Онытмагыз: сез—Арча егетләре

Онытмагыз: сез—Арча егетләре
Армиягә чакырылучылар белән очрашуны оештыру күркәм традициягә әверелде. Кичә Арча сәнгать мәктәбендә шундый чараның чираттагысы үткәрелде. Анда быел армия сафларына алынучы егетләребезне котлау, аларга теләкләрен җиткерү өчен ветераннар, отставкадагы хәрбиләр, әти–әниләр килгән иде.
— Без быел яз армиягә алынучыларны җыйдык. Ата–бабаларыбыз эшен дәвам итегез, чын ир–егетләр булып калыгыз, хезмәтегез тыныч тормышка гына юнәлдерелсен, исән–имин әйләнеп кайтыгыз, — диде аларга мөрәҗәгать итеп район башкарма комитеты җитәкчесе, армиягә чакырылучылар комиссиясе рәисе Илшат Галимуллин һәм район хакимияте исеменнән истәлек бүләкләре тапшырды.
Армия чакырылучылар — тәвәккәл, нык характер- лы, үз–үзләренә ышанган егетләр генә түгел, гаиләдә ата–ананың терәге булган кебек, илнең ышанычлы уллары да. Армия сафларына алынган көннән алып алар өчен тормышларында яңа чор башлана. Хәрби бурычларын ничек үтәүләре аларның үзләреннән генә тора. Ә ата–аналар өчен улларының яхшы, намуслы хезмәт итүләре турында часть командирларыннан рәхмәт хатлары алу рәхәтлек, күңел тынычлыгы бирә. Очрашуда ТР хәрби комиссариатының Арча һәм Әтнә районнары буенча бүлек җитәкчесе Алмаз Борһанов, әти–әниләрне сәхнәгә чакырып, шундый хатлар тапшырганда, аларның йөзләрендә нур балкыды, күзләрендә шатлыклы күз яшьләре ялтырады. Мондый рәхмәт хатлары Айсылу һәм Рәфикъ Хурамшиннар, Фәридә Зыятдинова, Зөлфия Хәйретдинова, Илсөя Галимуллинага уллары Рәмис, Рамил, Илдар, Салават хезмәт иткән частьлардан килгән иде.
— Безнең егетләребез бүгенге көндә 48 хәрби частьта хезмәт итә.Алар белән элемтәне югалтмыйбыз, даими рәвештә ничек хезмәт итүләре турында сорашып торабыз. Мондый хатлар алу безгә дә бик күңелле. Арча егетләре беркайда да, беркайчан да сынатмый дип горурланабыз. Язгы армиягә чакырылу 1 апрельдән 15 июльгә кадәр дәвам итә. Бу юлы бездән 72 егет армия сафларына алына. Аларга да шулай нык характер күрсәтеп, якыннары, дуслары, безнең йөзгә кызыллык китермичә, чын солдатлар булып хезмәт итүләрен телибез,—диде хәрби комиссар Алмаз Борһанов.
Булачак ил сакчыларын Әфган сугышы ветераны, запастагы офицер Сергей Баһаветдинов, район ветераннар советы рәисе Альберт Җамалиев котлап, изге те-ләкләрен җиткерде. Бөек Ватан сугышы ветераны Әнвәр Камалов теләкләре аеруча үтемле булды. Залдагылар аны аягүрә басып тыңлады.
— Безгә укырга мөмкинлек булмады. 17 яшьтән илне сакларга чыгып киттек. Беренче сугышта ук безнең полктан 25 кеше генә исән калды. Бервакыт күкне немец самолетлары каплап алды. Санадым, 72 иде. Берсе 32 бомба ташлады. Яу кырында күпме кеше башын салды. Теләгем шул: Ватанга хыянәт итмәгез, исән–имин булыгыз. Сезгә сугыш ачысын татымыйча, тыныч тормышта хезмәт итәргә язсын, — диде сугыш ветераны һәм булачак солдат кулына иң беренче повестканы да ул тапшырды.
Җитәкчеләр, ветераннар, отставкады хәрбиләр кулыннан повестка алу үзе зур мәгънәгә ия. Егетләргә хәзер алар ышанычын акларга туры киләчәк. Әти–әниләр исеменнән чыгыш ясап, Ринат Фазылов та шундый фикер җиткерде.
Кичәдә “Кем ул патриот?” дигән республика иншалар бәйгесендә җиңү яулаган Йолдыз Хәбибуллинага да бүләк тапшырылды.
Соңыннан Рәмис хәзрәт чыгыш ясады, егетләргә хәерле юл, имин хезмәт теләп, дога кылды. Хәерле сәгатьтә, егетләр. Киләсе язда барыгызны исән–имин каршы алырга насыйп булсын.
Гөлсинә ЗӘКИЕВА