Булачак машина йөртүчеләр ярышты

Булачак машина йөртүчеләр ярышты
Узган атнада «Арча» спорт комплексында автомәктәпләрдә укучылар арасында автомобиль спорты буенча Татарстан Республикасы ДОСААФ төбәк җәмәгать дәүләт берләшмәсенең “Яшь машина йөртүче—2014” республика ярышы булды.
Республика күләмендә ел да оештырылып килә торган бу чара безнең Арчада икенче ел рәттән үткәрелә. Моны Татарстан Республикасының ДОСААФ идарәсе рәисе Радий Зарипов:
—Татарстанда бүгенге көндә 200 автомәктәп бар, шуларда 6000 кеше белем ала. Татарстан Республикасы ДОСААФ төбәк җәмәгать дәүләт берләшмәсенең Арча ДОСААФ оешмасы республикада беренче сафларда. Мондый югары дәрәҗәгә ирешүдә, һичшиксез, Арча муниципаль районының да өлеше бик зур. Район башлыгы тырышлыгы һәм ярдәме белән мәктәпләрдәге автосыйныфларда укып, укучылар мәктәпне тәмамлаганда машина йөртү хокукы биргән таныклык та алып чыга,—дип аңлатты һәм бәйсез дәүләтләр берлеге ДОСААФына 85 ел тулу уңаеннан Алмас Назировка юбилей медале тапшырды.
Ул көнне ЮХИДИ идарәсенең Арча бүлекчәсе җитәкчесе Илдар Нотфуллин һәм Арча ДОСААФ оешмасы җитәкчесе Ринат Алеевка да бүләк тапшырылды. Ә тренер Фәрит Минхәеров һәм “Арча” спорт комплексы җитәкчесе Ринат Гәрәев яшьләрне хәрби–патриотик рухта тәрбия-ләүгә һәм спортның хәрби–кулланма төрен үстерүгә керткән өлешләре өчен Татарстан Республикасы төбәк җәмәгать дәүләт берләшмәсенең Рәхмәт хатына ия булды.
—Безгә карата шундый ышаныч белдергәннәре өчен Татарстан Республикасының ДОСААФ идарәсенә рәхмәтемне җиткерәм. Укучылар мәктәптән аттестат белән бергә “С” категорияле машина йөртү таныклыгы да алып чыгалар икән монда Арча ДОСААФ оешмасының да хезмәте зур,—диде район башлыгы Алмас Назиров һәм ярышта катнашучыларга уңышлар теләде.
Республика бәйгесендә өчәр кешедән торган 35 команда (Арчадан, Түбән Кама һәм Чаллыдан икешәр команда) катнашты. Ярышлар өч төр буенча үткәрелде. Башта егетләр һәм кызлар юл йөрү кагыйдәләре буенча вакытка тест тапшырдылар. 20 сорауга 30—35 секунд эчендә җавап биреп, безнең Арча командаларыннан Виктория Уваева һәм Рәмис Сираҗиев өченче урынны яуладылар. Пневматик мылтыктан ату буенча да безнекеләр уңышка иреште. Егетләр арасында Рифат Гайнетдинов, Алмаз Фазылҗанов, Рәмис Сираҗиев беренче өч урынны алды, кызлардан Ләйсән Хафизов — беренче, Виктория Уваева өченче булды.
—Бу төр буенча ярышларда арчалылар бервакытта да сынатмый. Биатлон, быел ул полиатлон дип үткәрелде, ярышында да без беренче урынны алып кайттык,—диде тренер Фәрит Минхәеров.
Үз җиреңдә стеналар да ярдәм итә, диләр. Чыннан да, арчалылар, һәр төрдә осталыкларын күрсәтеп, җиңү өстенә җиңү яулады. Машинаны фигуралы йөртү буенча да егетләр һәм кызларыбыз сынатмады. Командалар арасында Арча ДОСААФ оешмасы командасы беренче урынга күтәрелде. Чаллы командасы — икенче, бөгелмәлеләр өченче урында.
—Һәр автомәктәпнең үз командасы булырга тиеш,—диде Ринат Алеев.—Бездә ул икәү. Өч ел рәттән бу ярышларда без беренче урынны алып килдек. Бер ел үзебездә җиңсәк, ике ел рәттән Норлаттан кубок алып кайттык. Быел да егетләребезнең сынатмаячагына ышандык. Иң авыры ярышта катнашучыларны сайлап алу булды. Чөнки автомәктәпләрдә белем алучыларның барысы да анда катнашырга лаеклы. Командаларга Шушмабаш мәктәбе (тренер Әнис Шәймәрданов), бишенче гимназия (Ленар Вәлиуллов), педагогика көллияте (Ринат Хәкимов) укучылары керде. Алар тырышлыгы белән быел да беренче урынны читкә җибәр-мәдек.
Хәер, бу ярышларда җиңелүче булмады да. Бар да характерларын, җиңүгә омтылышларын күрсәтте. Пневматик мылтыктан ату ярышын кертү исә яшьләргә хәрби–патриотик тәрбия бирүдә зур роль уйный, егетләр өчен армиягә әзерлекнең бер өлеше булып тора.
Гөлсинә ЗӘКИЕВА