Авыл җирлеге халыкны кайгыртып яши

Авыл җирлеге халыкны кайгыртып яши
Иске Кырлай авыл җирлегенә “Авыл көне”нә килүчеләрне Иске Кырлай төп гомуми белем мәктәбе коллективы капкадан ук Нәүрүз бәйрәменә багышланган күренеш белән каршы алды. Әлеге бәйрәмдә җырларны, күмәк уеннарны бергәләп башкарганнан соң, “Карга боткасы”ннан авыз итеп, карачкы яндыруга да шаһит булды кунаклар.
Җирлектә “Авыл көне” белән бергә авыл җирлекләренең эш-чәнлегендәге мөһим мәсьә-ләләр буенча киңәшмә дә узды. Һәр очрашу, тикшерү, киңәшмә — ул сабак. Соңгы вакытта район хакимияте белән авыл җирлекләре арасында мәгълүматларны алыш–биреш ясау, яңалыклар белешү электрон челтәр аша барса да, тәҗрибә уртаклашуның кулай ысулы булып һаман да күзгә–күз карап аралашу кала бирә.
— Нәкъ менә шуңа басым ясап җыелышабыз, — ди киңәшмәне алып барган район башлыгы урынбасары Любовь Осина. — Иске Кырлай авыл җирлегенә җыелуыбызның сәбәбе — җирлекнең үрнәк итеп күрсәтерлек хезмәтләре. Сәркатип Раушания Абдуллинаны коллегалары, аеруча яшьләр белән тәҗрибә уртаклашырлык эше бар,— дип бәяләде.
Вакыт тизләнеше һәр яңалыктан хәбәрдар булуны, замана белән бергә атлауны, белемеңне камилләштерүне таләп итә. Авыл җирлекләре дә халыкның гозерен тиз арада хәл итәргә тырыша: компьютердагы яңа программа нигезендә белешмә берничә минут эчендә әзерләнеп бирелә, хуҗалык кенәгәләрендәге мәгълүматларны да хәзер компьютерны ачып кына карарга мөмкин. Халык мәнфәгатьләрен кайгырту, тормышта уңайлы шартлар тудыру, кәгазь мәшәкатьләреннән арындыру максатыннан төрле органнар белән электрон бәйләнеш булдырылу, ике атна эчендә халыкның гозерен канәгатьләндерү турында Федераль кадастр палатасының Арча бүлеге җитәкчесе Нияз Галәвиев аңлатты. Киләчәктә авыл җирлегенә килеп, башка инстанцияләрдән үзеңә кирәкле белешмәне җирлек аша гына да соратып алып булачак.
Авылларда хуҗасыз, исәпкә алынмаган биналар күп. Нәтиҗәдә, район бюджетына тиешле салым керми. Өстәвенә, бина җимерек хәлдә булып янгын куркынычы тудырырга да мөмкин. Шунлыктан, аларны күзәтүгә алып, хуҗаларын табып теркәү уздырып бетерүне, җаваплыларны табуны тизләтергә кирәклеген әйтте районның җир һәм милек мөнәсәбәтләре палатасы рәисе Камил Гомәров. Мәчетләрне теркәүгә килгәндә, һәммәсенең кадастр паспортлары эшләнгән, җир һәм мөлкәтне теркәү чыгымнарын күтәрү өчен иганәчеләрнең ярдәме кирәк.
Һәр көнне башкара торган хезмәт булса да, документлар тутыруда, аларның әйләнешендә дә үзгәрешләр еш булып тора. Район хакимиятенең гомуми оештыру бүлеге вәкилләре хезмәт эшчәнлеген оештыру, документларны тиешле дәрәҗәдә төгәллек белән алып барудагы мөһим кагыйдәләрне аңлатты.
Сентябрьдә сайлаулар көтелә. Киңәшмәдә аңа әзерлекне бүгеннән үк башлау турында сүз булды.
8 авылны берләштерүче Иске Кырлай авыл җирлеге районда зур җирлекләрнең берсе санала. Башлыгы Фәргать Сираҗетдинов халык мәнфәгатьләрен кайгыртуда бар көчен куеп эшли. Әнә шуңа күрә аның башкаларга үрнәк булырлыгы бар.
Розалия ЗИННӘТОВА