Наласа егете — Россия чемпионы

Наласа егете — Россия чемпионы
Фаяз кечкенәдән Наласа урта мәктәбенең көрәш түгәрәгенә йөреп үскән егет. Тренеры Таһир Лотфуллин, өч дистә елдан артык яшүсмерләргә татарча көрәш серләрен өйрәтеп, егетләрнең кыю, сәламәт, нык булып үсүләренә күп тырышлык куя. Фаязның әтисе Айрат Зариповны да көрәшергә өйрәткән ул. Үзвакытында әтисе дә район күләмендә танылган көрәшче, күп тапкыр Сабантуй батыры булып калды. Бүген ул улына үзе үткән көрәш юлының нечкәлекләрен өйрәтә.
9 сыйныфта гына укыса да, Фаязның яулаган уңышлары шактый, республика күләмендә татарча көрәш дөньясында үзен танытырга өлгерде.
Моннан тыш, көчен кул көрәшендә дә сынап карарга ярата. Узган ел Актанышта узган 1997–1999 елгы яшүсмерләр арасында ТР беренче Президенты кубогына уздырылган милли татар–башкорт спорт бәйгесендә өченче урынны яулаган булса, кул көрәшендә Татарстан Республикасы чемпионы дәрәҗәсенә ирешә. Ә быел февральдә Биектауда Татарстан беренчелегенә милли көрәш буенча ярышларда 1998–1999 елгы үсмерләр арасында беренче урын алып, Россия чемпионатына юлламага лаек булды. Һәм, ниһаять, 24 мартта, Свердловск өлкәсенең Красноуфимск шәһәрендә узган ярышта Татарстан җыелма командасы составында катнашып, Россия чемпионы булды.
Яшьтәшләреннән төпле фикере, дөньяга үзенчә карашы белән аерылып торучы егет җыр–моңга да сәләтле икән, авылда, мәктәптә узган концертларда моңлы тавышы белән тамашачы күңелен яулый, ди укытучылары. Тырышып укый, җәмәгать эшләрендә актив катнаша егет. Үзе гел хәрәкәттә булганга, яшьтәшләренә дә теләге изге: “Тырышып укысыннар, спорт белән даими шөгыльләнсеннәр”, — ди. Хыялы—нинди генә һөнәр иясе булса да, көрәшне юлдаш итеп яшәү. Киләчәктә якташыбыз Фаяз Зариповның тагын да биегрәк үрләр яулавын ишетеп күп тапкырлар горурланырбыз әле. Уңышлар сиңа, Фаяз!
Розалия ЗИННӘТОВА