Мәктәп китапханәчеләре дә ярышып эшли

Мәктәп китапханәчеләре дә ярышып эшли
Узган атнада Арчаның 1нче мәктәбендә “Педагог–китапханәче —2014” республика конкурсының зона этабы узды. Сайлап алу турында 6 районнан иң көчле, тырыш, белемле мәктәп китапханәчеләре ике көн дәвамында көч сынашты.
“Ел укытучысы — 2014” кысаларында узучы бәйге китапханәче һөнәренең асылын ачу, мәгариф системасында аларның эшчәнлеген үстерү, мәктәп китапханәләрендә мәдәни–мәгариф, информацион–техник программалар һәм проектлар кулланып иҗади эшләүче педагог–китапханәчеләрне барлау максатыннан үткәрелә.
Бәйгедә безнең районнан Илсөя Гыйләҗетдинова (Арчаның 1нче мәктәбе), Елена Ганиева (5нче гимназия), Гөлназ Нәбиуллина (Түбән Мәтәскә мәктәбе) катнашып, эш тәҗрибәләрен башка районнан килүчеләргә дә күрсәтүгә иреште.
Елена Ганиева гимназиядә бер елга якын гына эшләсә дә (аңарчы Арча педагогика көллиятендә эшләгән), шул ара эчендә балалар белән уртак тел табып, үзенең кызыклы эш алымнары белән укучыларны гына түгел, укытучылар коллективының да ихтирамын яулаган. Балаларның белемен арттыру өстендә күп эш башкара. Танылган шәхес, язучыларның туган көннәрен, бәйрәмнәрне зур күргәзмә әсбаплар белән каршы ала, гимназиягә хат ташучы чакыртып, газета–журналларга язылуны оештыра. Узган ел китапханәгә китап тапшыру акциясен оештырганнар. 100дән артык китап тапшыручы укучы булган. Димәк, укучыларга уку өчен әдәбият тагын да күбәйгән. Китапханәгә газета–журналлар да күп килә һәм балалар политинформация өчен мәгълүматны шунда туплый. “Үз эшенең остасы ул, — ди гимназиянең директор урынбасары Илфира Вәлиева. — Балалар белән һәр очрашудан бәйрәм ясарга тырыша. Хезмәтен бик яратып башкара”.
Хезмәтенә чын күңелдән бирелгәннәргә уңыш елмая. Түбән Мәтәскә мәктәбеннән Гөлназ Нәбиуллина да тырышлыгы нәтиҗәсендә авыл мәктәпләре арасында әлеге бәйгедә катнашу бәхетенә ирешкән. “Бездә китаплар саны Арча мәктәпләре белән чагыштырганда азрак булса да, балаларга кирәклесен башка мәктәпләрдән, китапханә-ләрдән алып кайтабыз. Шәһәр мәктәпләрендә китапханәләр өчен аерым бүлмәләр бар. Мәктәбебездә төзекләндерү эшләре тәмамланганда бездә дә махсус бүлмә булыр дип өметләнәбез”, — ди педагог–китапханәче. Гөлназ Рәниф кызы китапханәче булу белән бергә балаларга татар теле һәм әдәбияты дәресләрен дә укыта. Һәм бу аңа иҗади кичәләр, “Китап”, “Туган тел” көннәре уздыру, шулай ук балаларда китапка карата кызыксыну уяту өчен бик уңайлы.
Бәйгедә китапханәчеләр, коллегаларына хезмәтләрен-дәге кызыксындырырлык ысулларны кулланып, мәктәп китапханәсенең эшен ачып бирүче осталык–классы тәкъдим итте.
Мәртәбәле жюри арадан иң яхшыларын баллар куеп, рейтинг ярдәмендә сайлап алачак. Җиңүчеләр бу атна азагында билгеле була. Апрель аенда узачак республика бәйгесендә 8 зонадан 15 педагог–китапханәченең көч сынашуы көтелә.
Розалия ЗИННӘТОВА