Укытучылар тупның да “телен аңлый”

Укытучылар тупның да “телен аңлый”
Язгы каникул көннәрендә мәктәп укучыларының кайсы ял иткән, кайсы имтиханнар биреп йөргән вакытта укытучылар да эш белән мәшгуль булды. Зур тырышлык куеп мәгариф учреждениеләре профсоз оешмасының спартакиадасы кысаларында уздырылучы волейбол ярышларына әзерләнде алар.
Ел да үкәрелүче ярышларда мәгариф хезмәткәр-ләре 10 спорт төре буенча үзләренең сәләтен, тырышлыгын эшкә җигеп, җиңү өчен көрәшә. Көздән язга кадәр дәвам итә ярышлар: сентябрьдә — кросс, көзге каникул көннәрендә — баскетбол, ноябрьдә — йөзү, гыйнвар каникулларында — шашка, шахмат, кул көрәше, өстәл теннисы, февральдә — чаңгы, мартта — волейбол, апрельдә җиңел атлетика һәм, мөмкинлекләре булса, майда туризм буенча көч сынашалар. Уку елы ахырында нәтиҗә ясап, коллективларга урыннар билгеләнә. Беренче өчлеккә кергән мәктәпләрне профсоюз оешмасы кирәкле спорт җиһазлары белән бүләкли.
Быел волейбол ярышларында 13 ир–ат һәм 22 хатын–кыз командасы катнашты. Курса–Почмак, Наласа мәктәпләре, “Арча” спорт мәктәбе, Яңа Кенәр лицее, 5нче гимназия, Укучылар сарае базаларында барган уеннарда сайлап алынган командалар финал ярышларында катнашу хокукы алды. Һәм, менә, финал ярышларына — кискен кө-рәшкә Арча Укучылар сараена һәм 5 нче гимназиягә җыелдылар. Шулкадәр бирелеп уйныйлар, һәрберсенең хәрәкәтендә “Без җиңәргә тиеш!” дигән өмет ярылып ята. Ә чиратын көтеп тамашачы булып утыручылар борчуда, бер–берсе белән киңәшләшеп, сөйләшеп тә алалар. Уенчылары — үз командасы өчен җан атучы Наласа мәктәбенең физкультура укытучысы Илфат Төхфәтуллин белән сөйләшәбез.
— Уку елы дәвамында профсоюз оешмасы әгъзалары белән мөмкинлек булганда спортзалга еш җыелырга тырышабыз. Укытучылар да сәламәтлекләре турында кайгырта. “Әйдә, җыелышыйк, уйныйк әле”, — дип еш тәкъдим итә алар. Волейболны, гадәттә, укытучылар белән укучылар командалары арасында ярышып уйныйбыз. Катнашучылар бүгенге ярышка бик дулкынланып килде. Әлбәттә, җиңүгә өметләр юк түгел, — ди ул.
Өметләре акланды, хатын–кызлар арасында Наласа башлангыч профсоюз оешмасы командасы 1 урынга чыкты! “Арча” спорт мәктәбе (2 урын) һәм 1нче мәктәп (3 урын) командаларын да җиңүгә иреште алар! Ир–егетләр арасында 1 урынны “Арча” спорт мәктәбенең — беренче, 2 урынны шул ук мәктәпнең — икенче, 3 урынны Яңа Кенәр лицее командалары яулады. “Иң яхшы уенчылар” булып 1нче мәктәптән Гүзәл Ахунова һәм “Арча” спорткомплексы тренеры Нияз Гатауллин танылды. Призлы урын алган командаларга район мәгариф идарәсе һәм профсоюз оешмасының грамотасы, уенчыларга истәлекле бүләкләр тапшырылды.
Баш хөкемдар, мәгариф учреждениеләре хезмәткәр-ләре профсоюз оешмасы рәисе Вакыйф Харисов уеннан бик канәгать иде. Алда мондый уеннар күп булыр. Димәк, җиңүчеләр дә күп булачак. Бары буш вакытыңны спортка багышларга иренмәскә, сәламәт булу өчен көчеңне кызганмаска һәм тырышырга кирәк.
Розалия ЗИННӘТОВА