Күпфатирлы йортларда почта тартмасын кем куя

Күпфатирлы йортларда почта тартмасын кем куя
Вакытлы матбугатка икенче яртыеллыкка язылу башланды, газета–журналларга бәяләр артты, Интернет көннән–көн үз упкынына тарта... Мондый басым астында кайсы якка атларга, кайсын сайларга да белмәссең. Юк, алай дию дә бик үк дөрес булмас. Чөнки газета, журналлар алдырган кеше аннан башка яшәүне күз алдына да китерә алмый һәм аны бернинди каршылыклар да куркытмый.
Тик менә безне шундый сораулар кызыксындыра: күпкатлы йортларда яшәүчеләргә көн-дәлек почта ничек барып ирешә? Аларда почта тартмалары бармы? Юк икән, аларны кем урнаштырырга тиеш? Бу сорауга җавап эзләп, гадәттәгечә, иң беренче Интернетка кердем. Тик, кызганыч, төпле һәм төгәл аңлатма таба алмадым. Ахыр чиктә күпкатлы йортларда яшәүчеләрнең үзләренә мөрәҗәгать итеп карарга булдым.
Банк урамы, 18нче йортның бер подъезды ишегендә домофон юк икән, аңа керү кыенлык тудырмады. Иң беренче фатирдан чыккан Роза Нуретдинова соравымны ишетүгә икенче катка менгәндә бачкыч мәйданчыгында идәндә торган почта тартмаларына күрсәтте. “Стенага эленгән иде ул. Узган ел ныклап төзекләндергәннән соң идәндә калды”,—диде.
—Ә менә безнең йортны ныклап төзекләндергән “Икстрой” ширкәте үз эшен җиренә җиткереп башкарды,—ди Банк урамы, 20нче йортта яшәүче Фердинант Абдуллаҗанов.—Ишектән керүгә стенага урын әзерләде. Без һәрберебез почта тартмалары сатып алдык. Шунда урнаштырып та бирде.
Шул ук урамның 24нче йортында яшәүче Сәвия Зиннәтова да мөмкинлекләре булганнарның үз ишекләре турысына алып куюларын, ә калганнар өчен почта тартмаларының баскыч астында булуын әйтте. Иске, әмма бар. “Мин “Арча хәбәрләре”н генә алдырам. Ансыз булмый. Бөтен яңалыкны белеп торасың”,—диде ул.
—Почта тартмаларын һәркем үзе сатып ала. Торак– милекчеләр ширкәтенең аларны үз исәбенә алып куярга акчасы юк. Безнең “Уют” ширкәтенә 8 йорт карый, коммуналь хезмәтләр өчен зур суммада әҗәтебез бар. Кыш чыктык. Ватылган рәшәткәләрне карыйсы, чә-чәкләр утыртасы бар,—диде җитәкчесе Роза Билалова, проб-лемаларын санап китеп.
Шәһәр Советы башкарма комитетында бу хакта ни уйлыйлар?
—Әйе, почта тартмаларын һәркем үзе сатып ала, ә төзегән яки ныклап төзекләндергән оешма аларны урнаштырып бирә, торак–милекчеләр шир-кәте башта сатып алуны оештырса, аннан карап, контрольдә тота. Яңадан барлык йортларда почта тартмаларын бер кат барлап чыгарга кушылды,—диде җитәкчесе Рафил Исмәгыйлев.
Ә менә яңа төзелгән йортларда ничек? Берничә йортка кердек, хатлар, газета–журналлар, коммуналь хезмәтләргә түләү өчен квитанцияләр я тәрәзә төбендә ята, я ишек сапларына кыстырылган.
—Яңа төзелгән йортларны тапшырганда подрядчылар тарафыннан почта тартмалары куелырга тиеш. Ул шул фатир бәясе исәбенә керә. Ул яктан “Энергосервис” ширкәте бик төгәл,—ди “Идарәче компания” ширкәте җитәкчесе Фәрит Зәйнуллин (редакциядән: тик менә әлеге ширкәт төзеп ел ярым элек тапшырган Зур урам, 9а йортта әлегә кадәр почта тартмалары юк, квитанцияләр тәрәзә төбендә я ишек тоткасында). Йортларны ныклап төзекләндергән оешмалар да почта тартмаларын урнаштырып китәргә бурычлы. Юк икән, ТМШ җитәкчеләренә мөрәҗәгать итәргә кирәк. Ә почта тартмаларын фатир хуҗалары үзләре сатып ала.
—Алар гомуми йорт милкенә керә түгелме соң? Гомуми йорт милкен карап торган, төзекләндергән өчен йортта яшәүчеләр акча түли.
—Юк, ут, газ исәпләү приборлары кебек үк почта тартмалары да һәркемнең үз милке.
Ярый, монысын аңлаштык та, ди. Ә менә хат ташучылар бинага ничек керә? Һәр йортта диярлек хәзер домофон бит. Банк урамы, 27 йортта хатны урам яктагы телефон номерлары язылган калайга кыстырып киткәннәр иде. Аның хуҗасы кулына барып ирешүе икеле түгелме соң?
—Һәр хат ташучыга почта бүлекчәсе үз хисабына домофон ачкычлары ясатып бирде. Яңадан бу мәсьәләне ачыкларбыз,—диде Арча почта бүлекчәсе җитәкчесе Ирек Фәйзрахманов.
Әйе, монда ачыклыйсы мәсьәләләр бар әле. Шундый бәяләргә газета–журналга язылалар икән, күпфатирлы йортларда яшәүчеләр үз кулларына барып ирешәчәгенә төгәл ышансын иде. Коммуналь хезмәтләргә акча җыючы оешмаларны бу мәсьәлә аеруча кызыксындырырга тиеш.
Гөлсинә ЗӘКИЕВА