Пенсионерлар, сезнең өчен

Пенсионерлар, сезнең өчен
Әңгәмәдәшебез — Арча һәм Әтнә районнары буенча Пенсия фонды идарәсе җитәкчесе Рузия Нурмөхәммәтова.
— Рузия Илсуровна, районда пенсионерлар өчен Университет оештырылган дип ишеттек.
— Чыннан да, районда өлкән буын өчен Университет оештырылды. Өченче буын Университеты дип атала ул.
— Университетны без, гадәттә, белем ала торган урын, дип беләбез.
— Бу Университетта да белем алалар, әмма пенсионерлар. Дөрес, һөнәр алу максат итеп куелмый. Яшь буенча пенсиягә чыгучыларны үзләрен җәмгыять өчен кирәкле кеше итеп санарга, көчләрен, мөмкинлекләрен файдалы итеп тормышка ашырырга өйрәтәчәк ул.
— Кем оештыра аны?
— “Россиянең пенсионерлар берлеге” Бөтенроссия җәмәгать оешмасының Татарстан бүлек-чәсе.
— Университет турында киңрәк аңлатсагыз иде.
— Университет төрле дәрәҗәдәге кешеләрне, төрле һөнәр ияләрен берләштерә. Монда тиз үзгәрә баручы заманага яраклашып, сәламәт яшәргә өйрәнәләр. Университетта “Туган як тарихы”, “Сәламәт яшәү рәвеше”, “Компьютер белеме нигезләре”, “Телне белмәүчеләргә татар телен өйрәтү” юнәлешләрендәге факультетлар эшләячәк.
— Укулар кайда булачак һәм ул бушлаймы әллә түләүлеме?
— Укулар Арча гуманитар–техник техникумында бушка алып барылачак.
— Нинди документлар кирәк?
— Пенсионер гариза язарга тиеш һәм пенсия кенәгәсе, белеме турындагы диплом күчермәсе кирәк булачак.
— Нинди белемгә ия булу әһәмиятлеме?
— Университетка тың-лаучы булып һәр эшләмәү-че пенсионер керә ала.
— Ә күпме укырга?
— 72 сәгатьлек кыска вакытлы программа да, 72 сәгатьтән 140 сәгатькә кадәр курслы укулар да бар. Укулар зачет, реферат, фәнни–гамәли конференция, контроль эш белән тәмамланачак. Уку планының барлык таләпләрен дә үтәүчеләргә “Россия пенсионерлар берлеге”нең сертификаты биреләчәк.
— Бу сертификатның нинди дә булса өстенлеге, файдасы бармы?
—Университетта белем алу ул кешенең үзе өчен. Пенсиягә чыккач та, компьютер аша дөньяга чыгып, сәламәт тормыш рәвеше алып барып, тулы канлы тормыш белән яшәү дигән сүз бу.
— Кая мөрәҗәгать итәр-гә?
— Арча һәм Әтнә районнары буенча Пенсия фонды идарәсенә килергә кирәк. БЕЗНЕҢ АДРЕС: Арча, Комсомол урамы, 4 йорт. Тел.: 3–03–79. Университет 2014 елның мартыннан эшли башлады. Теләге булганнар рәхим итсеннәр.
Румия НАДРШИНА