Концерт “җитми калды”

Концерт “җитми калды”
“Газиз Арчам! Даның зурдыр, юлың туры, сиңа багышлана ул–кызларың җыры!” дигән исем астында узган атнада район мәктәпләре чыгышы дәвам итте. Бу юлы район Мәдәният йорты сәхнәсенә Арчаның 5нче гимназиясе һәм 7нче мәктәп укытучылары чыкты.
Бу сәнгать өлкәсендә дә көчле коллективларның концерты да көчле буласын алдан ук сизеп бардым. Һәм ялгышмадым. Концертның беренче минутыннан моң дөньясына кереп чумдым. Концерт бетте, тик...җитми калды. Һәр чыгыш җентекләп уйланган, бөртекләп эшкәртелгән. Болай да эшкә кереп чумган укытучыларның юк вакытларын бар итеп шундый чыгышлар әзерләвенә сокланып утырдым. Мәктәптәгечә бәя куярга кушсалар, ике коллективның да чыгышына 5ле куяр идем. Ә инде аерым номерларга килгәндә...
Беренче булып сәхнәгә 5нче гимназия укытучылары чыкты. Концерт халык музыка уен кораллары ансамбле чыгышы белән башланып китте. Аны фольклор күренеш алыштырды. Алар күрсәткән “Нәүрүз” бәйрәме бик күңелле чыкты. Ул көнне Арча сәхнәсенә укытучылар Ләлә Ибраһимова, Алсу Галәвиева, чыгарылыш сыйныф укучысы Сөмбел Заһидуллина яраткан җырлары белән чыкты, кызлар вокаль ансамбле дә матур чыгыш ясады, дәртле биюләр дә тамашачы күңелен яулады, алкышларга лаек булды. Гимназиянең горурлыгы булган ветераннар чыгышы һәркем күңелендә ихтирамга лаек кешеләргә карата соклану хисе уятты.
7нче мәктәп чыгышы үзенчәлеге белән аерылып торды. Аның шулай буласын алдан ук тойдым. Чөнки җитәкчесе Альмира Гатауллина фантазиягә бай, һәр нәрсәне энәсеннән җебенә кадәр җиренә җиткереп эшли, үзе дә башыннан ахырына кадәр шул дөньяда кайный. Ә концертның үзенчәлеге шунда, аны Туфан Миңнуллинның “Әлдермештән Әлмәндәр” геройлары кызыклы итеп “алып барды”. Халык музыка уен кораллары, вокаль ансамбльләре чыгышлары, Рәдиф Исмәгыйлев, Фидалия Мөхәммәтҗанова, хезмәт ветераны Татьяна Ибалакова, мәктәп директоры Альмира Гатауллинаның җырлаулары, рус халык биюе бик уңышлы чыкты. Скетчны тамашачы көчле алкышлар белән бәяләде, “Каз канаты сату” фольклор күренешен дә Арча халкы бик яратты.
Гөлсинә ЗИННӘТОВА