Мәктәпләрдә “урак өсте” җитә

Мәктәпләрдә “урак өсте” җитә^
Мәктәпләрдә чыгарылыш сыйныф укучылары өчен урак өсте —Бердәм дәүләт имтиханнары якынлаша.
Укучылар һәм аларның әти-әниләре түземсезлек белән билгеләнгән көннәрне көтә. Балалары белемнәрен күрсәтә алырмы, чит мәктәп диварларында, югалып калмасмы һәм чыгарылыш имтиханнары белән бәйле башка сораулар бүген әти-әниләрне һәм укытучыларны иң борчыганнары.
Шул уңайдан Арча районы буенча Бердәм дәүләт имтиханнары координаторы, мәгариф идарәсенең мәгълүмати-методик үзәк методисты Лилия Гатауллина белән сөйләшәбез.
— Лилия Мәхмүдовна, Бердәм дәүләт имтиханнарына санаулы көннәр калып бара. Быел районда күпме чыгарылыш сыйныф укучысы исәпләнә? Алар имтиханнарны кайда тапшырачак һәм нинди әзерлек эшләре алып барыла?
—Быел Арча районында 270 чыгарылыш сыйныф укучысы исәпләнә. Алар барысы да имтиханнарны Арчаның икенче урта мәктәбендә тапшырачак. Бердәм дәүләт имтиханнарына әзерлек кече яшьтән үк башлана, ә чыгарылыш сыйныф укучылары белән бу эш максатчан рәвештә алып барыла. Дәрес вакытында һәм өйдә мөстәкыйль шөгыльләнгәндә алар теоретик белемнәрен практикада кулланырга өйрәнә. Укучыларны психологик яктан әзерләү, алар имтихан тапшыру процессы турында хәбәрдар булсын, контроль тикшерү материалларының эчтәлеге, төзелеше һәм катлаулылык дәрәҗәсе белән таныша алсын өчен районда сынау Бердәм дәүләт имтиханнары оештырыла. Алар барысы да махсус имтихан тапшыру пунктларында узды. Шулай ук Бердәм дәүләт имтиханнарына әзерләнүдә педагогик тәҗрибә белән уртаклашу системасын җәелдерү максатыннан Арчаның беренче, икенче мәктәпләрендә, бишенче гимназиядә, Түбән Мәтәскә, Яңа Кенәр, Иске Чүриле һәм Шушмабаш мәктәпләрендә Бердәм дәүләт имтиханнарына әзерлек буенча ресурс үзәкләр эшли. Бу мәктәпләрнең теләсә кайсына өстәмә шөгыльләнү өчен алдан билгеләнгән көннәрдә (аерым фәннәр буенча шөгыльләнү көннәре http://arskinfo.ucoz.ru сайтында урнаштырылган) укучылар килә ала.
—Бердәм дәүләт имтиханнарын тапшырганда үзгәрешләргә аерым тукталып үтәсе килә. Укучыга үзе белән нәрсә алып килергә кирәк һәм нәрсәләр алып керергә ярамый?
— Имтихан тапшыру пункты-на һәр чыгарылыш укучысы бер сәгать алдан паспорт, пропуск, Бердәм дәүләт имтиханнарын тапшыру турында белешмәлек, кара гельле ручка белән килә. Аерым фәннәр буенча имтиханнарга өстәмә әйберләр (аларның исемлеге белән укытучылар таныштыра) алып керергә рөхсәт ителә.
Үзең белән элемтә чаралары, электрон-исәпләү техникасы, фото-, аудио- һәм видеоаппаратура, белешмә материаллар, язма мәгълүматлар һәм башка мәгълүмат саклау һәм тапшыру чаралары алып керү тыела. Аларны алып керү очрагы, мин куллану турында әйтмим дә, имтихан нәтиҗәләрен гамәлдән чыгаруга китерәчәк. Таләпләрне бозучы бердәм дәүләт имтиханнарын тапшыручылар имтиханнан чыгарыла.
Быел үзгәрешләр бары Бердәм дәүләт имтиханнарын тапшыру тәртибенә генә кагылачак. Имтихан тапшыру пунктында барлык аудиторияләр дә видеокүзәтү системасы, телефоннарны блокировкалау һәм металлэзләгечләр белән җиһазландырылачак. Мәгариф өлкәсен күзәтү буенча федераль хезмәт җитәкчесе Сергей Кравцов чараларның контрольне көчәйтүгә һәм бердәм дәүләт имтиханнарын тапшыру процедурасын үтә күренмәле итүгә юнәлдерелгән булуын әйтте.
— Җәмәгать күзәтүчеләре турында да әйтеп үтсәгез иде, кемнәр алар һәм ничек сайлап алына?
— Имтихан тапшыру пунктларында җәмәгать күзәтүче-ләре булачак, алар бердәм дәүләт имтиханнарын үткәрү процессын контрольдә тотачак. Райондагы һәр теләгән кеше: массакүләм мәгълүмат чаралары хезмәткәрләре, ата-аналар комитетлары, попечительлек советы, җәмәгать берләшмәләре һәм оешмалары әгъзалары, уку йортлары хезмәткәрләре, законнар чыгару органы әгъзалары (аларның балалары имтихан тапшырмаган очракта) җәмәгать күзәтүчеләре була ала. Җәмәгать күзәтүчесе булырга теләүчеләр 15 апрельгә кадәр мәгариф идарәсенә аккредитациягә гариза тапшырырга тиеш.
— Әти-әниләргә, балаларга киңәшләрегез һәм теләкләрегез нинди?
— Бердәм дәүләт имтиханнары – ул зур стресс, балалар өчен генә түгел, әти-әниләр һәм укытучылар өчен дә. Шуңа күрә, беренче чиратта, әти-әниләр балаларына игътибарлырак булсын, үзләренә ышаныч тудырсыннар иде. Һәр укучы бары үз көченә генә таянырга тиеш.
Барлык чыгарылыш сыйныф укучыларына мин бердәм дәүләт имтиханнарын уңышлы тапшыруларын теләп калам.
Бердәм дәүләт имтиханнары турында тулырак мәгълүматны Татарстан Республикасы Мәгариф һәм фән министрлыгы сайтында (mon.tatar.ru) табарга була.
Гөлназ ГЫЙНИАТУЛЛИНА