Балалар дини бәйгедә

Балалар дини бәйгедә
Арча үзәк мәчетендә төрле чаралар, бәйгеләр оештыру матур традициягә әверелеп бара. Әле кайчан гына остазлар, имамнар бәйгесе үткәрелгән иде, узган якшәмбедә биредә балалар арасында дини бәйге булды.
—Районыбызда 76 мәчет бар, 48ендә укулар бара. Симетбаш, Сөрде, Айван, Мирҗәм мәчетләрендә дә быел укулар башланды. Бер җыелышта Җәлил хәзрәт: “Мин 54 бала укыттым. Хәзер бөтен мәчеткә 50 бала җыеп булмый”,—дигән иде. Менә бүген карап торам, күпме бала бәйгегә җыелган. Аллага шөкер, балалар бар, мәчеткә йөри. Арча станциясе мәчетендә быел гына да 21 өлкән яшьтәге кеше һәм 18 бала шаһәдәтнамә алды,—диде районның мөгаллимәләр шурасы рәисе Рая Фәтхуллина.
Мәчетләрдә дини белем үзләштерүче балалар арасындагы бәйгене Арча районы мөхтәсибе Раил хәзрәт Гыйлаҗев ачып җибәрде.
—Зур бәйгедә күрешүебезгә шатбыз. Без барыбыз да Аллаһы Тәгалә юлында, аның рәхмәте белән йөрибез,—дип башлады ул сүзен.—Ел да мәчетләребездә 2—2,5 мең кеше белем ала. Дини укуларның тагын бер елы тәмамланып килә. Ел дәверендә нәрсә үзләштердегез? Шуны сынап карау, бигрәк тә бер–беребез белән очрашу, аралашу өчен җыелдык без бүген. Сез барыгыз да дини юлдан китеп, Аллаһы Тәгалә рәхмәтен алган балалар. Шуңа сөенергә кирәк. Чөнки туры юлларын таба алмаган балалар, яшьләр дә күп бит. Сезгә дини белем бирүче остазларыгызга да рәхмәт белде-рәсем килә. Бу җиңел эш түгел. Уңышлар һәм җиңүләр телим һәрберегезгә.
Ул көнне махсус бәйгегә дип Татарстан Республикасының Диния нәзарәтеннән Рөстәм хәзрәт Хәйруллин һәм Саба районыннан дин кардәшләр дә килгән иде.
—Төрле чаралар, бәйгеләр оештыруы белән Арча районы республикада башкаларга үрнәк булып тора. Моның өчен Раил хәзрәтнең үзенә рәхмәт җиткерергә кирәк. Бүгенге бәйге дә зур мәгънәгә ия. Чөнки балаларда безнең киләчәк,—дип балаларга изге теләкләрен дә җиткерде Рөстәм хәзрәт.
Бәйгедә мәчетләрдә төрле сыйныфларда белем алучы 50 дән артык бала катнашты. Беренче булып алар үзләре, туган төбәкләре белән таныштырып язган иншаларын жюри әгъзалары хөкеменә тапшырды. Ул өй эше итеп бирелгән булган һәм балалар аңа чын күңелдән әзерләнгән. Шигырь юллары язганнары, плакатлар, альбомнарга кадәр ясаганнары бар. Кайберләре үзләре, гаиләләре турында гына язмыйча, авыл тарихына, мәчетләре эшчәнлегенә дә тукталган.
Алдагы сынаулар шактый катлаулы иде. Нәкъ имтихандагыча. Башта балалар гарәпчә Коръәннән өзекләр укыды. Аннан үзләренә бик тиз арада биш вакыт намаз уку тәртибен аңлатып язарга кушылды. “Сез моны төнлә уятып сорасалар да белергә тиеш”,—диде Раил хәзрәт. Иң соңыннан, озак уйламыйча, билетны алу белән үк, сорауларга җаваплар бирергә туры килде.
Сынаулар җиңелләрдән булмаса да, балалар сер бирмәде. Тик 50 дән артык баланың барысы да җиңүче булып бетә алмый. Монысы көн кебек ачык. Һәр бәйгенең җиңүчесе, җиңелүчесе була. Бу көнне беренче урынны Наласадан Гөлгенә Кәлимуллина, Шушмабаштан Сиринә Фәйзрахманова, икенче — Арча станциясеннән Әмир Хуҗин, Яңа Кырлайдан Әдилә Зарипова, өченче — Иске Кырлайдан Амвоз Исрафилов, Айваннан Мәдинә Фәтхетдинова, дүртенче — Мөрәледән Инсаф Җәләлиев, Яңа Кенәрдән Ильяс Сабиров, бишенче урында Утар Атыдан Фирүзә Мостафина, Урта Пошалымнан Илнур Мәхмүтов яулады. Аларга кыйммәтле бүләкләр бирелде. Гомумән, бәйгедә катнашучыларның берсе дә ул көнне бүләксез китмәде. Чөнки көчләрен сынап карарга теләп районкүләм бәйгедә катнашу ул үзе зур җиңү.
— Безнең мәчеттә 23 бала дини белем ала. Атнага бер тапкыр мәктәптән соң киләләр. Бик яратып, ихластан йөриләр. Моның өчен әти–әниләренә, укытучыларына рәхмәтлемен. Ә Гөлгенә уку алдынгысы. Бик тырыш бала. Бу җиңүгә лаек иде ул, — ди остазы “Мөхәммәдия” мәдрәсәсен тәмамлап, биш ел мәчеттә укытучы Фәридә Галиуллина.
Балаларга яшьтән үк ислам дине нигезләрен өйрәтү читтән керүче халкыбыз өчен ят булган экстремизм кебек агымнарга каршы тору максатында да бик кирәкле һәм мөһим чара.
Гөлсинә ЗӘКИЕВА