Вакыт бара, дым югала

Вакыт бара, дым югала
Муниципаль район башлыгы Алмас Назиров 13–14 май көннәрендә хуҗалыкларда язгы кыр эшләренең барышы белән танышуны дәвам итте.
“Татарстан” ширкәте районда кыр эш-ләренә беренчеләрдән булып керешә һәм иң алдан тәмамлый да. Хуҗалык җитәкчесе Рүзәл Мәрдәнов әйтүенчә, катнаш азыклар, кукуруз чәчеп бетерәсе генә калган.
Быелгы яз сәеррәк килде, башта салкын булды, яңгырлардан соң артык эссегә китте, туфракның өсте коры, асты чи. Шуңа күрә җирне җайга китерүе кыен. Әмма бүгенге технология мондый шартларда да туфракны күгәрчен тәпие төшәрлек хәлгә китерергә мөмкинлек бирә. Күп хуҗалыкларда бар андый басулар.
“Игенче” ширкәтендә көзге бодай узган елгы кырыс шартларда да югары уңыш биргән иде. Быел да өч мең гектардан артык мәйданда игәләр. Уҗымнар әйбәт кышлап чыккан. Хәзер инде икенче кат тукландыралар.
— Гектарга 250 килограмм ашлама туры килә, — ди ширкәт җитәкчесе Илнар Гайнетдинов.
Район башлыгы сорт сынау участогында да булды. Аның мөдире Фәнис Зарипов кайсы сортның нинди хәлдә кышлап чыгуын күрсәтеп йөрде.
— Районда мондый участок булуы әйбәт инде, — диде Алмас Назиров. — Сортларны вакытында яңартып бару мөмкинлеге бар.
“Нива” ширкәте — бүгенге көндә районда иң проблемалы хуҗалыкларның берсе. Инвестор килгәч, уңай якка нинди булса да үзгәреш булырга тиеш кебек иде. Ләкин биредә аркылы ятканны буйга да алып салмадылар, басуларда эш темпы түбән, ашлама кертү дигән нәрсә юк. Хәтта арыш та чәчмиләр. Яңасалада да, Каенсарда да фермалар, машина–трактор паркы ташландык хәлдә, бик күңелсез күренешләр.
“Сафия–1” ширкәте быел юл буйларын әйбәтләп эшкәрткән. Арышлары яхшы. Әмма техника белән кыенрак, эшләре шактый әле.
“Арча” ширкәтендә көздән эшкәртелми калган мәйданнар күп. Уҗымнарны тукландырдылар, чәчәләр, тырышалар.
— Чәчүне төгәлләргә тагын 14 көн кирәк, – ди ширкәт җитәкчесе Илшат Әшрәфҗанов.
Район башлыгы хуҗалыкларда эшләрнең барышы белән танышып чыккач, хәлнең шактый киеренке булуын әйтеп үтте. Дөрес, монда һава шартларының үзенчәлекле килүе йогынты ясый. Ләкин кайбер җитәкчеләр, белгечләр тарафыннан да тиешенчә эшләү җитми. Алмас Назиров урыннарда игътибарны әнә шуларга юнәлтте, язның бер көне елны туйдыруын истә тотарга киңәш итте.
“Ватан”, “Северный” ширкәтләре механизаторлары Ренат Хәкимов һәм Фәнис Вәлиуллин “Бердәм Россия” партиясенең җирле бүлекчәсе политсовет секретаре Алмас Назировның Рәхмәт хатына һәм акчалата премиягә лаек булдылар.
Ильяс ФӘТТАХОВ