Эх, бирешәсе килми

Эх, бирешәсе килми
— 300ләп кеше без монда, Арча стадионында, башлангыч профсоюз оешмасы командалары җиңел атлетика буенча ярыша, — дип шалтыратты район мәгариф учреждениеләре хезмәткәрләренең профсоюз оешмасы җитәкчесе Вакыйф Харисов.
Йөрәк түзмәде, төштем стадионга. Әнә, Лесхоз мәктәбе директоры Зөлфәт Дәүләтбаев үзенекеләр өчен янып–көеп йөри. Хәер, ул үзе дә ярышларда катнаша. Кәче мәктәбе физкультура укытучысы Хәйдәр Зәйнуллин:
— 400 метр араны йөгерүдә мин беренче, — дип шатлыгы белән уртаклашты.
Хәйдәрдән соң икенче нәтиҗә — Курса–Почмак мәктәбе физкультура укытучысы Хәлил Хәсәновта.
Шушмабаш мәктәбе математика укытучысы Рәис Сөнгатуллин, яше 50дән узса да, афәрин, 100 метр араны җәһәт кенә йөгереп үтте.
Түбән Мәтәскә мәктәбендә озак еллар башлангыч профсоюз оешмасы җитәкчесе булып эшләгән, 57 яшьлек музыка укытучысы Раил Хәбибуллин да 100 метрга кросс бирде.
— Карап торам, ник бер кеше тәмәке тартсын, — диде ул. — Соңгы елларда спорт ярышлары активлашып китте. Күңелле, катнашасы килеп тора.
2нче мәктәпнең хезмәт укытучысы Вилорик Зиатдинов барысын да уздырган, аңа инде 63нче яшь, ә ул һаман йөгерә.
— Рәхмәт, бер ярыштан да калдырмыйлар, — ди ул уены–чыны белән.
Ярышларны 7нче мәктәпнең физкультура укытучысы Булат Гәрәев алып барды.
— Булат Гәрәев — безнең төп таяныч, — дип мактап алды аны Вакыйф Харисов. Булат республиканың профсоюз комитеты Мактау грамотасы белән бүләкләнде.
— Йөрәктә Арча педагогика көллиятеннән калган спорт чаткысы сүнмәгән әле, — ди 10нчы балалар бакчасы тәрбиячесе Фәния Гыйззәтуллина.
— Уңышларыбыз да бар, — ди шушы ук бакчаның башлангыч профсоюз оешмасы җитәкчесе Алсу Җамалиева. — Тенниста Ирина Газизова 2нче урынны алды. Гөлназ Фәйзуллина кул көрәшендә җиңеп чыкты.
Гөлназ Фәйзуллина:
— Авылда эшләп үскән кызларның куллары көчле була, — дип елмая. — Мөндештән мин. Үскәндә әти, энем белән кул көрәштереп шаяргалый идек. Сабантуй ярышларында да катнашам.
Иске Ашыт мәктәбе башлангыч профсоюз оешмасы җитәкчесе Радик Фәтхуллин:
— Спорт ярышларында катнашу ул укучылар арасында дәрәҗәне дә күтәрә, — ди. — Башка мәктәп коллективлары белән аралашу, көчле спортчыларны күрү шулай ук әһәмиятле. Мәктәптә теннис өстәле бар. Чаңгы шуарга чыгабыз. Гәүдәне формада тоту өчен булса да йөгерүчеләребез дә юк түгел. Хәтта гаилә белән Арчага бассейнга йөрүчеләребез бар. Мондый ярышларга килгәч, эх, бер дә бирешәсе килми...
5нче гимназиянең укыту эшләре буенча директор урынбасары Лилия Нигъмәтуллина үз яшьтәшләре арасында 100 метр араны һәрвакыттагыча бүген дә иң җитез йөгереп үтүче булды. Түбән Аты мәктәбе профком рәисе Рәдис Шакиров 40 яшьтән югарылар арасында 100 метрны йөгерүдә шулай ук беренчелекне беркемгә дә бирми.
Яңа Кенәр лицее командасы, афәрин, беренче урынны алды! Арча агросәнәгать көллияте — икенче, Лесхоз мәктәбе өченче нәтиҗәне күрсәтте. Инде уку елының спорт нәтиҗәләрен көтәргә кала. Призлы урын алучыларга бүләге дә кыйммәт булачак.
Румия НАДРШИНА