“Безнең кадерле ветеран” проекты

“Безнең кадерле ветеран” проекты
Җиңүнең 70 еллыгына әзерлек кысаларында сугыш ветераннарының сәламәтлеген саклау һәм аларга медицина ярдәме күрсәтүгә зур игътибар бирелә. Шушы максаттан “Безнең кадерле ветеран” дигән республика социаль–гуманитар проеты эшли башлады.
Анда сугыш ветераннары һәм инвалидлары өчен дәвалау учреждениеләрендә махсуслаштырылган палаталар булдыру һәм аларда авырулар дәвалану өчен иң уңай шартлар тудыру турында сүз бара. Татарстан Республикасы дәвалау учреждениеләрендә яхшыртылган шартлар белән 926 урынга 428 махсуслаштырылган палата булдырылган инде.
Безнең Арча үзәк хастаханәсендә дә шундый ике палата бар. Берсе хирургия, икенчесе йөрәк–кан тамырлары авыруларын дәвалау үзәгендә. Ишектән керүгә үк алардагы уңайлылык күзгә ташлана. Ике урынлы. Чиста, якты, җылы, иркен. Шунда ук юыну урыны, салкын, җылы суы бар. Күпфункцияле ятаклар, өстәл, кием–салым шкафы, урындыклар, телевизор, радио, сәгать, суыткыч, чәйнек, чәй сервизы, урыннан тормыйча гына табиблар, шәфкать туташларын чакырту өчен махсус төймә һәм башкалар бар.
—Ел башыннан әлеге палаталарда 30 кеше ятып чыкты. Бәйрәм алларыннан гына да 6 кешегә стационар медицина ярдәме күрсәтелде. Хастаханәдән чыгар алдыннан һәрберсенә бүләк бирдек,—ди дәвалау буенча баш табиб урынбасары Гөлсинә Исламова. — Моннан тыш ветераннарга амбулатор ярдәм дә күрсәтелә. Поликлиникада алар чиратсыз участок табибларына күренә. Ә йөри алмасалар, табиблар өйләренә бара. Авылларга да чыгалар. Шунда ук анализлар алына, УЗИ үткәрелә. Стационарда дәвалау таләп ителсә, хастаханәгә алып киләләр.
Күлтәстән сугыш ветераны Га-рәфетдин Зиннуров хирургия бүлегендәге махсуслаштырылган палатада яткан. Кызы Рәмлә дә янында булган.
—Мин 1927 елгы. Яшь бар. Моңарчы сәламәтлегемнән зарланмадым. Соңгы вакытта бирештем. Атлый алмадым. 10 көн дәвамында дәваладылар. Уколларын да кададылар, тиешле даруларын да бирделәр. Безнең өчен иң кыйммәтлесе — игътибар һәм ихтирам. Вакытында, яхшы итеп карыйлар, бик ягымлылар, тәмле ризыклар әзерлиләр. Палатада үз өеңдә кебек уңайлы. Бөтен шартлар тудырылган. Чиста, көнгә 2–3 тапкыр идәнне генә сөртеп алалар. Мондый мөгамәләдән мин бик канәгать. Табибларга, шәфкать туташларына олы рәхмәтемне белдерәм, — ди сугыш ветераны.
“Безнең кадерле ветеран” проекты 3 этапта барып, 2015 елның маена кадәр дәвам итәчәк. Бу атнада район башлыгы урынбасары Любовь Осина, район башкарма комитеты җитәкчесе урынбасары Рина Бәдриева, район башкарма комитетының инфраструктура үсеше бүлеге җитәкчесе, районның баш архитекторы Рөстәм Хәбибуллин, район үзәк хастаханәсенең баш табибы Тәлгать Баһаветдинов катнашындагы комиссия ветераннар өчен әзерләнгән махсуслаштырылган палаталарны карады.
— Бүгенгә бу 2 палатаны камилләштереп бетерәсе бар. Икесенә дә душ кабинасы һәм култыксалар белән унитазлар куелачак. Дөрес, бәдрәф палата каршында гына, әмма без ветераннарга тагын да уңайлырак итәргә тырышабыз. Аннан терапия бүлегендә тагын бер палата булдыру күздә тотыла. Анысын ныклап төзек-ләндерәсе бар, — диде баш табиб.
— Моның өчен иганәчеләр булышлыгы, хәйрия эшен җәелдерү кирәк. Оешмалар да бу эшкә тартылачак. Сугыш ветераннарына ярдәм итү — һәрберебезнең изге бурычы, —диде Любовь Осина.
Гөлсинә ЗӘКИЕВА