмәттән башка бер сүзебез юк. Хезмәт хаклары да артык күп түгелдер. Әмма озын акча артыннан читкә китмәгәннәр, Арчабызны матурлау өстендә эшлиләр. Шуның белән кешегә бәхет тә өләшәләр. Менә ул бүгенге көн геройлары,—диде ул үзенең фикерләрен җиткереп.
Менә без Борһанов урамы, 12нче йортта. Көн бик җилле, кеше юктыр, дисәк, кая ул, тулы көченә эш бара.
—Егетләр салкын көннәрдә дә туктап тормады. Моннан 10 ел элек йорт түбәсенә шифер ябылган булган. Наил Галиәхмәтов җитәкчелегендәге бригада шуны калайга алыштырды. Балкон түбәләре дә тигезләп бер түбә астына кертелде, кыйммәт булса да, яхшы булсын дип, морҗа урынына чит ил технологиясе белән эшләнгән сэндвич торбалар урнаштырылды. Су торбалары алыштырылды, яңа исәпкә алу приборлары куелды. Егетләр йортның тышкы ягын да матурлады. Башта җылыткыч материал, аннан калай сайдинг белән стеналарын тышладылар,—ди мастер Зөлфәт Кәримов.
Наил Галиәхмәтов җитәкчелегендәге түбә ябучылар Алмаз Мингалимов, Рафил Бакыев, Вилдан Фазылҗанов, Фәһим Гайнетдинов, балта осталары Рөстәм Галимҗанов, Әнәс Фәйзиев, Радик Газизов, Тәбрис Гарипов, столярлар Илсур Габделхаков, Илсур Галиәхмәтов—бар да хезмәтләренә җаваплы карап, бөтен нечкәлекләрен исәпкә алып, сыйфатлы итеп башкаруга игътибар биргәннәр.
Йорт стенасын тышлауны Азат Мортазин, Раушан Касыймов (ул бу эштә тәҗрибәле, берничә йорт тышлаган инде), Рәмис Хәбибрахманов, Радик Мөхәммәдиев, Тәлгать Әхмәтҗанов оста һәм төгәл башкарган. Шул ук вакыттта тәрәзә кырыйлары, кәрнизләр дә матурланган. 34 ел элек төзелеп, бер тапкыр да төзекләндерелмәгән йорт “Водоканал–Сервис” ширкәте коллективы тырышлыгы белән хәзер ерактан ук матур булып балкып тора.
—Моның белән генә эш бетми әле,—диде Зөлфәт Кәримов.—Көннәр ямьләнгәч нигез кырыйлары ныгытылачак, су кертеләчәк, канализация эшләнәчәк. Ике подъезд эче дә төзекләндереләчәк. Алар штукатурланып буялачак, электр чыбыклары алышыначак, электр приборлары өчен яңа шкафлар куелачак.
Быел ныклап төзекләндерү өчен “Водоканал–Сервис” ширкәтенә ике йорт бирелгән. Бу йорттан соң Арча станциясендәге (Южная, 24а) ике катлы кирпеч йортта эш башланган. Анда да, беренче чиратта, түбә алышыначак һәм йорт стенасы тышланачак.
Гөлсинә ЗӘКИЕВА