Яшьләр һәм сәясәт

Яшьләр һәм сәясәт
Гел хәрәкәттә булып, замана белән бергә актив тормыш рәвеше алып барган яшь буын вәкилләрен сәясәт мәйданында күзаллавы кыенрак, чөнки алар өчен сәясәт ятрак сыман. Ләкин яшьләрнең үз фикере, дөньяга карашлары да үзенчә.
Тормыш, яшәеш турында тирәнтен уйлап фикер йөртүче, тормышны гел файдалы эшләргә генә багышларга дигән нияттә планнар корып яшәүчеләр дә бар икән. Моны Арча педагогика көллиятендә “Бердәм Россия” сәяси партиясенең Арча җирле бүлекчәсе оештырган “ПолитЗавод — 2014” иҗтимагый–сәяси проекты кысаларындагы дебатта катнашкан яшьләр дәлилләде.
Укучылар сараеның директор урынбасары Лия Ильина һәм Арча Үзәк китапханәсе китапханәчесе Юлия Ибраһимова, быел беренче тапкыр катнашачак яшь сайлаучылар белән очрашып, үзләренең ТР Дәүләт Советы каршындагы Иҗтимагый яшьләр палатасына сайлауга үз программаларын тәкъдим итте.
Сайлауларда кайсы кандидатура өстенлек алса да уфтана торган түгел, чөнки икесе дә яшьләрнең киләчәге өчен борчыла, аларның мәнфәгатен кайгыртырга тырыша. Әйтик, Лиянең программасына яшьләрнең тормыш шартларын яхшырту, яшьләр арасыннан талант-ларны табып дөньяга чыгару, эш белән тәэмин итү, югары хезмәт хаклары булдыру турында эш алып бару каралган. Китапханәче буларак Юлиянең программасы да шулай ук яшьләрнең тормышын мавыктыргыч итүгә, вакытларын бары файдалы эшләргә генә багышлауга, ветераннарга, инвалидларга ярдәм итүгә корылган. Студентлар да кызыксынучан халык, үзләренең сорауларын яудырып, кандидатлар борчыган мәсьәләләрне хәл итәрме дип анализлап фикер йөртә. Ә кызлар һәр сорауны, әгәр сайлана калсам, мин бу мәсьәлә белән очрашачакмын, проблемаларны палата эшчәнлегендә күтәреп, дәүләт ярдәме белән хәл итеп булачак дип күңелләренә беркетеп бара.
Очрашуда кандидатларны якынча сайлаулар узды. Ә бүген Яшьләр форумында катнашучыларның тавыш бирүе белән Арча районыннан ТР Дәүләт Советы каршындагы Иҗтимагый яшьләр палатасына вәкил сайланачак.
Розалия ЗИННӘТОВА