Тиздән җәйге каникуллар

Тиздән җәйге каникуллар
Әңгәмәдәшебез — район мәгариф идарәсе җитәкчесенең тәрбия эшләре буенча урынбасары Миләүшә Гарифуллина.
— Миләүшә Мансуровна, балаларның җәйге каникулы файдалы, кызыклы һәм хәвеф–хәтәрсез үтүе барыбыз өчен дә әһәмиятле.
— Балалар, беренче чиратта, ата–ананың игътибар үзәгендә булырга тиеш. Әмма каникул вакытында ата–аналар эштә булу сәбәпле, балалар, өйдә әби–бабай, абый, апа булмаса, көннәр буе карау-чысыз кала. Алар каникулда ни белән шөгыльләнә — бу мәсьәләне хөкүмәтебез күз уңында тота. Татарстан Республикасы Министрлар Кабинеты 2014 елның 14 апрелендә “Балаларның һәм яшьләрнең ялын, аларны сәламәтлән-дерүне һәм шөгылен оештыру турында” карар кабул итте. Бу турыда район башкарма комитеты да карар кабул итте. Шулар нигезендә районда бик күп чаралар оештырылачак.
— Балаларны нинди кызыклар көтә?
— 1 июньнән гомуми белем учреждениеләрендә мәктәп яны лагерьлары эшли башлаячак. Балалар 21 көн ял итәчәк. Бу инде дүрт стена арасында уку түгел, ә бәлки иркенгә чыгу һәм шул ук вакытта белем туплауны да онытмау. Һәм тагын 1 июньнән мәктәп яны хезмәт һәм ял лагерьлары да үз эшен башлап җибәрәчәк. Ул 18 көн дәвам итәчәк. Шулай ук 1 июньнән Носы мәктәбе базасында палаткаларда ял итү лагере ачылачак. Анда туризм белән мавыгучыларны төрле кызыклар көтә.
— Узган ел палаткаларда ял итү Апаз мәктәбе базасында оештырылды. Быел — Носыда...
— Палаткалар корып ял итү төрле мәктәпләрдә оештырылырга мөмкин. Узган елларны Төрнәле, Түбән Мәтәскә, Лесхоз, Апаз мәктәпләре базаларында, быел менә Носы мәктәбе базасында үткәрелә ул. Бу төр ял итүне балалар ярата.
— Районда Шурабаш мәктәбе базасында эшләп килүче “Шатлык” сәла-мәтлек лагере турында ни әйтерсез?
— Шурабаш мәктәбендә төзекләндерү эшләре булу сәбәпле, быел “Шатлык” лагере Сеҗе һәм Яңа Кенәр лицее базаларында эшләячәк.
— “Шатлык»та быел нинди дә булса яңалык булачакмы?
— Техник иҗат белән кызыксынучыларга Укучылар сараеннан белгечләр, сәләтле балалар килеп бергәләп өйрәнү, иҗат итү оештырылачак.
— Анда балалар кунып ял итәчәк. Шартлар тудырылганмы, көннәре файдалы һәм кызыклы үтәрме, ата–ана баласы өчен тыныч була аламы?
— “Шатлык” лагере оештырылачак Сеҗе һәм Яңа Кенәр лицеенда ял итү өчен барлык шартлар да тудырылган. Мунча, душ булачак. Балалар өчен бигрәк тә әһәмиятле спорт мәйданы һәм җиһазлары бар. Арча педагогика көллиятеннән әзерлекле студентлар эшләячәк. Укытучылар, медиклар, полиция һәрвакыт янәшәдә булачак. Программа үтәлеше тикшерелеп торачак.
— Без районда үтәчәк чаралар турында сөй-ләштек. Ә балаларны республика күләмендә нинди кызыклар көтә?
— Районнан 30 бала диңгез буенда Анапада ял итеп кайтачак. Сәләтле балаларга, гомумән, теләге булганнарга, республика күләмендәге лагерьларның да ишеге ачык. Сәламәтлеге йомшаграк балаларга шифаханәләрдә, авыр хәлле, тәрбиягә кыен бирелүче яшүсмерләргә социаль яклау бүлеге яр-дәме белән әйбәт шартлар тудырылган лагерьларда ял итү мөмкинлеге дә бар.
— Әти–әниләргә теләк-ләрегез.
— Бүгеннән үк баланың каникулын алдан планлаштырып куярга кирәк. Баланы район, мәктәп яны лагерьларында ял иттерәсең килә икән инде, сыйныф җитәкчесе белән сөйләшү сорала. Ә инде республика күләмендәге лагерьлар, диңгез буенда ял итү турында кызыксынучылар булса, район мәгариф идарәсенә шалтыратып, минем белән элемтәгә керергә кирәк. Телефон: 3-30-12.
Румия НАДРШИНА