Җан җылысы белән

Җан җылысы белән
Бар оешма да Арча педагогика көллияте кебек булса икән ул. Үзләрендә эшләп чыккан пенсионерларны онытмый алар, һәрдаим искә алып торалар, ветераннар үзара хәл белешеп, көллияттә очрашалар. Әле менә яңа гына, үткән шимбәдә, көллият бакчасына бергәләп агач утыртты алар, аннан соң рәхәтләнеп сөйләшә-сөйләшә кайнар коймак белән чәй эчтеләр.
— 1960нчы еллар башында көллияттә укыган вакытта Казансу елгасы буена карлыган, чия куаклары утырт-кан идек, — дип искә төшерә Фирая Батыршина.
— 1970нче елларда Арча стадионы тирәсендә студентларның тирәк агачлыгын булдырдык, мин ул вакытта төркем җитәкчесе идем, — дип сүзне дәвам итте ветеран Альбина Куприянова.
— Заманында бүгенге көллият урынында басу, кызыл балчык иде, —дип сөйли физик тәрбия укытучысы булып эшләгән Ягъфәр Шәмиев. — Без студентлар белән монда чаңгы шуарга, спорт ярышлары үткәрергә килә идек.
— 1985 елда монда, яңа бинага күчкәч, чирәм җирне күтәрдек, дисәк тә була, — ди элеккеге биолог Флера Җиһаншина. — Күпләп алмагач, чия, гөлҗимеш, сирень куаклары утырттык. Шимбә көнне генә түгел, атна уртасында да өмәләр оештырдык. Майдан теплицаларда эшләдек. Янәшәдәге паркны да без булдырдык. Анда атаклы язучылар, җырчылар утырткан истәлекле агачлар да бар. Безнең ветеран биологлар Мансур Мусин, Камилә Гыйззәтуллина, Роза Сәлахиева, Владимир Смелов тырышлыгы белән күп нәрсәләр эшләнде.
— Алар экологиянең фанатлары иде, — ди куәтләп, көллиятнең элеккеге җитәкчесе Илдус Сәгъдиев. — Рәхмәт, көллият җитәкчелегенә, кунакка — 1 сентябрьдә, Өлкәннәр көнендә, иҗади кичәләргә, очрашуларга, концертларга чын мәгънәсендә җан җылысы белән чакыралар — бу безнең өчен зур бәйрәм.
Узган шимбәдә ветераннарның студентлар, укытучылар белән бергәләп чия агачлары, алмагачлар утыртуы, чыннан да, бәйрәм иде.
Румия НАДРШИНА