Биологик ысул файдалырак

Биологик ысул файдалырак
27 мартта Арчада Россия төбәкләрендә урнашкан авыл хуҗалыгы үзәге филиаллары җитәкчеләренең семинар–киңәшмәсе булды.
Россиянең 41 төбәге вәкилләре башта Арча шәһәренең тарихы белән танышты, шәһәрне карап үтте. Соңыннан, үзләре әйтүенчә, алар шәһәребезне күреп таң калган.
Киңәшмә Россия авыл хуҗалыгы үзәгенең Арча районы бүлегендә үтте. Аның теоретик өлеше алдагы көнне Казан шәһәрендә узган иде. Төп тема — үсемлекләрне тәрбия-ләү һәм саклау өлкәсендә биологик ысулларның роле һәм киләчәге.
Билгеле булганча, соңгы елларда үсемлекләрне саклауда биологик ысулларга өстенлек бирелә. Бу ысул табигатькә һәм кешеләргә зыян китермичә, табигатьнең үзендә булган матдәләр нигезендә җитештерелгән препаратлар кулланып үсемлекләр-не авырулардан, корткыч бөҗәкләрдән саклауны күздә тота. Биологик препаратлар куллану икътисадый яктан да отышлы. Белгечләр әлеге очрашуда нәкъ менә шул турыда фикер алышты.
Югары дәрәҗәдәге кунакларның Арчада җыелуы очраклы хәл түгел. Район бүлеге республикада алдынгы урынны алып тора.
Бүлектә, башка районнардан аермалы буларак, үсемлекләрне саклау буенча махсус кабинет булдырылган. Анда үсемлекләрне тәрбияләү һәм саклау мәсьәләләре буенча килеп туган барлык сорауларга да җавап табып була.
— Әлеге бүлмәне булдыруда һәм җиһазлауда баш агроном Әхмәт Хәкимҗановның роле зур, — ди бүлек җитәкчесе Рүзәл Мортазин.
Бүлек җитәкчесе Рүзәл Мортазин үзләренең эшчәнлекләре белән таныштырды, күпсанлы сорауларга тулы җавап бирде. Безнең районда биологик препаратлар куллану буенча “Ак барс” агрокомплексы” нәтиҗәле эш алып бара. Әлеге хуҗалык җитәкчесе Шәйдулла Сәлахов та, баш агроном Рөстәм Мөхәммәдиев тә югары уңыш алуда биологик препаратларның йогынтысы зур булуын билгеләп үттеләр.
Ильяс ФӘТТАХОВ