Миләребез кипшермәсен

Миләребез кипшермәсен
Арча һәм Әтнә районнары буенча Пенсия фонды идарәсе каршында пенсионерлар өчен Университет эшли башлады. Ул рәсми рәвештә район мәгариф идарәсенең актлар залында ачылды. Өченче буын Университетында белем алырга теләүчеләрне район мәгариф идарәсе җитәкчесе Рина Бәдриева, район Пенсия фонды идарәсе җитәкчесе урынбасары Гөлназ Ибәтуллина сәламләде һәм уңышлар теләде.
“Россия пенсионерлар берлеге” җәмәгать оешмасының Арча районы бүлекчәсе рәисе Сания Камалетдинова:
— Россия күләмендәге безнең пенсионерларның җәмәгать оешмасы зур көчкә ия, — дип сөйләде. — Оешма пенсионерларның уй–фикерләре белән яши, аларны актив тормыш белән яшәргә өнди һәм моның өчен шартлар тудыра. Кайберәүләр пенсиягә чыккач, үз кичерешләре белән ялгызлыкта кала, картайдым, кирәгем калмады, дигән авыр уйларга бирелә, иртәсе елаудан башлана. Андыйларга ярдәм кулы сузарга кирәк. Өченче буын Университеты өлкәннәрне тулы тормыш белән яшәргә әзерли. Иң мөһиме — үзара аралашу. Апрель ахырында районда сезнең өчен спартакиада башланачак. Пенсионерлар йөзү, йөгерү, гимнастика, шахмат һ.б. ярышларда катнашачак. Иң көчлеләрне майда Казанда үтәсе спорт ярышлары көтә. Шулай ук “Кешеләргә матурлык бүләк итегез” дигән конкурсны да башлап җибәрәбез. Монысы бакчаларда, ишегалдында чәчәкләр үстерү буенча ярыш.
Өлкәннәребез мәдәният өлкәсендә дә актив. Өченче буын Университетында пенсионерлар компьютер белемен үзләштерәчәк, табиблар чыгышы белән сәламәтлек мәктәбен узачак, сәяхәтләр ярдәмендә туган як тарихын өйрәнәчәк, татар телен белмәүчеләр татар телен үзләштерәчәк.
Компьютер белемен шушында, район мәгариф идарәсенең компьютерлар сыйныфында, туплаячаклар. Идарәнең баш белгече Илшат Фәйзуллин укытачак.
— Кыска гына вакытта компьютерны тулысынча өйрәнеп бетеп булмый, — дип сөйли Илшат Фәйзуллин. — Мин аны университетта 6 ел өйрәндем. Иң мөһиме — компьютердан курку хисен юкка чыгару. Ул каршылыкны үткән һәр өлкән кеше компьютерда эшли ала.
Элеккеге китапханәче, Арча станциясе мәдрәсәсе мөгалли-мәсе Әлфия Рәхимова:
— Пенсиягә чыкканга 20 ел, — дип сөйли. — Хәзер бар нәрсә компьютер белән эшләнә. Заманадан артта калып булмый. Кояшыбызның кайчан байыйсын белгән юк...
— Гомерең буе укы, өйрән, дигән гыйбарә бар, — дип сүзгә кушылды мәдәният дөньясы белән яшәүче Роза Әминова.
— 63 яшь миңа, — ди Людмила Кирина. — Арчаның 2нче балалар бакчасында эшләдем. 42 ел хезмәт стажым бар. Бәлки әле мин тагын кайдадыр эшләрмен. Ә компьютерны белү кирәк. Татар теленә дә өйрәнер идем.
Гомере буе балалар белән эшләгән, хәзер районның мөгаллимәләр шурасы рәисе Рая Фәтхуллина:
— Диния нәзарәте белән элемтәгә керү өчен гел Интернетны ачарга кирәк. Оныгыма ялынырга туры килә. Кая гына барсаң да, компьютерны беләсеңме, дип сорыйлар. Чынлап торып өйрәнәсе иде.
— Миләребез кипшермәсен өчен килдем, — ди уены-чыны белән элек ательеда эшләгән Тамара Федорова.
Ә ми дигәнең, медиклар әйтмешли, гел хәрәкәтне ярата.
Румия НАДРШИНА