Безнекеләр “Йолдызлык”ның суперфиналында

Безнекеләр “Йолдызлык”ның суперфиналында
24–25 мартта Теләчедә эстрада сәнгатенең “Созвездие–Йолдызлык—2014” XIV республика телевизион фестиваленең зона этабы булды. Арчадан беренче урыннарны “Ар–и–Эль” бию төркеме (хореография) һәм Марат Мәгъсүмов (конферанс) яулады. Илүзә Галимуллина, Мөнир Мәрдәнов, Гүзәл Закирова (вокал), Инсаф Гаптелбәров (конферанс) номинацияләрендә икенче булдылар. Инсаф вокал буенча да уңышлы чыгыш ясады һәм призлы өченче урынга чыкты. Вокал номинациясендә чыгыш ясаган Данил Закировка махсус бүләк тапшырылды. Зона бәйгесендә беренче–өченче урыннарны яулаганнар 14–17 апрельдә Казанда “УНИКС” мәдәни–спорт комплексында үтәчәк суперфиналда чыгыш ясаячак.

“Сабын күбекләре” тамашасын балалар яратты
2013 елның март аеннан Татарстан Республикасы буенча Эчке эшләр министрлыгы Яңа Кенәр интернат–мәктәбенә шефлык ярдәме күрсәтә. Ел дәвамында анда тәрбияләнүчеләр өчен төрле чаралар үткәрелгән. Монда Россия Эчке эшләр министрлыгының Арча районы буенча бүлеге хезмәте дә зур. Күптән түгел интернат–мәктәптә бүлек хезмәткәрләре мәдәни–күңел ачу программасы оештырган. Балаларга “Сабын күбекләре” тамашасы бик ошаган.

“Тормышның кечкенә шатлыклары”акциясе
Арчаның 7нче мәктәбендә наркотикларга каршы көрәш буенча “Тормышның кечкенә шатлыклары” дигән акция узган. Максаты—укучыларның “Мөстәкыйль балалар” (“SMS дети”) проектына игътибарын юнәлтү, проектта катнашучыларның наркотикларга каршы актив гражданлык позициясен ныгыту.
Шушы уңайдан мәктәптә проектта катнашучылар белән очрашу оештырылган. Әңгәмә барышында алар балаларга “Тормышның кечкенә шатлыклары” дигән тема астында “Мөстәкыйль балалар” проекты турында сөйләгәннәр, истәлеккә буклетлар бүләк иткәннәр, флеш–моб оештырганнар. Бу хакта безгә Арча 7нче мәктәбе җитәкчесенең тәрбия эшләре буенча урынбасары, “Мөстәкыйль балалар” проекты җитәкчесе Ләйсән Вәлиева хәбәр итте.

Гөлүсә бишенче тапкыр Россия чемпионы!
Түбән Тагил шәһәрендә 1998–1999 елларда туган кызлар арасында бокс буенча Россия беренчелегенә ярышлар булды. Анда 1нче мәктәптә укучы, Арча спорт мәктәбендә шөгыльләнүче, спорт мастерлыгына кандидат Гөлүсә Галиева да катнашты. Тренеры — Марат Галиев. Гөлүсә үз авырлык үлчәвендә Россиянең бишенче тапкыр чемпионы булды һәм спорт мастерлыгы нормаларын үтәде. Ул Италиядә Европа беренчелегенә үткәреләчәк ярышларда катнашачак.

Гөберчәктә Нәүрүзбикәне каршы алдылар
Бу көннәрдә районыбызда Нәүрүзбикәне каршы алу йолалары башкарыла. Гөберчәктә дә әлеге бәйрәмне күрше–тирә авыллар белән бергәләп зурлап бәйрәм иттеләр. Бәйрәмнең иң күңелле мизгеле —казан асып пешерелгән “Карга боткасы”ннан авыз итү, кайнар коймак белән чәй эчү булгандыр, мөгаен. Уен–көлке, җыр–бию һәм төрле уеннар белән аралаштырып барган бәйрәм авыл халкына гына түгел, кунакка кайткан якташлар күңелендә озак сакланырлык мизгелләрен бүләк итте.

Фотоконкурс
Арча Укучылар сарае 1–11нче сыйныф укучылары арасында “Тормыш матур” (“Жизнь прекрасна”) исеме астында фотоконкурс игълан итә. Хезмәтләр 15 марттан кабул ителә башлады.