Арча ягы талантларга бай

Арча ягы талантларга бай
Узган атнада район Мәдәният йортында Гала–концерт булды. «Газиз Арчам! Даның зурдыр, юлың туры, сиңа багышлана ул–кызларың җыры” дигән исем астында предприятие, оешма һәм учреждениеләр арасында ел дәвамында барган концерт–бәйгеләр сезонына йомгак ясалды. Чыгышлар Габдулла Тукай исемендәге Арча педагогика көллияте вокаль ансамбле башкаруында “Туган тел” җыры белән башланды.
Жюри әгъзасы буларак миңа сезон дәвамында һәр концертта катнашырга туры килде. Быел Арчаның 1нче, 2нче, 7нче мәктәпләре, 5нче гимназия, сәнгать, спорт мәктәпләре, балалар бакчалары, педагогика, агросәнәгать көллиятләре, Укучылар сарае, район мәгариф, мәдәният, халыкны социаль яклау идарәләре, “Бердәм Россия” партиясенең җирле бүлекчәсе, район ветераннар советы, почта бүлекчәсе, Арча ЗУЭСы, “Арча нефть продуктлары” акционерлык җәмгыяте коллективлары чыгыш ясады. Беренче чиратта шуны әйтергә кирәк, һәр оешма, предприятие һәм учреждение яхшы булсын, Арча тамашачысы яратып кабул итсен өчен чын күңелдән әзерләнгән. Һәм арчалыларга чыгышлар ошады да. Һәр концерт тулы тамаша залы белән үтте.
— 2001 елдан бирле бара бу чыгышлар. КВНнар да, театр һәм фольклор бәйгеләре дә булды, төрле девизлар белән үтте. Алар башында һәрчак район башлыгы Алмас Назиров торды. Һәр очрашу нечкә кылларны тибрәтте, бердәм булырга өйрәтте. Бу чыгышлар талантларны барлау өчен дә бик уңай булды. Күргәнебезчә, алар бездә бик күп. Сәнгать дөньясында кайнаган кешенең күңеле дә саф һәм якты була. Бу җиңүләр киләчәктә дә сезне матур эшләргә этәрсен, — дип район башкарма комитеты җитәкчесе урынбасары Надия Мифтахетдинова әлеге коллективларга сәхнәдән рәхмәтен белдерде.
Гала–концертка, гадәттә, иң яхшы номерлар гына сайланып алына. Әмма бу аерым очрак. Чөнки һәр чыгыш үзенчә матур, яхшы һәм үзенчәлекле. Һәрберсе мактау сүзләренә, көчле алкышларга лаек. Бу мәшәкатьле заманда көн дә эштән соң калып концертларга әзерләнү үзе генә дә ни тора. Кайчан әле район Мәдәният йорты сәхнәсендә чыгыш ясап, үз талантыңны күрсәтеп, тиешле бәя алыр идең. Сәнгать кешесе өчен тамашачы алкышы зур дәрәҗә ул.
Ә Гала–концертта арчалылар алкышларга юмарт булды. Чөнки һәр номер аңа лаек иде. Арча ветераннар советының “Кадриль”, район мәгариф идарәсе, 7нче мәктәп коллективларының рус халык биюе, халыкны социаль яклау идарәсенең япон кызлары биюе, педагогика көллиятенең һинд кызлары биюе, 1нче мәктәпнең “Умырзая” биюе, район мәгариф идарәсе фольклор коллективы чыгышы кемне генә битараф калдырды икән. Вокаль ансамбльләр, аерым җырчылар башкаруындагы җырлар, күңелле күренешләр тамашачы күңелен яулады.
Соңыннан «Мин — артист» номинациясендә катнашкан оешма җитәкчеләре дә сәхнәгә чакырылды. Баштан ахырга кадәр концертны алып барып та, гадәттә, игътибардан читтә калып килгән алып баручылар чыгышы да югары бәяләнде.
Гала–концерт тәмам, ә аннан алган тәэсирләр киләсе сезонга кадәр дәвам итәчәк. Чыннан да, бөек Тукайны, дистәләгән язучы һәм сәнгать әһелләрен биргән безнең Арча төбәге талантларга бай шул. Аларны менә шулай барлый белергә генә кирәк.
Гөлсинә ЗӘКИЕВА