Кирәк икән, Америкага баралар

Кирәк икән, Америкага баралар
— 2015 елдан пенсияләр яңача исәпләнәчәк, диләр. Янәсе, пенсиягә соңрак чыксаң, отышлырак. Хөкүмәткә пенсионерның эшләве ни өчен кирәк? Районда эшләүче пенсионерлар күпме? — дип шалтырата Арчадан Г. Сибгатуллина.
— 2015 елдан, пенсия яшенә җитеп тә, пенсия акчасы алмыйча тагын 5 ел эшләсәң, ул 36 процентка үсәчәк,— дип аңлата Арча һәм Әтнә районнары буенча Пенсия фонды идарәсе җитәкчесе Рузия Нурмөхәммәтова. — Бүген районда 16234 пенсионерның 4931е, ягъни 30 проценты, эшли. Эш урынында рәсми теркәлеп эшләүче пенсионерлардан Пенсия фондына взнос, ягъни акча керә.
Бу аңлашыла да, яшьләрнең күбесе алдагы пенсияләре турында уйламый, шунлыктан, кайда күбрәк акча түлиләр — алар шунда. Рәсми теркәлеп эшләү мәсьәләсе аларны бик кызыксындырмый. Ә Пенсия фондын эшләүчеләр тәэмин итә. Эшләүчеләр армиясе пенсионерлар хисабына тулылана. Хөкүмәтебезнең кешене пенсиягә мөмкин кадәр соңрак чыгарырга омтылуы әнә шуны күздә тота. Кешенең сәламәтлеге һәм энергиясе булганда ник әле аларны эшләтмәскә. Хатын–кызларны 60 яшьтән, ир–атларны 65 яшьтән пенсиягә чыгару мәсьәләсе инде бер генә тапкыр күтәрелмәде. Әле менә Россия сәнәгатьчеләре һәм эшмә-кәрләре берлеге башлыгы Александр Шохин ир–ат белән хатын–кызның лаеклы ялга чыгу вакытын тигезләргә тәкъдим иткән иде. Ләкин Россия җитәкчелеге бу тәкъдимнән баш тарткан.
Быел көзен пенсиягә чыгачак “Северный” хуҗалыгы механизаторы, Шекә авылыннан Әлтәф Габдрахманов белән сөйләшәбез.
— Механизатор булып эшли башлавыма 40 елдан артты, —дип сөйли ул. —30 елдан артык “ДТ-75” тракторында эшләдем. Авыр хезмәт. Пенсиям начар чыкмас, дип уйлыйм. Хәзер Американың заманча техникасында. Мин үзем, исән-сау пенсиягә чыгып, пенсия алу ягында. Сәламәтлек булса, язларын эшләрмен әле...
“Курса МТСы”нда эшләүче 75 яшьлек Реваль Сафиуллин турында бухгалтерия кызлары:
— Кичә Чистайдан кайтты, бүген Лаешка юл тотты. Уфага да бара, кирәк икән, Америкага чыгып китә... — дип яратып сөйлиләр.
— Тазалык булганда йөрим әле, — ди Реваль абый. — Заманында механизатор, механик булып эшләдем. Бүген менә хуҗалыкка кирәкле әйберләр алып кайтам.
Арчадан 72 яшьлек эшмәкәр Әсфәндияр Нуриев:
— Өйдә нишләргә кирәк? — дигән сорауны куя һәм сүзен дәвам итә. — Узган ел Әминәм вафат булды. Эх, ул исән булса... Бик әйбәт кеше иде. Яшьтән югары белем алдым. Районның иң эре предприятиеләрендә җаваплы урыннарда эшләдем. Кеше белән эшли торган бик авыр хезмәтләрне башкардым. Пенсиягә чыксам, бер көн дә эшләмәм, дигән сүзем бар иде. Сүземдә тордым. Үземне эшмә-кәрлектә сынап карарга булдым. Үгезләрне саттым да, Ивановодан урын–җир әйберләре алып кайтып сата башладым. Бүген менә келәмнәр белән сату итәм. Беләсезме, 12 ел бер көн ял иткәнем юк минем. Бу шөгыльдән, гаиләмә һәм кешеләргә файда китерүемне аңлап, алардан рәхмәт ишетеп, күңел рәхәтлеге алам.
Районда хәтта 80 яшенә кадәр тракторда эшләгән кеше бар! Ул — Күкчә Бирәзәдән Габделнур Гарифуллин. Тракторын куйганга берничә генә ел. Үзе исән–сау.
Эшләүче пенсионерлар турында бик озак сөйләп булыр иде. Ходай Тәгалә сәламәтлек бирсен аларга.
Румия НАДРШИНА