Районның мөхтәрәм кешеләре

Районның мөхтәрәм кешеләре
Яңа Кенәрдә яшәүче сугыш һәм хезмәт ветераны Рәгыйб Халитовка 90 яшь. Район башлыгы урынбасары Любовь Осина юбилярга Россия Президенты Владимир Путинның чираттагы котлау хатын тапшырды.
— Исән–имин 90 яшькә җитү ул, Рәгыйб абый, үзегез өчен дә, җәмәгатегез Фәния апа һәм балалар өчен дә зур бәхет, — диде Любовь Осина. — Балаларыгыз һәм гомер юлдашыгыз әйбәт булганга матур килеш олы яшькә җиткәнсез. Иң мөһиме — сезнең үзәк нык. Олы хезмәт һәм сугыш юлы үткәнсез, үз артыгыздан матур эз калдыргансыз, бик зур рәхмәт сезгә. Районның хөрмәтле кешесе сез, картаймаска, авырмаска әле, сез яшьләргә үрнәк булуыгыз һәм киңәшләрегез белән бик кирәк.
— Яңа Кенәр халкының рәхмәте белән дә яши торганмындыр, — ди Рәгыйб абый. — Яңа Кенәр мәктәбе җитәкчесе булып эшләгәндә мәктәп салдык, авыл Советында рәислек иткән елларда мәдәният йортын, мәчет төзедек. Рәхмәт, мәктәпкә чакырып бик зурладылар.
Рәгыйб абый турында авылдашлары феномен ул безнең, андый кеше башка юк, диләр. Гомере буе кеше мәнфәгатьләрен кайгыртып, халык ихтирамын яулаган ул.
— Төзелеш вакытларында иртүк чыгып киттем, төнлә генә кайтып кердем, — ди ветеран.
— Җитәкче хезмәтенең кыенлыгын аңлый идем, — ди Фәния апа. — Бер–беребездән көнләшмәдек. Минем дә күп вакытым мәктәптә үтте. Үзешчән дә идем әле. Үзе дә, клубка бар, рухың, күңелең күтәрелеп кайтыр, дип чыгарып җибәрер иде. Сәхнәдә җырлаудан узган ел гына туктадым. Телендә әшәке сүз булмады, сүгенмәде. Кычкырышмадык, кул белән шаярмады.
— Эшләгән хатын–кызны ничек хөрмәт итмисең инде, — ди Рәгыйб абый. — Фәния бик тырыш, эшчән булды.
Ике бала үстерә алар. Уллары Рөстәм 55 яшендә вафат була. Арчада яшәүче, аптекада эшләүче кызлары Ләлә Васильева:
— Тәртипле, матур гаиләдә үскән бәхетле балалар без, — дип сөйли. — Әти–әнинең хисләрен, җылы мөнәсәбәтләрен гел тоеп яшәдек. Абый белән шундый дус идек. Әти хөкүмәт эшендә булды. Әни барысына да ничек өлгерде икән, дип аптырыйм. Мәктәптә укытты да, өйдә дә тәртип булыр иде, текте дә, туганнарны да кунак итәргә өлгерде. Кунакка дәфтәрләрен кыстырып барыр иде, җай чыкканда шуларны тикшерде.
...Рәгыйб абый кулына гармун алды. Үзәкләрне өзеп тальян моңы агылды. Ветеран солдат җырларын көйләде.
Рәгыйб 17 яшеннән 1941 елда армиягә алына. 2нче Украина фронтында, Молдовия, Румыния, Венгриядә сугыш юлы үтә. Ике тапкыр яралана. Җиңү көнен госпитальдә каршылый. “2нче дәрәҗәдәге Ватан сугышы”, “1нче дәрәҗәдәге Ватан сугышы” орденнары һәм медальләр белән бүләкләнә.
Тумышы белән Каратай авылыннан, 5 кызга бер малай булып үскән Рәгыйб педагогика көллиятен, институтны тәмамлый. Фәния Носы мәктәбендә укытканда Рәгыйб белән таныша. Егет ул вакытта роно инспекторы. Төз буйлы, муенына кызыл шарф салган, каракүл якалы пәлтә кигән затлы егетне күргәч, яшь кыз, эх, шушындый егетләр белән танышып булмады, дип уфтана. Акыллы егет үзенә гомерлек пар итеп зирәк кызны сайлый. Бүген аларның берсенә —85, икенчесенә 90 яшь. Сөбханалла, бер–берсен хөрмәт итеп яшәүчеләр картаймый торгандыр шул. Исән–сау булып, бәхетле гомер кичерүләрен телик.
Румия НАДРШИНА