Эшнең нәтиҗәсе — кешедә

Эшнең нәтиҗәсе — кешедә
8 апрельдә район Мәдәният йортында “Бердәм Россия” сәяси партиясе Уставы нигезендә праймериз, ягъни партия эчендә алдан тавыш бирү үткәрелде.
14 сентябрьдә Татарстан Республикасы Дәүләт Советына депутатлар сайланачак. Праймериз нәтиҗәләре лаеклыларны алдан ачыкларга ярдәм итәргә тиеш.
Чараны Татарстан Республикасы Дәүләт Советы депутаты, ТРның Дәүләт Советы секретаре Лилия Маврина алып барды.
Республикада партия эчендә алдан тавыш бирүне үткәрү буенча оештыру комитеты төзелде. Комитет кандидатлар исемлеген раслады. Алар бүген барысы 157 кандидат. Күпчелеге партия әгъзалары, теләктәш-лек белдерүчеләр дә бар.
Безнең районда үткә-релгән праймеризда 18 кандидат катнашты. Алар арасында Татарстан Республикасы Дәүләт Советы депутаты, ТРның Дәүләт Советы Рәисе урынбасары Римма Ратникова, Татарстан Республикасы Дәүләт Советы депутаты, Мәдәният, фән, мәгариф һәм милли мәсьәләләр комитеты рәисе Разил Вәлиев, якташыбыз “Татнефть продуктлары” Холдинг компаниясе” ачык акционерлык җәмгыяте генераль директоры Рөстәм Сабиров бар иде. Безнең районнан Укучылар сарае җитәкчесенең балалар иҗтимагый оешмалары белән эшләү буенча урынбасары Лия Ильина шулай ук кандидат буларак катнашты.
Сайлаучылар — “Бердәм Россия” сәяси партиясе әгъзалары һәм шушы партия белән хезмәттәшлек итүче җәмәгать оешмалары (профсоюз, яшьләр оешмалары һ.б.) вәкилләре. Тавыш бирүләр республиканың 18 мәйданчыгында оештырыла. Һәрберсендә 200 сайлаучы. Безнең районда Арча, Әтнә, Балтач, Кукмарадан 192 сайлаучы катнашты.
— Мондый праймериз беренче тапкыр 2011 елның июлендә үткәрелде. Ул вакытта Россия Федерациясе Дәүләт Думасына депутатлыкка кандидатларга партия эчендә алдан тавыш бирү оештырылды, — дип сөйләде Татарстан Республикасының Дәүләт Советы секретаре Лилия Маврина. — Татарстан Республикасы Дәүләт Советына депутатлыкка кандидатларга праймериз шулай ук беренче тапкыр үткәрелә.
Кандидатлар белән очрашуны, тавыш бирүне тиешле югарылыкта оештырган өчен Лилия Маврина Арча муниципаль район башлыгы Алмас Назировка, аның урынбасары Любовь Осинага рәхмәт әйтте.
Кандидатлар сайлаучылар алдында 5әр минутлык чыгыш ясады. Алар үзләре белән таныштырганнан соң, программаларын бәян итте. Теләгән кеше кандидатларга сорау бирә ала иде.
— Иң катлаулысы — төзегән программаны тормышка ашыру, — дип сөйләде Разил Вәлиев. — Депутатның вазыйфасы канун кабул итү, аның үтәлешен күз уңында тоту һәм сайлаучылар белән эшләү. Сайлаучылар белән эшләүгә игътибар биреп җиткермибез. Шәхсән үзем нәрсә эшләргә җыенам? Мәдәният, фән, мәгариф һәм милли мәсьәләләр комитеты рәисе буларак, мәдәният хезмәткәрләренең хезмәт хакын арттыруны күздә тотам. Гомумән, бюджет системасында эшләүчеләрнең хезмәт хакын арттырасы бар. Авылдагы проблемалар борчый. Авылларны үстерү өчен комплекслы дәүләт программасы кабул итәргә кирәк. Кешегә эш тә булсын, юллар да төзелсен, медицина һ.б. тармаклар да үсеш алсын.
Райондашыбыз Лия Ильина — “Бердәм Россия Яшь Гвардиясе” штабы җитәкчесе дә. Казан Дәүләт мәдәният һәм сәнгать университетын кызыл диплом белән тәмамлаганнан соң 6 ел яшьләр белән эшләү дәверендә ирешкән уңышлары белән таныштырды.
— Мин үз кандидатурамны яшьләр мәнфәгатьләрен кайгырту максатыннан тәкъдим итәм, — дип сөйләде ул. — Минем янымда һәрвакыт яшьләр, аларны яхшы аңлыйм. Аларның сәләте буенча эшлибез һәм уңышларга ирешәбез. Кызганыч, яшьләр авылдан китә. Әмма аларга кайдадыр эшләп йөргәнче, туган җирдә, туган авылда да сәләтне ачып, иҗади һәм һөнәри мөмкинлекләрне тормышка ашырып буласын төшендерергә һәм шушы юнәлештә эшләргә кирәк.
Чыгышлар тәмамлангач, һәр сайлаучы бюллетень алып, яшерен тавыш бирү юлы белән кемнәрне хуплавын белдерде.
Сайлаучыларның кайсы белән сөйләшсәм дә, аларда бер уртак фикер ярылып ята: депутатларның эш нәтиҗәсе халыкның әйбәт яшәвендә чагылырга тиеш. Бүгенге очрашу, тавыш бирүнең “Эшнең нәтиҗәсе — кешедә!” өндәве белән үтүе очраклы түгел.
Румия НАДРШИНА

P.S. Алдан тавыш бирү нәтиҗәләре белән tatarstan.er.ru сайтында танышырга мөмкин.