Тәрәзәңне ачык калдырма

Тәрәзәңне ачык калдырма
Тумышы белән Әрмәнстаннан, Арчада яшәүче, Яңа Чүриледә вакытлыча теркәлгән Артак Арабян кичке сәгать 8ләр тирәсендә, караңгылыктан һәм кеше юклыктан файдаланып, “Җәмәгать туклануы” ширкәте кондитер цехының азрак ачык торган тәрәзәсеннән эчкә үтә.
Максаты — урлашу. Бу хәл 2013 елның 28 декабрендә була. Бикле ишекне бәреп ачып, 1нче кулинария кибетенең сәүдә залына керә. Аннан ул 2903 сумлык әйберне пакетларга тутыра. Аракы, шәраб, сигарет, 350 сум акча, хәтта тортка кадәр ала! Әмма угры урланган әйберләренең рәхәтен генә күрә алмый. Аны шунда ук полиция хезмәткәрләре эләктерә.
Суд булды. А.Арабян өч елга шартлы рәвештә хөкем ителде.

Караклар йокламый

Җиңел автомобильләр каракларның гел игътибар үзәгендә. Сак булырга кирәк.
2013 елның 10 ноябрь төнендә Илнур Хөснетдинов белән Илхом Янсубаев Чулпан авылында А. Расуловның ишеге бикләнмәгән машинасыннан аккумулятор, автомагнитола урлый. Караклар машина хуҗасына 3 мең сумлык зыян ясый.
Җиңел кәсепнең тәмен татыган караклар икенче төнне дә тик ятмый. Арчаның Күл урамында А. Ершов машинасының ишеген отвертка белән ачып, аннан аккумулятор, автомагнитола панелен һәм ике акустик колонканы чәлдереп, машина хуҗасына 3 мең сумлык зыян ясыйлар. Моның белән генә канәгать булмыйча, алар шушы ук төнне, 2013 елның 11 ноябрендә, шушы ук Күл урамында А. Ермолаевның арткы ишеге ачык булган машинасыннан аккумулятор, автомагнитола панелен һәм ике акустик колонканы урлыйлар, шулай итеп, хуҗасына 5 мең сумлык зыян китерәләр.
Полиция хезмәткәрләре караклар эзенә төште. Суд булды. Гаеплеләр зыян күрүчеләргә акчалата һәм әйберләтә зыянны кире кайтарды һәм тиешле җәзаны алды.
Машина хуҗаларына шуны әйтәсе килә: төнгә автомобильләрне урамда калдырмагыз, гаражларга кертегез. Машиналарга саклау сигнализацияләрен куярга кирәк. Сакланганны Аллаһ Тәгалә саклармын, дигән.
Булат БИЛАЛОВ,
тикшерүче, юстиция капитаны.

“Газиз Арчам! Даның зурдыр, юлың туры, сиңа багышлана ул–кызларың җыры” девизы астында Арча станциясендәге мәдәни–спорт үзәгендә узган иҗат концертында Күпербаш мәдәният йорты, мәдәни–спорт үзәге һәм питомник клублары станция халкына бәйрәм бүләк итте. Күпербашлыларның театральләш-терелгән күренештә чын артистлардай уйнавы, Рая Фәтхуллинаның моңлы мөнәҗәте, алып баручылар Гөлназ Шәмсетдинова һәм Рәмис Хәсәновның милли киемнәре, аһәңле тавышлары белән сәхнәне бизәп торулары, концертта яңгыраган җырлар, шигырьләр, биюләр тамашачы күңеленә хуш килде.