“Нур”лылар Питердан кайтты

“Нур”лылар Питердан кайтты
Арча Укучылар сараеның “Нур” балалар телестудиясе Санкт-Петербургта Россия күләмендәге “Мәктәптә иҗади эшчәнлек” конкурсында катнашып кайтты.
“Нур”лылар өчен Питер чит җир түгел. Чөнки өченче ел барып “Америка ачып”, җиңү яулап кайтканнар иде инде. Әнә шул шаукым һәм алып кайткан тәэсирләр белән быел шул тема буенча белемнәрен тирәнәйтү мөмкинлеге туган.
Иҗади конкурс Санкт–Петербургта 2003 елдан үткәрелеп килә. Россия Федерациясенең Фән һәм мәгариф министрлыгының Санкт-Петербург дәүләт технология университеты белән берлектә уздырылучы бәйгенең максаты — талантлы балаларны барлап, кызыксындырып, сәләтлеләренә университетка укырга керү мөмкинлеге тудыру. Чыннан да, бәйгедә катнашкан балалар биредәге тәртипне үз күзләре белән күргәч, укырга керү турында хыяллана, укуда да алдыра, үзалларына максат куя.
Арча Укучылар сарае балалары кызыксынучанлыклары, тырышлыклары белән аерылып тора. Республика күләмендә дә билгеле аларның тырышлыгы. Чөнки бәйгеләрдә катнашып яулаган җиңүләре бихисап. Питерга барыр өчен маяны да үзләре туплаган: республика күләмендә проект яклап 100 мең сумлык грант отканнар. Питерда югары сыйныф укучылары өчен ел саен үткәрелүче конкурс яшьләрнең иҗади талантын ачып, дөньяга үз карашларын булдыруга юнәлдерелгән.
Быелгы бәйгенең беренче турын балалар читтән торып узган. “Белем әлифбасы” темасына сюжет әзерләү өчен бездә җирлек адым саен. Әлифбаның туган җире без булгач, ничек җиңмәскә мөмкин ди?! Әнә шул сюжет китергән уңыш аларны икенче турга катнашырга чакыру белән бүләкләгән дә инде. Питерда тәҗрибәле журналистлар уздырган осталык класслары, пресс–конференция-ләрдә катнашып, эш алымнарын үзләштергәннән һәм хезмәтләрендәге кимчелекләрне аңлаганнан соң, үзләренә куелган бурычны — бәйгенең чираттагы биремен үтәргә чыгып китә укучылар. Һәм 6 сәгать булыр–булмас (ә вакыт 7 сәгать бирелә) сюжетны әзерләп тапшыралар да. Шулай булмыйча, “нур”лылар арасында иң булдыклылар рәтендә Ралинә Җәләева (Иске Чүриле мәктәбе), Илүзә Гатауллина (Арчаның 7 мәктәбе) һәм Зөһрә Зарипова (5 гимназия)! Россия гранд макеты проекты кысаларында сюжет төшерү өчен укытучылары Айгөл Шәйдуллина һәм Дамир Таҗиевның да тәҗрибәләре, киңәшләре бик мөһим була. Жюрига да ошый аларның хезмәте. Ә аның составында — “Петербург5” каналы һәм “Балтика” радиосының тәҗрибәле журналистлары.
Россиянең күп төбәгеннән килгән балалар янында арчалыларның да булуы нинди куаныч! Димәк, балаларга дөнья күреп кайтудан тыш, аралашу, тәҗрибә офыгын киңәйтергә дә мөмкинлек туган. Өстәвенә, шәһәрнең тарихи урыннарын, дөньяда данлыклы Эрмитаж музеен карап алган тәэсирләре күпме! Музейда күргәннәренең кайбер мизгелләре, тарихны бәян итүчеләр белән әңгәмәләре сюжет әзерләгәндә дә ярдәм итә балаларга.
“Мондый конкурслар һөнәри үсеш өчен бик кирәк”, — ди “Нур” телестудиясе укытучылары. Балалар киләчәктә ул һөнәрне дәвам итәрме, юкмы, анысы мөһим түгел. Ләкин кем генә булмасыннар, өйрәнгәннәре, күргәннәре, алган сабаклары, туплаган тәҗрибәләре тормышта, һичшиксез, кирәк булачак.
Розалия ЗИННӘТОВА
P.S. Конкурсның нәтиҗәләре апрель ахырында билгеле булачак.