ИГЪТИБАР: мәктәп укучылары арасында яңа бәйге!

ИГЪТИБАР: мәктәп укучылары арасында яңа бәйге!
“Арча хәбәрләре” газетасы редакциясе Арча Укучылар сарае белән берлектә 4, 9 һәм 11нче чыгарылыш сыйныф укучылары арасында “Гаҗәеп матур мәктәп еллары” исеме астында шигырь һәм проза язмаларына, фотосүрәтләргә бәйге игълан итә. Таләпләргә килгәндә, язмалар А4 форматында 14ле шрифт белән басылган ике биттән артмаска, фотосүрәтләр “Соңгы кыңгырау”га багышланган кичәнең һәм чыгарылыш кичәсенең иң матур мизгелләрен чагылдырырга тиеш.
Язмалар 10 апрельдән 20 майга, фотосүрәтләр 21 майдан 30 июньгә кадәр кабул ителә.
Хезмәтләрегезне “Гаҗәеп матур мәктәп еллары” тамгасы белән arvestnik@yandex.ru адресына һәм “Вконтакте” сайтындагы “Арча хәбәрләре” битенә җи-бәрүегез сорала. Язмаларыгызның исеме белән бергә үзегезнең исем–фамилиягезне, әтиегезнең исемен, укыган мәктәбегез, ничәнче сыйныфта укуыгызны күрсәтү мәҗбүри.
Җиңүчеләрнең язмалары һәм фотосүрәтләре газета битләрендә һәм arskmedia.com сайтында урын алачак. Шулай ук аларны «Арча хәбәрләре» газетасы һәм мәгариф идарәсенең бүләкләре көтә.


Ярминкәдә бушка концерт та карадык, чәй дә эчтек
Узган шимбәдә Арча шәһәрендә «Эссен» кибете каршында үткәрелгән ярминкәдә «Северный» ширкәте, «Сафия», Г.Сабирова крестьян–фермер хуҗалыклары, Арчаның 7нче мәктәбе, Арча агросәнәгать һөнәри көллияте катнашты.
Ярминкә — жырлы, биюле сәүдә. Ул көнне нәкъ шулай булды да. Ярминкәне Шушмабаш авыл җирлеге оештырды. Шушмабаш һәм Носы мәктәпләре дә үзәктә кайнады. Нәүрүзбикә чи-бәрләре чын яз бәйрәменә әверелдерде ярминкәне. Бөтен йоласына туры китереп оештырдылар аны. Хәйрия өстәлендә кайнар чәй белән җылынып алырга да мөмкинлек булды. Бар әшәкелекләрне үзенә туплаган карачкыга кадәр яндырылды. Әби–бабайларга ярма, конфетлар өләшенде. Кирәкле әйберне дә сатып алдык, бушка концерт та карадык, чәй дә эчтек, дип таралышты халык.