Вакыйгалар эчендә кайнагыз

Вакыйгалар эчендә кайнагыз
Әйләнә дә килә кышлар, әйләнә дә килә җәйләр... Тагын җәй якынлаша. 2014 елның җәе. Безнең өчен ул икенче яртыеллыкка газета–журналларга язылуның иң кызган чоры.
22 майда традиция буенча почта бүлекчәсендә яңадан Абунәче көне үткәрелде. Быел “Арча хәбәрләре” газетасы редакциясе үзгәреш кертеп, үзендә дә вакытлы матбугатка язылучылар, даими хәбәрчеләре белән очрашу, ягъни, Абунәче көне үткәрде. Рәхмәт, күп кеше килде һәм алар киләчәктә дә район газетасы белән бергә калырга теләвен белдерде. Ул вакытта әле “иске”, ягъни, арзан бәядән (хәзер шулай дияргә генә калды, чөнки газета–журналларга язылу бәясе артты) язылып булды. 22 майда почта бүлекчәсенә бераз шүрләп тә бардым. Интернет, телевидение, сайтка сылтап газеталарга игътибар итмиләр, дип зарлана идек, хәзер шуңа өстәлеп, бәяләр дә арткач, Абунәче көненә килүче булырмы?
Юкка борчылганбыз икән. Бер вакытлы матбугат белән танышып барган кеше аны гомерлек юлдашына әверелдерә. Киләләр, язылалар. Аннан алдан аяк киенеп куярга өлгермәгәннәр өчен бик уңай вариант та бу. Шушы бер көндә яраткан басмаңа да языласың, бүләкләр дә аласың. Мондый форсатны күпләр кулдан ычкындырырга теләмәгән.
Арча почта бүлекчәсендә үткәрелгән Абунәче көне һәрчак үзе бер бәйрәм төсен ала. Бу юлы да почта хезмәткәрләре тырышкан. Һәрберсе иртә таңнан аяк өстендә. Килүчеләрне ишектән үк ачык чырай белән каршы алалар, ярдәм күрсәтергә әзер торалар. Мондый очракта “күтәреп кенә йөртмиләр” дигән сүз бик туры килер иде. Шуңа әллә каян яңгырап торган музыка тавышы гына түгел, кызларның ягымлы карашлары, тәмле сүзләре дә кешеләрне бина эченә тарта. Үзеннән–үзе аяк шул якка өстери. Ә анда кергәч язылмый чыгып китеп тә булмый. Чөнки кызыктыргыч күренешләр бик күп. Беренчедән, Татарстанда басылган газета һәм журналлар редакцияләреннән килгәннәр. Икенчедән, буш кул белән түгел. Яратып укыган журналың җурналисты сиңа истәлек бүләге тапшырсын әле. Үзе бер рәхәт бит. Безнең редакция кызлары, мәсәлән, “Сөембикә” журналын көтеп ала һәм бер хәрефен дә төшереп калдырмый укый.
—Мин ул журналны 90нчы еллар башыннан бирле алдырам. Һәр материалы ошый. Бик яратып укыйм,—ди Гөлзия Нәбиуллина.
Шулай ук “Акчарлак”, “Халкым минем”, “Казанские ведомости”, “Шәһри Казан” республика газеталары вәкилләре дә ерак юлны якын итеп Арчага Абунәче көненә (бүләкләр белән) кайткан иде.
—Безнең газетага Арча төбәгендә яратып язылалар,—ди “Халкым минем” газетасы баш мөхәррире Гөлназ Шәйхи.—Читтәге, үзебездәге татарлар, сәнгать әһелләре, артистлар тормышы, татар хатын–кызы язмышы һәм башкалар турында язабыз без. Газетабызны алдыручылар “Авылым минем” бәйгесендә катнаша ала. Гомумән, газетабыз кызыклы һәм мавыктыргыч.
Район газетасы турында сүз дә юк инде. Ул күпләрнең яраткан гына түгел, ә өстәл газетасына әверелде. Шулай тиеш тә. Ничек шунда яшәп, районың вакыйгалары белән танышып бармаска мөмкин? Үзе язган мәкаләсенең басылу–басылмавын белү, белдерүләр белән танышу өчен редакциягә керүчеләргә аптырыйм. Мәкалә яз, даими белдерү биреп бар да, газета алдырма инде.
Абунәче көнендә “Арча хәбәрләре” газетасы редакциясе дә үз басмасына язылучыларга бүләкләр тапшырды. Без сезне хөрмәт итәбез, газета укучыларыбыз. Газетабызга язылырга онытмагыз. Безнең белән бергә булыгыз. Вакыйгалар эчендә кайнагыз.
Гөлсинә ЗӘКИЕВА